Фахрий устозлар зиёрат қилинди
Ўқитувчи ва мураббийлар куни муносабати билан Ўзбекистон мусулмонлари идораси раиси ўринбосари Зайниддин домла Эшонқулов бошчилигида бир гуруҳ ходимлар тизимда узоқ йиллар давомида ишлаган фахрий устозлар ва илм-маърифат йўлига умрини бағишлаган аҳли илмларни йўқлаб боришди.
Жумладан, шайх Абдулазиз Мансур ҳазратлари, Раҳматуллоҳ қори Обидов, Жалолиддин ҳожи Нуриддинов, Аҳмаджон домла Бобомуродзода, Абдулҳаким қори Матқулов каби фазилатли устозлар дийдорига мушарраф бўлинди.
Ташрифлар давомида устозларнинг фойдали суҳбат ва насиҳатлари тингланди. Устозларнинг жамият ҳаётидаги ўрни, ёшлар тарбияси ва маънавий-маърифий соҳа ривожига қўшган ҳиссалари эътироф этилди. Уларга эсдалик ҳадялар тақдим этилди.
Фахрий устозлар бундай эътибор ва эҳтиромдан мамнун бўлганларини билдириб, юртимиз, юртбошимиз, муфтий ҳазратлари ва бошқалар ҳақларига дуолар қилишди.
Ўзбекистон мусулмонлари идораси
Матбуот хизмати
ЮЗДАН ЗИЁД ОИЛАГА КЎМАК БЕРИЛДИ
Сайёр йиғилиш
Бир кишига кўмаклашсангиз, у қанчалик шод бўлади.
Энди бир эмас, ўн эмас, юздан зиёд оилага ҳам маънавий, ҳам маърифий, ҳам моддий кўмак берилса, қанча кишининг кўнгли кўтарилишини, сизни алқашини тасаввур қилиб кўринг-а.
Бугун Тошкент шаҳар бош имом-хатиби Абдуқаҳҳор домла Юнусов бошчиликларида пойтахтимизнинг Янги ҳаёт туманидаги «Ниёзмат ота» жоме масжидида маънавий-маърифий сайёр йиғилиш ўтказилди.
Тадбирда Тошкент шаҳар бош имом-хатиби ўринбосари Эргашали домла Рустамов, Тошкент шаҳар туманлари бош имомлари, имом-домлалар, «Ҳаж 2026» иштирокчилари қатнашдилар.
Тумандаги ижтимоий-маънавий муҳитни янада соғломлаштириш мақсадида маҳаллаларга ташриф буюрилди. Адашиб ақидаси бузуқ турли оқимлар таъсирига тушиб қолган шахслар, ажрим ёқасига келиб қолган оилалар билан ҳам суҳбатлар олиб борилди.
Катта ҳаёт тажрибасига эга ҳожи оталар, ҳожи оналар имом-хатиблар, отинойилар билан биргаликда олиб борган маърифий тарғиботлари ўз самарасини берди: юздан зиёд хонадонга ҳам маънавий, ҳам моддий ёрдам кўрсатилди.
* * *
Тошкент шаҳар бош имом-хатиби Абдуқаҳҳор домла Юнусов Янги ҳаёт туманидаги маҳаллаларга ташриф буюриб, у ердаги бир қанча хонадонларга кириб, хонадон эгаларининг қалбларига хурсандчилик улашдилар.
Қувонарлиси, янги ўқув йили арафасида ҳомийларни жалб қилган ҳолда 30 та ҳақдор хонадон соҳиблари фарзандларига сумка, ўқув қуроллари ҳадя этилди.
Юздан зиёд хонадон эгаларининг кўнгли кўтарилиб, улар эзгу ишларнинг бошида турган барча азиз инсонларнинг ҳақларига хайрли дуолар қилишди.
Тошкент шаҳар вакиллиги
Матбуот хизмати