Салафи солиҳлардан қоида ва мерос бўлган сўз бор:

من رام العلم جملة ذهب عنه جملة

“Кимки илмнинг ҳаммасини бирданига ўрганишни истаса, илмнинг ҳаммасидан қуруқ қолади”.

Оз вақтда илмнинг ҳаммасини ўрганиб оламан, дея хомтама бўлган талаба, илмнинг ҳаммасидан бебаҳра қолади. Ҳеч нарсага эришмайди.

Қуръони Карим ҳам Расулуллоҳ соллаллоҳу алайҳи васаллам 23 (йигирма уч) йилда нозил бўлган.

Имом Бухорий раҳимаҳуллоҳ Саҳиҳул Бухорийни 16 (ўн олти) йилда, ҳар доим таҳорат ва икки ракат нафл намоз ўқиб, сўнгра ёзганлар.

Имом Бурҳониддин Марғиноний раҳимаҳуллоҳ Ҳидоя асарларини 13 (ўн уч) йил мобайнида рўзадор ҳолда ёзганлар.

Илм китоблари ҳарфма-ҳарф ва калима-калима изоҳлаб ўрганилади. Игна билан қудуқ қазишга сабр-тоқат, олийҳиммат, интизом ва узоқ вақт зарур. Шошқалоқлик ва пухталик бир-бирига зид – ҳеч қачон жамланмайди.

Толиби илм дўстим! Илмнинг энг боши сабрдир: китобга сабр қиласиз, устозга сабр қиласиз, яшаётган шаҳрингизга сабр қиласиз, ҳамдарсларингизга сабр қиласиз ва ҳоказо.

Илм олиш лаззатига эришгач, сабр мақомидан розилик ва муҳаббат мақомига ўтиб олгач ҳаётингиз мазмуни китоб ва устозлар суҳбатига айланади.

Аллоҳ таоло фойдали илм берсин!