Мадинада зиёратчиларни руҳлантирган лаҳзалар!
Ҳамюртларимиз айни кунларда Расулуллоҳ ﷺ шаҳарлари — муборак Мадинада ибодат ва зиёратлар билан машғул. Муборак сафарга Фатво маркази уламоси ва тажрибали элликбошилар бошчилик қилмоқда.
Улар зиёратчиларни Уҳуд тоғи ва Қубо масжидларига олиб бориб, бу муборак жойларнинг Ислом тарихида тутган ўрни ҳақида таъсирли маърузалар қилдилар.
Мадина ҳавосидаги сукунат, уламоларнинг қалбга кириб борувчи сўзлари ва зиёратчиларнинг ихлосли дуолари — ҳар бир инсонга завқу шавқ бағишлайди.
Аллоҳ таоло бу сафардaги ҳамюртларимизнинг ибодат ва зиёратларини қабул айласин!
Ўзбекистон мусулмонлари идораси
Матбуот хизмати
Жиззахда 35 нафар боланинг хатна тўйи ўтказилди
Жиззах шаҳридаги “Яккасарой” тантаналар мажмуасида ота-она қарамоғидан маҳрум бўлган болалар, эҳтиёжманд оилалар фарзандларига меҳр-эътибор кўрсатиш мақсадида уларнинг хатна тўйи ўтказилди.
“Вақф” хайрия жамоат фонди, Ўзбекистон мусулмонлари идорасининг Жиззах вилоятидаги вакиллиги ҳамда вилоят ҳокимлиги ташаббуси билан ташкил этилган хайрия тадбирида 2 ёшдан 11 ёшгача бўлган 35 нафар болажонларга хурсандчилик улашилди.
Болаларга байрам муносабати билан велосипед, костюм-шим, кўйлак, оёқ кийимлари ҳамда яна бошқа турли хил совға-саломлар тақдим этилди.
Болаларнинг яқинлари ва жамоатчилик вакиллари учун байрам дастурхони ёзилди.
Ўзбекистон мусулмонлари идораси Жиззах вилояти матбуот хизмати
