Умра зиёратчиси: “Сафаримиз ниҳоятда ҳузур-ҳаловатли ўтди”
Жорий йилнинг 23 октябридан 2 ноябрига қадар Ҳаж ва умра маркази томонидан умра сафарига бориб келган зиёратчилар сафар давомида ўзларига кўрсатилган хизматлардан жуда мамнун бўлишди.
Мадинаи мунавварада Равзаи шарифга кириш, Уҳуд тоғи, Қубо масжиди зиёратларидан бир олам тассуротлар олиб, эҳром боғлаб Маккаи мукаррамага келган зиёратчиларнинг ҳаммаси ибодатларини адо этишди.
Каъбатуллоҳ тавофи, беш вақт ва нафл намозлар билан бир қаторда Арафот, Нур, Савр тоғлари ҳамда Мино, Муздалифа водийлари каби муборак қадамжоларга уюштирилган зиёратлардан дилларда фараҳ жўш урди.
Қизил денгизга қилинган саёҳат уларнинг кайфиятларини янада чоғ этди.
– Кексайиб қолганим учун, гарчи куёвим ва қизим билан узоқ сафарга чиққан бўлсам ҳам, хавотирим бор эди, – деди сурхондарёлик 76 ёшли Осиё она Тошмуҳаммедова. – Халқона тил билан айтганда, эгали эканмиз. Ишчи гуруҳи, элликбошилар, шифокорлар доим хизматга шай туришди. Ибодатларни бирма-бир, етаклаб юриб ўргатишди. Бирор жойда еб-ичишнинг, меҳмонхонанинг ё уловнинг ташвишини қилмадик. Аллоҳга беҳисоб шукрки, сафаримиз ниҳоятда ҳузур-ҳаловатли ўтди.
Зиёратчиларни Ўзбекистондан муборак диёрга кузатишдан тортиб, то она Ватанга қайтишларигача бош-қош бўлганлар ҳақига дуолар қилинди.
Ўзбекистон мусулмонлари идораси
Матбуот хизмати
Бир гуруҳ диний-маърифий соҳа фидойиларига "Ўзбекистон Республикаси мустақиллигининг 35 йиллиги" эсдалик нишонлари топширилди
27 август куни Ўзбекистон Республикаси мустақиллигининг 35 йиллиги муносабати билан диний-маърифий соҳада самарали меҳнат қилиб келаётган фидойи юртдошларимизни тақдирлашга бағишланган тантанали тадбир бўлиб ўтди.
Тадбирда Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов кириш сўзи билан иштирок этди.
Кириш нутқида мамлакатимизда мустақиллик йилларида, айниқса, сўнгги йилларда диний-маърифий соҳани ривожлантириш, жамиятда тинчлик-тотувлик, миллатлараро ҳамжиҳатлик ва диний бағрикенгликни мустаҳкамлаш борасида амалга оширилаётган ислоҳотлар, шунингдек, соҳада фаолият юритаётган уламолар, имом-хатиблар, мударрислар ва фидойи ходимларнинг муносиб ҳиссаси ҳақида алоҳида таъкидланди.
Тантанали тадбир давомида диний-маърифий соҳада кўп йиллардан буён самарали меҳнат қилиб, юртимизда маънавий барқарорликни таъминлаш, ёш авлодни миллий ва умуминсоний қадриятлар руҳида тарбиялаш, аҳоли ўртасида маърифий тушунтириш ишларини олиб боришга муносиб ҳисса қўшиб келаётган бир гуруҳ фидойи юртдошларга "Ўзбекистон Республикаси мустақиллигининг 35 йиллиги" эсдалик нишонлари тантанали равишда топширилди.
Эсдалик нишонларини топшириш маросимида Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқ Тошбоев, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Ўзбекистондаги Ислом цивилизацияси маркази директори Фирдавс Абдуҳаликов, Ўзбекистон Республикаси Вазирлар Маҳкамаси масъул ходими Орифхон Зокировлар иштирок этдилар.
Тақдирлаш маросимида таъкидланганидек, мазкур эсдалик нишони мамлакатимиз тараққиётига, унинг тинчлиги ва барқарорлигига, жамиятда миллатлараро тотувлик ва диний бағрикенглик муҳитини мустаҳкамлашга, ёш авлодни миллий ва умуминсоний қадриятлар руҳида тарбиялашга муносиб ҳисса қўшаётган фидойи инсонларга билдирилган юксак эҳтиром ва эътироф рамзидир.
Тадбир якунида тақдирланганлар ўзларига билдирилган юксак ишонч ва эътибор учун миннатдорлик билдириб, мамлакатимиз тинчлиги ва равнақи йўлидаги эзгу фаолиятларини янада сидқидилдан давом эттиришларини таъкидладилар.
Барча мукофот соҳибларини самимий муборакбод этамиз!
Мустақиллигимизнинг 35 йиллиги муборак бўлсин!
Ўзбекистон мусулмонлари идораси Матбуот хизмати