Умра мавсуми тарихдаги рекорд кўрсаткич
Умра кириш визалари энди берилган санадан бошлаб уч ой эмас, бир ой амал қилади.
Саудия Арабистони Ҳаж ва Умра вазирлиги Умра визаларининг амал қилиш муддатини уч ойдан бир ойга қисқартирди. Бироқ, мамлакатга киргач, ташриф буюрувчи уч ойгача Қиролликда қолиши мумкин.
Янги қоидалар ноябрь ойи бошидан кучга кирди. Бу ўзгариш жорий йилда умра визасини олиш сони рекорд даражага чиққани билан боғлиқ бўлиб, ҳозиргача тўрт миллиондан ортиқ хорижий зиёратчига виза берилган.
Янги тизимга кўра, зиёратчи виза берилганидан сўнг 30 кун ичида Саудия Арабистонига кирмаса, унинг визаси автоматик равишда бекор қилинади.
Шу билан бирга, мамлакатга киргандан кейинги уч ойлик яшаш муддати сақланиб қолади.
Умра ва зиёрат бўйича Миллий қўмита маслаҳатчиси Ахмад Бажаейфернинг таъкидлашича, ўзгаришлар ёз мавсуми тугагач Макка ҳамда Мадинада ҳаво салқинлашидан сўнг зиёратчилар сонининг кескин кўпайишига тайёргарлик сифатида киритилган.
Жорий йилнинг июн ойида бошланган Умра мавсуми тарихдаги энг юқори кўрсаткич қайд этилди, беш ой ичида тўрт миллиондан ортиқ хорижий зиёратчи Саудияга келган. Бу эса аввалги мавсумлар натижаларидан ҳам юқори бўлиб, Умра зиёратига бўлган жаҳон миқёсидаги талабнинг ортиб бораётганини кўрсатади.
Т.Азимов тайёрлади
ЮЗДАН ЗИЁД ОИЛАГА КЎМАК БЕРИЛДИ
Сайёр йиғилиш
Бир кишига кўмаклашсангиз, у қанчалик шод бўлади.
Энди бир эмас, ўн эмас, юздан зиёд оилага ҳам маънавий, ҳам маърифий, ҳам моддий кўмак берилса, қанча кишининг кўнгли кўтарилишини, сизни алқашини тасаввур қилиб кўринг-а.
Бугун Тошкент шаҳар бош имом-хатиби Абдуқаҳҳор домла Юнусов бошчиликларида пойтахтимизнинг Янги ҳаёт туманидаги «Ниёзмат ота» жоме масжидида маънавий-маърифий сайёр йиғилиш ўтказилди.
Тадбирда Тошкент шаҳар бош имом-хатиби ўринбосари Эргашали домла Рустамов, Тошкент шаҳар туманлари бош имомлари, имом-домлалар, «Ҳаж 2026» иштирокчилари қатнашдилар.
Тумандаги ижтимоий-маънавий муҳитни янада соғломлаштириш мақсадида маҳаллаларга ташриф буюрилди. Адашиб ақидаси бузуқ турли оқимлар таъсирига тушиб қолган шахслар, ажрим ёқасига келиб қолган оилалар билан ҳам суҳбатлар олиб борилди.
Катта ҳаёт тажрибасига эга ҳожи оталар, ҳожи оналар имом-хатиблар, отинойилар билан биргаликда олиб борган маърифий тарғиботлари ўз самарасини берди: юздан зиёд хонадонга ҳам маънавий, ҳам моддий ёрдам кўрсатилди.
* * *
Тошкент шаҳар бош имом-хатиби Абдуқаҳҳор домла Юнусов Янги ҳаёт туманидаги маҳаллаларга ташриф буюриб, у ердаги бир қанча хонадонларга кириб, хонадон эгаларининг қалбларига хурсандчилик улашдилар.
Қувонарлиси, янги ўқув йили арафасида ҳомийларни жалб қилган ҳолда 30 та ҳақдор хонадон соҳиблари фарзандларига сумка, ўқув қуроллари ҳадя этилди.
Юздан зиёд хонадон эгаларининг кўнгли кўтарилиб, улар эзгу ишларнинг бошида турган барча азиз инсонларнинг ҳақларига хайрли дуолар қилишди.
Тошкент шаҳар вакиллиги
Матбуот хизмати
