Бухоро масжид ва мадрасалари фаолияти ўрганилмоқда
Шу йил 5 ноябрь куни Ўзбекистон мусулмонлари идораси раиси ўринбосарлари Зайниддин домла Эшонқулов ва Обид Қодиров, Идора бўлим бошлиқлари Исломиддин домла Зуҳриддинов ва Музаффар домла Камоловлар Бухоро вилоятида бўлиб, “Янги Ўзбекистоннинг тинчлик ва маънавият тарғиботчилари” ташаббуси доирасида амалга оширилаётган тарғибот ишларида иштирок этишди.
Дастлаб соҳа масъуллари Мир Араб олий ва ўрта махсус таълим муассасалари ва Жўйбори Калон аёл-қизлар ўрта махсус ислом юртида талаба-ёшлар ва профессор-ўқитувчилар билан учрашув ўтказди. Уларга Бухоро вилояти бош имом-хатиби, Мир Араб олий мадрасаси ректори Жобир домла Элов, таълим муассасалари раҳбарлари ҳамроҳлик қилдилар.
Йиғилишда диний таълимни такомиллаштириш, ёшларни соф эътиқод ва юксак маънавият руҳида тарбиялаш, илмий-тадқиқот ишларини қўллаб-қувватлаш ва малака кўникмаларини ривожлантириш масалалари муҳокама қилинди.
Шунингдек, талабалар билан очиқ мулоқотда уларнинг фикр ва таклифлари тингланди. Зайниддин домла Эшонқулов ёшларни илмга интилиш, ватанпарварлик ва ахлоқий покликка чорлади.
Сафар давомида соҳа масъуллари вилоятда фаолият юритаётган масжид имом-хатиблари ва отинойилар иштирокида йиғилиш бўлиб ўтди. Унда масжидларда диний-маърифий фаолиятни ривожлантириш, жамоатчилик билан самарали мулоқотни ташкил этиш, ёшларни соф эътиқод ва маънавий поклик руҳида тарбиялаш ҳамда имом-хатиблар ва отинойилар малакасини янада юксалтириш масалалари муҳокама қилинди.
Шунингдек, Ғиждувон туманида ўтказиладиган “Янги Ўзбекистоннинг тинчлик ва маънавият тарғиботчилари” ташаббуси доирасидаги “Сайёр қабул” бўйича амалий кўрсатмалар берилиб, ишчи гуруҳ томонидан топшириқ ва тавсиялар берилди.
Ўзбекистон мусулмонлари идораси
Бухоро вилояти вакиллиги
Матбуот хизмати
Имом-хатиблар: «Ислом цивилизацияси маркази Учинчи Ренессанс ғоясининг амалий ифодаси»
Ўзбекистонда Учинчи Ренессанс ғоясини ҳаётга татбиқ этиш, миллий ва диний меросни чуқур ўрганиш ҳамда маънавий-маърифий билимларни кенгайтиришга қаратилган ташаббуслар доирасида Фарғона, Қашқадарё ва бошқа ҳудудлардан келган имом-хатиблар Ўзбекистондаги Ислом цивилизацияси марказида бўлдилар. Улар Марказдаги музей экспозициялари, ноёб қўлёзмалар, Ренессанс даврларига бағишланган бўлимлар ва замонавий интерактив ечимлар билан танишиб, ушбу масканни илм, таълим ва маънавиятни уйғунлаштирган муҳим миллий платформа сифатида баҳоладилар, хабар бермоқда iccu.uz.
Фарғона вилояти Бувайда тумани «Катта маҳалла» масжиди имом-хатиби Раҳматуллоҳ Ғойибназаров Президент Шавкат Мирзиёев ташаббуси билан барпо этилган мазкур Марказни ёш авлод учун муҳим маърифат маскани сифатида баҳолади.
«Бу ерда Биринчи ва Иккинчи Ренессанс даврлари, буюк алломаларимиз қолдирган илмий мерос ва мамлакатимиз тараққиёти ҳақидаги экспозицияларни кўриб катта таассурот олдик. Бу ерга келган ҳар бир инсон ўз тарихини чуқурроқ англайди, ёшлар эса илмга ва ватанпарварликка янада кўпроқ интилади. Бу ерда олган билим ва таассуротларимизни халқимизга етказишни ўзимизга вазифа деб биламиз», — деди у.
Фарғона вилояти Қўштепа тумани бош имом-хатиби, «Муборак» жоме масжиди имом-хатиби Отабек Холмуродов Марказ кутубхонасида илмий изланишлар учун яратилган шароитларга эътибор қаратди.
Унинг таъкидлашича, электрон китоблар фонди, Брайл алифбосидаги адабиётлар, махсус тадқиқот хоналари ва ноёб манбаларнинг бир жойда жамлангани Марказни нафақат музей, балки кенг қамровли илмий ресурс марказига айлантирган.
«Бу кутубхона илмий изланиш билан шуғулланувчилар учун ҳақиқий билим маскани экан. Бу ерда яратилган шароитлар илм аҳлини янада кўпроқ изланишга ундайди. Биз бу имкониятлар ҳақида ёшларимизга албатта тарғибот олиб борамиз», — деди у.
Фарғона вилояти Бувайда тумани бош имом-хатиби Аҳмадхон Низомов эса Марказнинг илмий концепциясига алоҳида тўхталди.
Унинг фикрича, ҳар бир экспозиция ортида кенг кўламли тадқиқотлар ва илмий изланишлар мужассам бўлиб, бу ердаги интерактив муҳит ташриф буюрувчиларни фақат томошабин эмас, балки изланувчига айлантиради.
«Бу ерга бир марта келиб барчасини тўлиқ англаш қийин. Ҳар бир экспозиция ортида катта илмий меҳнат мужассам. Айниқса, алломаларимиз мероси, тадқиқот марказлари ва интерактив имкониятлар инсонни янада чуқур изланишга чорлайди. Бу маскан келажак авлод учун улкан маънавий бойлик ва Янги Ўзбекистоннинг илм-фан тараққиётига хизмат қиладиган муҳим пойдевордир», — деди у.
Ташриф якунида иштирокчилар Марказда жамланган бой илмий ва маданий мерос, рақамли экспозициялар ҳамда таълим имкониятларини кенг жамоатчилик, айниқса ёшлар ўртасида тарғиб қилиш Учинчи Ренессанс ғояларини ҳаётга татбиқ этиш, миллий ўзликни англаш ва илмий меросга қизиқишни янада кучайтиришга хизмат қилишини қайд этдилар.
Ўзбекистон мусулмонлари идораси Матбуот хизмати
