Ноёб қўлёзма асарларнинг электрон каталоги тузилмоқда
Олий таълим, фан ва инновациялар вазирлиги ҳузуридаги Инновацион ривожланиш агентлиги билан Имом Бухорий номидаги Тошкент ислом институти ўртасида имзоланган шартномага мувофиқ Ўзбекистон мусулмонлари идораси фондида сақланаётган асарларнинг электрон каталогини тузиш бўйича амалий тадқиқот лойиҳаси амалга оширилмоқда.
Ушбу лойиҳага Ўзбекистон мусулмонлари идораси ва Тошкент ислом институти, Ўзбекистон халқаро исломшунослик академияси, Ўзбекистон Республикаси Фанлар академияси, Абу Райҳон Беруний номидаги Шарқшунослик институти, Ўзбекистон миллий архивидаги етук илмий малака ва салоҳиятга эга бўлган 15 нафар мутахассис жалб қилинган.
2025 йилнинг 1 октябридан Ўзбекистон мусулмонлар идорасида лойиҳа доирасидаги амалий ишлар бошланди. Грант лойиҳа доирасида икки йил давомида Ўзбекистон мусулмонлар идораси кутубхонаси фондида сақланаётган 3 065 жилд асарлар мажмуасининг уч тилдаги (ўзбек, инглиз ва араб тиллари) электрон каталоги яратилади. Шунингдек, фонддаги асарларнинг электрон каталоги яратилиши билан бир қаторда бир қанча илмий ишлар ҳам бажарилиши кўзда тутилган.
Юқорида зикр этилган ишларни самарали ташкил этиш мақсадида 2025 йил 6 октябр куни Ўзбекистон мусулмонлар идорасида лойиҳа иштирокчилари иштирокида йиғилиш ўтказилди. Йиғилишда Ўзбекистон мусулмонлари идораси раиси ўринбосари Муҳаммадолим Муҳаммадсиддиқов, Кутубхона бўлими бошлиғи Камолиддин Маҳкамов, Тошкент ислом институти ректори Уйғун Ғафуров ва бошқалар иштирок этди.
Мажлисда лойиҳа доирасида амалга ошириладиган ишлар доирасида эътибор қаратилиши керак бўлган масалалар муҳокама қилинди.
10 октябр куни Имом Бухорий номидаги Тошкент ислом институтида лойиҳа доирасида семинар ташкил этилди. Унда Ўзбекистон Республикаси Фанлар академияси Абу Райҳон Беруний номидаги Шарқшунослик қўлёзмалар институти бўлим бошлиғи Ҳамидулла Лутфиллаев асарларнинг электрон каталогини тузиш жараёнида манбалар билан ишлашда мутахассис эътибор қаратиши лозим бўлган жиҳатлар борасида иштирокчиларга маъруза қилиб берди. Шунингдек, мутахассислар ўзаро фикр алмашишди.
Жорий йилнинг 14 октябридан эътиборан лойиҳага жалб этилган мутахассислар Ўзбекистон мусулмонлари идораси фондида сақланаётган манбалар каталогини тузиш бўйича амалий ишларни бошлаб юборишган.
Ўзбекистон мусулмонлари идораси
Матбуот хизмати
Виртуал таҳдид: кибержиноятчилардан огоҳ бўлинг!
Бугун, 3 августь куни Ўзбекистон мусулмонлари идорасида “Кибержиноятчилик: замонавий жамиятнинг янги таҳдиди” мавзусида онлайн йиғилиш ўтказилди.
Унда Диний идора Ҳуқуқшунослик бўлими бошлиғи Жаҳонгир Ҳотамов сўзлаб, иштирокчилар эътиборини бугунги кунда долзарб муаммога айланиб бораётган кибержиноятлар кўламига қаратди.
Расмий маълумотларга кўра, ўтган йили Тошкентда кибержиноятлар сони 16 мингдан ортган. Фуқаролар қарийб 2 триллион сўм моддий зарар кўрган бўлса-да, уларни фош этиш 8 фоизга ҳам етмаган.
Ушбу жиноятларга кескин барҳам бериш ва олдини олиш учун 2026 йил 10 март куни “Ўзбекистон Республикасининг Киберхавфсизлик стратегиясини белгилаш ва кибержиноятчиликнинг олдини олиш тизимини такомиллаштириш тўғрисида” Президент Фармони қабул қилинди. Фармон асосида Ўзбекистон Республикасининг 2026 – 2030 йилларга мўлжалланган киберхавфсизлик стратегияси қабул қилинди.
Юқоридаги каби салбий холатларнинг олдини олишда аҳолининг ҳуқуқий саводхонлигини ошириш муҳим ҳисобланади. Шу мақсадда Диний идора бош юристи Алишер Агзамов Кибержиноятчиликнинг пайдо бўлиш тарихи, асосий турлари, кибержиноятга дуч келган киши нима қилиши кераклиги, киберхавфсизликнинг оддий қоидалари ҳақида тушунчалар бериб ўтди.
Ўзбекистон мусулмонлари идораси
Матбуот хизмати
