Шу йилнинг 24–28 ноябрь кунлари Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги делегация Иордания Ҳошимийлар Подшоҳлигида диний-маърифий соҳадаги ҳамкорликни ривожлантириш бўйича хизмат сафарида бўлади.
Ўзбекистон делегацияси Иордания бош муфтийси ва Фатво маркази раҳбари Аҳмад Ҳасанот ҳазратлари, Вақф, ислом ишлари ва муқаддас қадамжолар вазири Муҳаммад Халояла жаноблари, Подшоҳ Абдуллоҳ II номидаги Имомлар тайёрлаш ва малакасини ошириш институти раҳбари доктор Абдусаттор Қудо, Иордания халқаро ислом илмлари университети раҳбарияти ва бир қатор соҳага дахлдор мутасаддилар билан икки томонлама музокаралар ўтказиши режалаштирилган.
Сафар давомида қуйидаги вазифалар амалга оширилади:
- меморандумлар ва қўшма дастурларда белгиланган вазифаларни амалиётга жорий этиш;
- Иордания Фатво маркази ва Ўзбекистон мусулмонлари идораси Фатво маркази ўртасида ҳамкорликни йўлга қўйиш ва шаръий масалаларга жавоблар тайёрлаш юзасидан мулоқотлар қилиш;
- Подшоҳ Абдуллоҳ II номидаги Имомлар тайёрлаш ва малакасини ошириш маркази ва шу каби касб-маҳоратни ошириш курсларида диний соҳа ходимлари сонини ошириш;
- иорданиялик олимлар асарларини ўзбек тилига таржима қилиш;
- илмий марказлар, таълим муассасалари билан алоқаларни йўлга қўйиш, устоз ва талабалар алмашинувини муҳокама қилиш;
- Иорданиянинг вақф мулкчилиги, масжидларни бошқариш, қадамжоларни сақлаш тажрибасини ўрганиш ва ўзаро зиёрат туризмини ривожлантириш;
- бошқа соҳага дахлдор мутасадди идоралар билан ҳамкорлик масалаларини йўлга қўйиш.
Ўзбекистон мусулмонлари идораси Матбуот хизмати
“Sayidaty”: Ўзбекистон — бой тарих, ҳайратланарли меъморчилик ва бетакрор маданият диёри
Саудия Арабистонининг “Sayidaty” онлайн-журналида Ўзбекистоннинг туристик салоҳиятига бағишланган мақола чоп этилди, деб хабар бермоқда “Дунё” АА.
Нашрда қайд этилишича, Ўзбекистон бой тарих, ҳайратланарли меъморчилик ва бетакрор маданиятга эга йўналиш ҳисобланади. Марказий Осиёда жойлашган ушбу мамлакат Буюк ипак йўлида гуллаб-яшнаган қадимий шаҳарлари, гўзал табиий манзаралари ва меҳмондўст халқи билан машҳур. Сайёҳларнинг қизиқишларидан қатъи назар — тарих ёки табиат бўладими мамлакат бой ва ранг-баранг таассуротлар улашувчи кўплаб диққатга сазовор жойларни таклиф этади.
Нашр ташриф буюриш тавсия этиладиган асосий масканлар ва тадбирлар қаторида Самарқанддаги Регистон майдонини алоҳида ажратиб кўрсатган. Кошинлар ва ёрқин кўк плиткалар билан безатилган учта тарихий мадрасани ўз ичига олган ушбу меъморий дурдонада меҳмонлар шаҳар манзарасини томоша қилиш учун юқори айвонларга кўтарилишлари, кечқурун эса ёруғлик шоусидан баҳраманд бўлишлари мумкин.
Бухорода эса археологик артефактлар музейи ва шаҳар манзараси очиладиган Бухоро амирларининг собиқ қароргоҳи — Арк қалъасига ҳамда ўймакор ёғоч устунли ва осойишта ҳовузли Болоҳавз масжидига алоҳида эътибор қаратилган.
Бундан ташқари, йўл кўрсаткичда ЮНЕСКОнинг Бутунжаҳон мероси рўйхатига киритилган Хивадаги Ичан-Қалъа ички шаҳрининг тор кўчалари бўйлаб сайр қилиш ва ҳар бир бекати бетакрор қандиллар ва мозаикалар билан безатилган Тошкент метрополитенига ташриф буюриш таклиф қилинади. Маҳаллий маданият ва гастрономия билан танишиш учун сайёҳларга Тошкентдаги Чорсу бозори тавсия этилади, у ерда анъанавий паловни татиб кўриш, гилам ва сопол буюмлар каби қўл маҳсулотларини сотиб олиш ҳамда маҳаллий сотувчилар билан мулоқот қилиш мумкин.
Ўзбекистон мусулмонлари идораси Матбуот хизмати