Бугун, 8 декабрь куни Макка шаҳридаги “Мармара” меҳмонхонасида Бош қомусимиз Ўзбекистон Республикаси Конституциясининг 33 йиллиги муносабати билан айни кунларда Маккаи мукаррамада тоату ибодатлар билан бўлиб турган 240 нафардан зиёд зиёратчиларимиз учун байрам тадбири ташкил этилди.
Унда Жидда шаҳридаги бош консул Сирожиддин Шамсуддинов, “Ҳаж” ва “Умра” бўйича атташе Шуҳрат Амоний, Ўзбекистон мусулмонлари идораси ҳамда Дин ишлари бўйича қўмитаси Ишчи гуруҳ вакиллари иштирок этди.
Мутасадди вакилларимиз умра сафарида бўлиб турган ҳамюртларимизни қомусимиз қабул қилинган кун билан муборакбод этиб, юртимизда сўнгги йилларда бўй кўрсатаётган кенг кўламли ислоҳотлар, эркинлик неъмати, уни асраб-авайлаш ва қадрлаш барча юрт фарзандларининг бурчи эканини алоҳида таъкидлаб ўтишди.
Маънавий-маърифий учрашувда кейинги йилларда барча соҳалар қатори диний-маърифий соҳада ҳам улкан ўзгаришлар рўй бергани, жумладан, умра зиёрати бир неча юз минг нафарга, Ҳаж квотаси эса 15 минг нафаргача оширилгани, уларга хизмат кўрсатиш, мавжуд шароитлар ҳавас қиладиган даражага кўтарилгани, бунга ҳозирда умра амалини адо этаётган ҳамюртларимиз бевосита гувоҳ бўлаётгани қайд этилди.
Тадбирда иштирокчиларни яхши тилак ва дуолар билан қутлаш баробарида байрам ширинликлари ҳам улашилди. Кўтарингки ва самимий руҳда ўтган тадбир зиёратчиларда катта таассурот қолдирди.
Аллоҳ таоло юртимизни тинч ва фаровон, халқимизни хотиржам ва бахтиёр айласин!
Ўзбекистон мусулмонлари идораси Матбуот хизмати
Янги тайинланган имомлар учун семинар бўлиб ўтди
#xabar #seminar #imom #malaka
Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ташаббуслари билан диний соҳа ходимларининг касбий салоҳиятини ошириш, фаолият самарадорлигини юксалтириш ва қатъий тартиб-интизомни таъминлаш мақсадида тизимли чора-тадбирлар амалга оширилмоқда.
Шу мақсадда жорий йилнинг 29–30 сентябрь кунлари Диний идоранинг Масжидлар билан ишлаш ҳамда Кадрлар бўлимлари ҳамкорлигида республикамиз бўйича янги лавозимга тайинланган 59 нафар имом-хатиб ва имом ноиблари учун икки кунлик махсус ўқув-семинари ташкил этилди.
Машғулотлар давомида Ўзбекистон мусулмонлари идораси раиси ўринбосари Зайниддин домла Эшонқулов, Кадрлар бўлими бошлиғи Салоҳиддин Шарипов, Масжидлар билан ишлаш бўлими мудири Музаффар Камолов, Ички назорат бўлими ходими Умиджон Ходжаев ҳамда Фатво маркази бош мутахассиси Ҳикматуллоҳ домла ўз йўналишлари бўйича долзарб маърузалар билан иштирок этдилар.
Икки кунлик ўқув давомида соҳа мутасаддилари томонидан кундалик хизмат жараёнида зарур бўладиган муҳим тавсиялар, меҳнат муносабатлари, ички тартиб ва одоб-ахлоқ қоидаларига қатъий риоя этиш масалалари тушунтирилди. Шунингдек, имом-хатиблар фаолияти самарадорлигини баҳолаш (KPI) тизимини тўғри юритиш ва унинг тартиботлари, шаръий масалаларда фатво бериш масъулияти ҳамда фатво бериш ҳуқуқига доир муҳим йўналишлар бўйича зарур амалий кўникма ва насиҳатлар берилди.
Ўзбекистон мусулмонлари идораси
Матбуот хизмати
