Фарғонада ҳақдор оилаларга хайриялар етказилди
Фарғона вилоятида «Вақф» хайрия жамоат фондининг вилоят филиали томонидан икки юзга яқин эҳтиёжманд оилалар учун хайрия тадбирлари ташкил этилди. Бу жараёнда кам таъминланган оилаларга кўмир, иссиқ кийим-кечак, пойабзал, электр иситгичлар, озиқ-овқат маҳсулотлари ва уй-рўзғор учун маиший техникалар тақдим этилди. Шунингдек, ҳомийларимиз томонидан боқувчиси йўқ оилаларда вояга етаётган болажонларга тўкин дастурхон ёзилиб, кабобхўрлик ташкил этилди.
Қиш мавсумида янги полиз маҳсулотлари ва сархил мевалар, иссиқ кийимлар, айниқса совуқ кунларда асқатадиган кўмир билан эҳтиёжманд оилаларга илиқлик улашган, уларни хурсанд қилган барча ҳомийлардан, саховатпеша фуқароларимиздан Аллоҳ рози бўлсин.
Хайрия тадбирларининг юқори ташкилотчилик ва меҳр-мурувват билан ўтказилишига ўз ҳиссасини қўшган барча иштирокчилар, кўнгиллиларни Ўзи улкан ажр-савоблар билан мукофотласин!
Vaqf.uz
“Arab Tourist”: Самарқанд, Бухоро ва Хива — ислом цивилизацияси ва жаҳон маданий меросининг бебаҳо дурдоналари
Саудия Арабистонининг туризм ва саёҳатларга ихтисослашган “Arab Tourist” электрон нашрида “Марказий Осиёнинг қоқ марказида жойлашган ва Буюк ипак йўли билан боғланган мамлакат” сарлавҳали таҳлилий мақола эълон қилинди, деб хабар бермоқда “Дунё” АА.
Мақолада Буюк ипак йўли тарихида ўзбек шаҳарларининг тутган ўрни алоҳида эътироф этилади. Хусусан, Самарқанд, Бухоро ва Хива каби тарихий шаҳарлар асрлар давомида Шарқ ва Ғарб ўртасидаги савдо, фан ва маданият марказлари сифатида хизмат қилгани таъкидланади. Регистон майдони, Ичан-қалъа ва Бухородаги меъморий обидалар ислом цивилизацияси ҳамда жаҳон маданий меросининг бебаҳо дурдоналари сифатида тилга олинади.
Бундан ташқари, нашр Ўзбекистоннинг ранг-баранг табиати ва географик рельефига тўхталиб ўтган. Қизилқум чўли, серҳосил Фарғона водийси, Тянь-Шань ва Помир-Олой тоғ тизмалари аҳоли жойлашуви ва қишлоқ хўжалиги ривожида муҳим ўрин тутиши қайд этилади.
Нашр, шунингдек, Буюк Мирзо Улуғбек каби донишмандларнинг астрономия ва математика соҳасидаги буюк кашфиётларини алоҳида эътироф этган.
Хулосада таъкидланганидек, Тошкент, Самарқанд, Бухоро, Наманган ва Андижон каби шаҳарлар бугунги кунда нафақат маъмурий ва иқтисодий, балки жадал ривожланаётган йирик маданий-туристик марказлар сифатида дунё сайёҳлари эътиборини ўзига жалб этмоқда.
Ўзбекистон мусулмонлари идораси Матбуот хизмати