11 Апрел, 2026, 22 Шаввол, 1447
11 Апрел, 2026, 22 Шаввол, 1447
Бугунги кунда аксарият ёшлар осон даромад топиш илинжида “трейдинг” (молиявий акциялар, валюта, товарлар билан фаол савдо қилиш, фойда олиш) соҳасига қизиқишмоқда. Улар: “Телефон ёки компьютер олдида бир неча соат ўтириб, катта даромад олиш мумкин”, деган сохта хабарларга ишониб қолишяпти.
Албатта, ижтимоий тармоқларда “бир ойда 10 баробар бойиган” ёки “кунига 500 доллар топадиган” “трейдерлар” ҳақидаги видеолар кўп учрайди. Лекин шуни унутмаслик керакки, ушбу роликларнинг аксарияти маркетинг мақсадида яратилади. Мақсад – ёшлар ўртасида тез бойиш ҳақида нотўғри тасаввурни пайдо қилиш.
Энди ўзингиз бир ўйлаб кўринг, агар кимдир осон пул топаётган бўлса, нега у вақт сарфлаб “пуллик дарслар” ўтказади? Нега “саноқли жой қолди, чегирма нархида улгуриб қолинг!” деган эълонлар тарқатади? Аслида буларнинг барчаси гуруҳларга кўпроқ одам тўплаш ва улар орқали даромад олиш мақсадида қилинади.
Аллоҳ таоло Қуръони каримда бундай марҳамат қилади: “Ўлчов ва вазнни адолат билан тўла берингиз! Одамларнинг Ҳалол меҳнат қадри нарсаларини уриб қолмангиз…” (Ҳуд сураси, 85-оят).
Ушбу ояти карима инсонни ҳар қандай иқтисодий ёки тижорат ишларида ҳалол бўлишга чақиради. Афсуски, ёшлар қизиқаётган трейдинг фаолияти эса мазкур тамойилга умуман мос келмайди.
Аксарият ёшлар билан суҳбатлашсангиз, улар бундай жавоб беришади: “YouTube’да кўрдим, ишим тўғри экан”. Интернетдаги кўплаб видео-материаллар маълум бир тоифа манфаати йўлида тайёрланишини ёки таржима қилинишини унутмаслик керак. Шунинг учун бундай маълумотларга ишониб кетавериш ярамайди.
Бир қўшнимизнинг ўғли тўрт йил Туркияда меҳнат қилди. Ишдан бўш вақтларида трейдинг билан қизиқиб, дастлаб анча пул ишлаган. Бир муддат ўзини бой ҳис этган. Сўнг маълум муддат ўтгач, барча маблағини шу соҳага сарфлаб, ҳаммасидан айрилади. Эътибор беринг-а, у тўрт йил меҳнат қилиб топган пулини бир неча соат ичида йўқ қилди.
Шундай экан, умримиз, меҳнатимиз ва қўлга киритган мол-мулкимизни асраб-авайлашимиз, яхши кунларимизга ишлатишимиз лозим. Зеро, ҳақиқий бойлик – билим ва меҳнат ортидан келган бойликдир. Халқимиз: “Меҳнатдан келса бойлик, турмуш бўлар чиройлик”, деб бежиз айтмаган. Ҳалол меҳнат орқали топилган ризқ баракали бўлади. Пайғамбаримиз Муҳаммад соллаллоҳу алайҳи ва саллам бундай марҳамат қилганлар: “Қиёмат кунида банданинг қадами то тўрт нарсадан сўралмагунча жойидан жилмайди: умрини қандай ўтказгани, ёшлигида нима қилгани, молини қаердан топиб, нимага сарфлагани, илмига қай даражада амал қилгани ҳақида” (Имом Термизий ривояти).
Шунинг учун ҳар қандай тижорат ёки молиявий фаолиятни бошлашдан олдин ишимизнинг шариатга мослигини аниқлаб олишимиз лозим. Бу борада юртимиз уламоларидан, масжидларнинг имомларидан маслаҳат сўраш – энг тўғри йўлдир. Аллоҳ таоло барчамизни тўғри йўлдан адаштирмасин, ризқимизни ҳалол ва баракали қилсин!
Ҳусниддин САДРИДДИНОВ
“Ислом нури” газетасининг 2025 йил 23-сонидан
Ислом цивилизацияси марказида нуфузли халқаро анжуман доирасида тарихий ва маданий аҳамиятга эга воқеа юз берди. ТУРКСОЙ томонидан Марказнинг Ислом цивилизацияси маркази “Туркий дунёдаги энг яхши музей” деб эътироф этилди. Сертификат ТУРКСОЙ бош котиби Султон Раев томонидан тантанали равишда тақдим этилди. Бу эътироф Марказнинг қисқа вақт ичида халқаро майдонда юқори баҳоланаётганидан далолат беради.
Шунингдек, ТУРКСОЙ номидан Шавкат Мирзиёев ташаббуси билан чоп этилган “Турк дунёси адабиёти дурдоналари” 100 жилдлик китоблар тўплами ҳам сертификатга сазовор бўлди. Бу каби кенг қамровли нашр турк дунёсида илк бор амалга оширилди ва “дунёдаги энг яхши адабий лойиҳа” сифатида эътироф этилди.
— Бугун биз ТУРКСОЙ халқаро ташкилоти номидан учта сертификат тақдим этдик. Биринчи сертификатимиз Ўзбекистон Президенти Шавкат Мирзиёев ташаббуси билан чоп этилган “Турк дунёси адабиёти дурдоналари” номли 100 жилдлик китоблар тўпламига берилди. Таъкидлаш жоизки, бу каби кенг қамровли 100 жилдлик нашр ҳозиргача турк дунёсида амалга оширилмаган. Бу, албатта, Ўзбекистоннинг катта ташаббуси бўлди. Бугунги кунда Қозоғистон, Озарбайжон ва Қирғизистон каби давлатлар ҳам ушбу ташаббусни қўллаб-қувватлаб, турли ҳажмдаги — 20, 30, 40, 50 жилдлик китоблар нашр этмоқда. Шунинг учун биз ушбу тўпламни турк дунёсидаги ўзига хос адабий дурдона сифатида эътироф этиб, “дунёдаги энг яхши адабий лойиҳа” деб баҳолаб, сертификат тақдим этдик. Иккинчи сертификат эса Ислом цивилизацияси марказига “Туркий дунёдаги энг яхши музей” номинацияси бўйича берилди. Буни ТУРКСОЙ нинг юксак эътирофи, деб айтиш мумкин. Шунингдек, мазкур музей ТУРКСОЙнинг Турк дунёси музейлари ассоциациясига ҳам қабул қилинди, - деди ТУРКСОЙ бош котиби Султон Раев.
Анжуманда Туркия, Франция, Италия, Германия, АҚШ, Буюк Британия, Россия, Хитой, Ҳиндистон, Эрон ва Қозоғистондан келган етакчи олимлар иштирок этди. Улар Темурийлар даври тарихи, сиёсий тизими, шаҳарсозлик анъаналари, илм-фан ва маданият ривожи бўйича ўз тадқиқот натижаларини тақдим этдилар.
– ТУРКСОЙнинг бу эътирофи ҳурматли Президентимиз ташаббуслари билан қурилган марказимизга берилган муносиб баҳо бўлди деб ўйлайман. Халқаро туркий маданият ташкилоти – ТУРКСОЙ Ислом цивилизацияси марказининг доимий ва ишончли ҳамкорларидан бири. Биз бу ташкилот билан узоқ вақтдан бери ҳамкорлик қилиб келамиз. Жорий йилда ҳам ТУРКСОЙ билан ҳамкорликда халқаро ёшлар форуми, туркий давлатлар ҳунармандлари фествали сингари бир қатор тадбирларни ўтказишга келишиб олдик, - деди марказ директори Фирдавс Абдухолиқов.
Хорижий иштирокчилар ҳам Темурийлар меросининг глобал аҳамияти, Европа ва Осиё цивилизациялари ўртасидаги маданий алоқалардаги ўрни ва халқаро илмий ҳамкорликдаги аҳамиятини алоҳида таъкидладилар.
Туркий дунёдаги энг яхши музей ва дунёдаги энг яхши адабий лойиҳа сифатида эътироф этилган ушбу Марказ ва нашрлар, Ўзбекистоннинг маданий ва маънавий ривожланишидаги катта ютуқ сифатида тарихда қолади.
iccu.uz
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 