Халқимиз орасида меҳр-оқибат, саховат ва инсон қадрини улуғлаш каби эзгу қадриятлар азалдан мустаҳкам ўрин эгаллаб келади. Ана шу олийжаноб фазилатларни ҳаётга татбиқ этиш мақсадида жорий йилнинг 23 июнь куни Самарқанд вилояти Тойлоқ туманида кенг қамровли сайёр учрашувлар ўтказилди.
 

Тадбирда Самарқанд вилояти бош имом-хатиби ўринбосари Хайрулло домла Саттаров, шаҳар ва туман бош имом-хатиблари, «Ҳаж–2026» зиёратчилари, маҳалла фаоллари ҳамда нуронийлар иштирок этдилар.

Хонадонларга ташриф ва моддий кўмак

Диний соҳа ходимлари туманда яшовчи кам таъминланган, боқувчисини йўқотган ва ижтимоий ҳимояга муҳтож оилалар хонадонига ташриф буюрдилар. Беморларнинг ҳолидан хабар олиниб, уларга моддий ва маънавий ёрдам кўрсатилди, ҳақларига шифо тилаб дуолар қилинди.

Маълумот учун: Ислом таълимотида бемор кўриш ва муҳтожлар қалбига қувонч улашиш энг савобли амаллардан саналади.

Саховатпеша инсонлар кўмагида янги уйлар

Сайёр йиғилиш давомида дин уламолари Найман маҳалласида саховатпеша ҳомийлар кўмагида қад ростлаётган янги хонадон қурилиши билан танишдилар.

• Биринчи хонадон: Боқувчисини йўқотган оила учун барпо этилмоқда.

• Иккинчи хонадон: Яқинда содир бўлган ёнғин оқибатида уй-жойидан ажралган яна бир оилага қуриб бериляпти.

Уламолар ушбу хайрли ишларнинг баракасини тилаб дуолар қилдилар ва оилаларга ҳадялар топширдилар.

Маънавий-маърифий суҳбатлар

Тадбир давомида адашган ва ёт ғоялар таъсирига тушиб қолган айрим фуқаролар билан якка тартибда суҳбатлар ўтказилди. Уларга оила муқаддаслиги, фарзанд тарбияси, ҳалол меҳнат, ватанга муҳаббат ва жамият олдидаги масъулият ҳаётий мисоллар билан тушунтирилди. Бу самимий мулоқотлар уларнинг қалбида келажакка ишонч уйғотишга хизмат қилди.

Масжидлардаги тарбиявий маърузалар

Пешин намозидан сўнг тумандаги барча жоме масжидларида тарбиявий маърузалар ташкил этилди. Имом-хатиблар жамиятда соғлом муҳитни қарор топтириш, бағрикенглик ва ўзаро ҳурмат мавзуларида маъруза қилдилар.

Якунда юртимиз тинчлиги, халқимиз фаровонлиги ҳамда ёшларимизнинг камолоти учун хайрли дуолар қилинди.

Самарқанд вилояти вакиллиги

Матбуот хизмати