Дунёдаги энг бахтли аёл: Атиргуллар
Бисмиллаҳир Роҳманир Роҳийм
Биринчи атиргул: Эсланг, Роббингиз истиғфор айтганларни кечиради ва тавба қилганларнинг тавлабаларини қабул қилади.
Иккинчи атиргул: Заифларга раҳм қилинг бахтли бўласиз, муҳтожларга ёрдам беринг орзуларингиз амалга ошади ва ғазаб ортидан эргашманг омонда бўласиз.
Учинчи атиргул: Яхшилик умидида бўлинг, Аллоҳ сиз билан. Фаришталар сизга истиғфор айтмоқда ва жаннат сизни кутмоқда.
Тўртинчи атиргул: Роббингиз хусусида чиройли гумон қилиб кўз ёшларингизни артинг ва Аллоҳ сизга берган неъматларни эслаб, ғамларингизни қувғин қилинг.
Бешинчи атиргул: Дунё бирор киши учун мукаммал бўлмаган. Ер юзида бирор киши барча хоҳлаган нарсасига эришиб, ҳар қандай ғам-ташвиш уни четлаб ўтган деб ўйламанг.
Олтинчи атиргул: Худди хурмо дарахти каби ҳиммати олий, азиятлардан йироқ ва тош отилса мевалари тўкиладиган бўлинг.
Еттинчи атиргул: Маҳзунлик ўтган нарсани қайтаришини ва ғам чекиш хатони тўғирлашини эшитганмисиз? Шундай экан, маҳзунлик ва хафаликнинг нима кераги бор?!
Саккизинчи атиргул: Қийинчилик ва синовларни кутманг, омонлик, саломатлик ва офиятни кутинг. Иншааллоҳ у келади.
Тўққизинчи атиргул: Сизга ёмонлик қилганларга афв эълон қилиб, қалбингиздаги барча адоват ва нафратни ўчириб ташланг.
Ўнинчи атиргул: Ғусл, таҳорат, хушбўйлик, мисвок қилиш ва тартиб барча хафалик ва сиқилишни енгувчи малҳамдир.
Доктор Оиз Қарнийнинг
"Дунёдаги энг бахтли аёл" китобидан
Нуфузли анжуман Озарбайжоннинг Ағдам шаҳрида якунланди
Озарбайжонда бўлиб ўтган Саййид Яҳё Бокувийнинг бой маънавий меросига бағишланган халқаро илмий-амалий конференциянинг ёпилиш маросими рамзий маънога эга бўлган тарихий Ағдам шаҳрида ўтказилди. Унда туркий давлатлар, араб-мусулмон мамлакатлари диний пешволари, уламолар ва соҳа мутахассислари иштирок этди.
Тадбирда сўзга чиққан Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бугунги мураккаб даврда тинчлик ва ҳурлик энг бебаҳо неъмат эканини алоҳида таъкидлаб, уммат бирлиги, ҳамжиҳатлик ва диний-маърифий алоқаларни мустаҳкамлаш заруратига тўхталдилар. Шунингдек, давлат Раҳбарлари ўртасидаги самимий биродарлик ва олий даражадаги ўзаро ташрифлар халқларимиз тарихида янги саҳифа очганини эътироф этдилар.
Йиғилишда Кавказ мусулмонлари идораси раиси, Шайхулислом Оллоҳшукур Пошшозода ҳам сўзга чиқиб, яқинда бўлиб ўтган Озарбайжон етакчисининг Ўзбекистонга тарихий ташрифи ва имзоланган "Абадий дўстлик шартномаси" қардошлик муносабатларимизни янги босқичга олиб чиққанини таъкидлади.
Анжуман якунида Шайхулислом Оллоҳшукур Пошшозода жанобларининг таклифига биноан Ўзбекистон мусулмонлари идораси раиси, муфтий Шайх Нуриддин Холиқназар ҳазратлари йиғилганлар ва бутун ислом уммати ҳаққига хайрли дуолар қилдилар. Муфтий ҳазратлари ўз дуоларида эл-юртларимиз тинчлиги, мамлакатларимиз фаровонлиги ҳамда анжуманда кўтарилган муҳим масалалар мусулмонлар ва бутун уммат манфаати учун хизмат қилишини Ҳақ таолодан сўрадилар.
Ўзбекистон мусулмонлари идораси Матбуот хизмати
