#xabar #musobaqa #final
Узоқ кутилган финал ўйини бўлиб ўтди. “Ўзбекистон мусулмонлари идораси кубоги” волейбол мусобақаси якуний учрашувида Қорақалпоғистон мусулмонлари қозиёти ва Қашқадарё вакиллиги жамоалари ўзаро беллашди. Икки жамоа ҳам ушбу мусобақага жиддий тайёргарлик кўриб келишгани яққол сезилиб турди.
Финал ўйинини таниқли футбол шарҳловчиси Мирзаҳаким Тўхтамирзаев шарҳлаб борди.
Муросасиз кечган ўйинни спорт шайдолари олқишлар ила кузатиб боришди. Унда Қашқадарё вилояти вакиллиги жамоаси 2:0 ҳисобида устун келишди. Шундай қилиб, мусобақа якунига кўра:
1-ўрин: Қашқадарё вилояти вакиллиги жамоаси.
2-ўрин: Қорақалпоғистон мусулмонлари қозиёти жамоаси.
3-ўрин: Навоий вилояти вакиллиги жамоасига насиб этди.
Мусобақадан сўнг тақдирлаш маросими бўлиб ўтди. Унда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Ўзбекистон Республикаси Спорт вазири маслаҳатчиси Шарифжон Мўминжонов, Ўзбекистон волейбол федерацияси бош котиби Фарҳод Алимов, Дин ишлари бўйича қўмита бошқарма бошлиғи Муҳиддин Ҳакимов ва бир қатор мутасаддилар бош кубокни финал ўйини ғолиби Қашқадарё вилояти жамоасига тантанали тарзда топширдилар.
Шунингдек, ғолиб жамоа аъзоларининг ҳар бирига биринчи ўрин медали ва ноутбук тақдим этилди.
Қорақалпоғистон жамоасига эса иккинчи ўрин медали ва замонавий телевизор, Навоий жамоасига учинчи ўрин медали ва планшет топширилди.
Шунингдек, спортнинг волейбол ва шахмат турлари бўйича ўтказилган "Ўзбекистон мусулмонлари идораси кубоги" мусобақаларининг энг яхши уйинчиси номинацияси ғолиби деб Наманган вилояти вакиллиги жамоаси таркибида ўйнаган Мухторжон домла Юнусов топилди. Унга диплом ва умра йўлланмаси тақдим этилди.
Аллоҳ таоло ғолиб жамоаларга мукофотларни муборак айласин, дўстлик ва ҳамжиҳатликка хизмат қилувчи бундай мусобақалар давомли бўлсин!
Ўзбекистон мусулмонлари идораси
Матбуот хизмати
“The Diplomatic Insight”: Мустақил Ўзбекистоннинг ютуқлари халқаро ҳамжамиятнинг диққат марказида бўлиб келмоқда
Покистоннинг “The Diplomatic Insight” журнали навбатдаги сонида Ўзбекистон ҳаётига доир туркум мақолалар эълон қилинди, деб хабар бермоқда “Дунё” АА.
Хусусан, журнал саҳифаларидан Ўзбекистоннинг замонавий тараққиёти, мамлакатимизнинг халқаро нуфузи, тарихий-маданий меросини кенг тарғиб этиш борасида амалга оширилаётган ишларга бағишланган мақолалар ўрин олган.
Президент Шавкат Мирзиёевнинг Ўзбекистон мустақиллигининг ўттиз беш йиллигига бағишланган тантанали маросимдаги нутқи ва Янги Тошкент шаҳрида ўтказилган тантанали тадбирга бағишланган мақолалар журналнинг бош саҳифаларидан ўрин олган.
Материалларда мамлакатимиз тараққиётининг янги босқичи, пойтахтнинг замонавий қиёфасини шакллантириш, Янги Тошкентни замонавий, инновацион ва инсон учун қулай шаҳар сифатида барпо этиш борасидаги кенг кўламли ишларга эътибор қаратилган.
Журналда 25–29 август кунлари Тошкент ва Самарқанд шаҳарларида ўтказилган “Ислом цивилизацияси маркази: янги нигоҳ, янги кашфиётлар” мавзусидаги халқаро медиафорумда иштирок этган “The Diplomatic Insight” бош муҳаррири Асиф Нур қаламига мансуб мақолалар ҳам ёритилган.
Уларда ислом цивилизациясининг жаҳон тарихи ва маданиятидаги ўрни, унинг илмий-маърифий меросини ўрганиш ва кенг жамоатчиликка етказишда оммавий ахборот воситаларининг роли ҳақида сўз юритилади.
Айниқса, Ўзбекистон заминида етишиб чиққан буюк алломалар ва мутафаккирларнинг илмий меросини халқаро миқёсда тарғиб қилиш, маданий-гуманитар ҳамкорликни янада ривожлантириш масалаларига урғу берилган.
Мазкур материаллар Ўзбекистоннинг тарихий-маданий мероси ва бугунги ислоҳотларини халқаро аудиторияга етказишда медиа дипломатиясининг аҳамиятини кўрсатиб беради. Хусусан, ислом цивилизациясига оид илмий ва маданий меросни холис ҳамда замонавий ахборот воситалари орқали ёритиш халқлар ўртасида ўзаро англашув ва ҳурматни мустаҳкамлашга хизмат қилиши қайд этилади.
Ўзбекистон мусулмонлари идораси Матбуот хизмати