Қадим ва навқирон Самарқанд шаҳрида ўтказилган 46-Бутунжаҳон шахмат олимпиадаси мамлакатимиз спорти солномасига олтин ҳарфлар билан муҳрланди. Дунёнинг 200 дан ортиқ давлатидан 2 мингга яқин гроссмейстер ва жамоалар иштирок этган нуфузли ақл-заковат беллашувида Ўзбекистон эркаклар терма жамоаси тенгсиз сабот ва маҳорат кўрсатиб, 20 очко билан бош совринни қўлга киритди ҳамда икки карра Бутунжаҳон шахмат олимпиадаси чемпиони деган юксак шарафга сазовор бўлди.

Мусобақа якунларига кўра, эркаклар йўналишида Ҳиндистон кумуш (18 очко), Германия бронза (18 очко) медалига эга чиқди. Аёллар терма жамоамиз 15 очко жамғариб, 13-ўринни банд этган бўлса, матонатли парашахматчиларимиз олимпиада тарихида илк бор бронза медалларини қўлга киритишди.

Олимпиада давомида шахматчиларимиз шахсий кўрсаткичларда ҳам ёрқин натижаларга эришди:

Нодирбек Абдусатторов 1-тахтада мағлубиятсиз дона суриб, олтин медаль соҳибига айланди;

Нодирбек Ёқуббоев энг масъулиятли партияларда ғалаба қозониб, рейтингини +26,7 очкога оширди ҳамда дунёнинг энг кучли гроссмейстерлари орасида энг юқори ўсишни кўрсатди;

Жавоҳир Синдоров илк бор таъсис этилган «ФИДЕ Excellence Awards 2026» доирасида «Энг яхши эркак шахматчи» деб эътироф этилди;

Муҳиддин Мадаминов ва Шамсиддин Воҳидов жамоавий ғалабага муносиб ҳисса қўшди;

Ўзбекистон шахмат федерацияси эса ФИДЕ томонидан «Энг яхши федерация» деб топилди.

Президент Шавкат Мирзиёев терма жамоа аъзолари, устоз ва мураббийларни ушбу оламшумул тарихий ғалаба билан самимий муборакбод этиб, ёшларимиз буюк аждодларимизга муносиб ворис эканини таъкидлади ҳамда ғолиб ва совриндорларни юксак давлат мукофотлари билан тақдирлади.

Пойтахтимизда катта тантана ва эҳтиром билан кутиб олинган шахматчиларимизнинг ушбу муваффақияти янги Ўзбекистон ёшлари учун чинакам ибрат ва ғурур тимсолига айланди.

Ўзбекистон мусулмонлари идораси 
Матбуот хизмати