Илоҳий муҳаббат жазбаси
Бисмиллаҳир Роҳманир Роҳийм
Инсон зотида яратилиш эътибори билан нуқсонлар жуда кўпдир. Лекин унда ажойиб бир жазба яшайди. Агар унинг жазбаси жўш ўрса, ундаги заифлик қувватга, жаҳли эса илмга ўзгаради. Камчиликлари мукаммалликка айланади.
Шунда у инсон жаннатга ҳақли бўлади. Бу жазбанинг номи “Илоҳий ишқ” дейилади. Бу худди ниҳолнинг тагидаги сув кабидир. Агар сув бўлмаса, дарахт ям-яшил бўлиб кўкармайди. Унинг тагида сув бўлсагина гуллайди, мева беради. Инсондаги илоҳий ишқ ҳам дарахтнинг суви кабидир. Агар инсонда илоҳий муҳаббат бўлса, унинг имони гуллай бошлайди ва ундан мўминлик ифори таралади ва ён-атрофни ҳам ўраб олади.
Шайх Зулфиқор Аҳмад Нақшбандийнинг "Илоҳий ишқ" китобидан
Нодир Одинаев таржимаси
Янги тайинланган имомлар учун ўқув-семинар ўтказилди
#xabar #seminar #imom #malaka
Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ташаббуслари билан диний соҳа ходимларининг касбий салоҳиятини ошириш ва иш самарадорлигини юксалтириш мақсадида тизимли чора-тадбирлар амалга оширилмоқда.
Шу мақсадда 8–9 сентябрь кунлари Диний идоранинг Масжидлар билан ишлаш ҳамда Кадрлар бўлимлари ҳамкорлигида республикамиз бўйича янги лавозимга тайинланган 55 нафар имом-хатиб ва имом ноиблари учун икки кунлик ўқув-семинари ўтказилди.
Машғулотлар давомида Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Масжидлар билан ишлаш бўлими мудири Музаффар Камолов, Қуръони карим ва тажвидни ўргатиш бўлими мудири Шайх Алижон қори, шунингдек, Фатво маркази, Кадрлар билан ишлаш, Ички назорат бўлими мутасаддилари ўз йўналишлари бўйича маъруза қилдилар.
Хусусан, соҳа мутасаддилари томонидан муваффақиятли имом бўлиш омиллари, гўзал қироат ва тажвид қоидалари, шаръий масалаларга тўғри ёндашиш, фаолият самарадорлигини баҳолаш (KPI), қонун-қоидаларга қатъий риоя этиш, меҳнат муносабатлари ҳамда жамоат билан ишлаш кўникмалари юзасидан зарур амалий тушунтириш ва тавсиялар берилди.
Ўзбекистон мусулмонлари идораси
Матбуот хизмати
