#xushxabar #taqdirlov #otinoyi
Улуғ айём — Рамазон ҳайити арафасида юртимизда маънавий-ахлоқий муҳитни мустаҳкамлаш, хотин-қизлар орасида соғлом турмуш тарзини тарғиб қилиш ва оилалар мустаҳкамлигини таъминлаш йўлида хизмат қилаётган бир гуруҳ соҳа вакиллари давлатимизнинг юксак мукофотлари билан тақдирландилар.
 

Ўзбекистон Республикаси Президентининг "Маҳалла тизими ходимлари куни муносабати билан бир гуруҳ юртдошларимизни мукофотлаш тўғрисида"ги фармонига кўра кўплаб фидойи ва меҳнаткаш ҳамюртларимиз қатори Тошкент шаҳар бош имом-хатибининг хотин-қизлар масалалари бўйича ёрдамчиси, бош отинойиси Зулайҳо Саатова II даражали "Соғлом авлод учун" ордени билан, Сурхондарё вилояти бош имом-хатибининг хотин-қизлар масалалари бўйича ёрдамчиси, бош отинойиси Ҳосият Қасимова "Шуҳрат" медали билан мукофотландилар. 

Ушбу юксак мукофот бош отинойиларимизнинг маърифат тарқатиш, аёллар орасидаги ижтимоий-маънавий муҳитни соғломлаштириш ва ёш авлод тарбиясига қўшаётган беқиёс ҳиссаларининг муносиб эътирофидир.

Дарҳақиқат, инсон қадри улуғланган юртда меҳнат ва садоқат ҳеч қачон эътибордан четда қолмайди.

Юксак мукофот эгаларига ушбу муборак кунлардаги катта ютуқ билан муборакбод этамиз! 

Аллоҳ таоло бу мукофотни хайрли ва бардавом қилсин, эл-юрт хизматида чарчамайдиган ғайрат-шижоатларига барака берсин. Байрам ва мукофот муборак бўлсин! 

Ўзбекистон мусулмонлари идораси
Матбуот хизмати