Хориждаги ватандошлар иштирокида Рамазон тадбирлари давом этмоқда
#xabar #ramazo #vatandoshlar #iftorlik
Муборак Рамазон ойи муносабати билан дунёнинг турли давлатларида яшаб меҳнат қилаётган ватандошлар иштирокида юртимиздан борган уламолар иштирокида маънавий-маърифий тадбирлар, ифторлик дастурхонлари ҳамда таровеҳ намозлари давом этмоқда.
Россиянинг Москва шаҳрида “Ўзбекистон куни” доирасида ифторлик дастурхони ёзилиб, унга 500 нафарга яқин ватандошлар таклиф этилди. Тадбирда Рамазон ойининг фазилатлари, биродарлик, меҳр-мурувват ва ўзаро ҳамжиҳатлик каби эзгу қадриятлар ҳақида маъруза қилинди.
АҚШнинг Орландо шаҳридаги Имом Бухорий марказида ҳам навбатдаги суҳбат ўтказилиб, таровеҳ намози адо этилди. Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг “Инсон қадри” номли китобининг тақдимоти ҳам бўлиб ўтди. Тадбирда 250 нафарга яқин иштирокчи қатнашди. Маърифий суҳбат давомида тарбиянинг аҳамияти ва бошқа мавзуларда савол-жавоблар бўлиб ўтди.
Финландиянинг Ҳелсинки шаҳридаги Ўзбек маданияти марказида ҳам ватандошлар учун ана шундай тадбирлар ташкил этилди. Унда ватандошларни қизиқтирган саволларга жавоблар берилиб, “Аёллар – Аллоҳнинг омонати”, “Ватан саждагоҳ каби улуғдир” каби мавзуларда маърузалар қилинди. Тадбирда 160 нафарга яқин ватандошимиз қатнашди.
Шунингдек, Жанубий Кореянинг Геонгсан шаҳридаги “Шайх Муҳаммад Содиқ Муҳаммад Юсуф” масжидида ватандошлар иштирокида таровеҳ намози адо этилди. Унда асосан талабалардан иборат 150 нафарга яқин намозхон иштирок этди. Намоздан сўнг “Рамазон – саховат ойи” мавзусида суҳбат ташкил этилди.
Бундай хайрли тадбирлар хориждаги юртдошларда она Ватанга муҳаббатни янада ошириш, улар ўртасида бирдамликни мустаҳкамлаш, миллий ва диний қадриятларни асраб-авайлашга хизмат қилмоқда.
Ўзбекистон мусулмонлари идораси Матбуот хизмати
Соҳа раҳбарлари маҳаллалардаги тарғибот ва ободонлаштириш ишлари билан танишди
Мамлакатимизда мустақиллик байрамининг 35 йиллиги муносабати билан “Маҳаллада ободлик ва меҳр-саховат ойлиги” ҳамда “Долзарб 40 кунлик” тадбирлари доирасида ҳудудларда кенг кўламли тарғибот-ташвиқот, ободонлаштириш, хайрия ва меҳр-оқибат ишлари амалга оширилмоқда.
Мазкур жараён билан яқиндан танишиш мақсадида 4 август куни Ўзбекистон Республикаси Президентининг диний-маърифий масалалар бўйича маслаҳатчиси Музаффар Комилов, Дин ишлари бўйича қўмита раиси Содиқ Тошбоев ҳамда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги мутасаддилар Тошкент шаҳри Сергели туманидаги “Нўғайқўрғон”, “Қумариқ” ва “Иттифоқ” маҳаллаларида бўлишди.
Ташриф давомида соҳа раҳбарлари маҳаллалардаги ижтимоий-маънавий муҳитни янада соғломлаштириш, хайрия ва саховат ишларини кенгайтириш, ободонлаштириш ҳамда бунёдкорлик ишларининг бориши билан танишди. Шунингдек, маҳаллий ҳокимият вакиллари, “маҳалла еттилиги”, нуронийлар ҳамда диний соҳа ходимлари иштирокида ушбу йўналишларда амалга оширилаётган ишлар муҳокама қилинди.
Маҳаллаларда ўтказилган сайёр йиғинларда “Жаҳолатга қарши маърифат билан курашиш”, оилаларда тотувликни мустаҳкамлаш, ёшларни илм-маърифатга йўналтириш, эҳтиёжманд оилаларни қўллаб-қувватлаш, фарзанд тарбияси ҳамда аҳоли муаммоларини ҳал этишда ҳамжиҳатликни кучайтириш масалаларига алоҳида эътибор қаратилди.
Шу билан бирга, хонадонлар атрофи, кўчалар, ариқлар ва қабристонларни обод қилиш, уларнинг озодалигини таъминлаш бўйича олиб борилаётган ишлар юзасидан ҳам тегишли тавсия ва кўрсатмалар берилди.
Дарҳақиқат, Президентимиз таъкидлаганларидек, амалга оширилаётган ислоҳотлар самараси, энг аввало, маҳаллалар ҳаётида яққол намоён бўлиши ва аҳоли кайфиятида ўз аксини топиши лозим. Шу маънода, жорий йил якунида мамлакатимиз бўйлаб “Энг ораста хонадон”, “Энг файзли ҳовли”, “Энг обод кўча” ва “Энг намунали маҳалла” номинациялари бўйича ғолибларнинг аниқланиши мазкур эзгу ташаббусларнинг мантиқий давоми бўлади.
Ўзбекистон мусулмонлари идораси Матбуот хизмати