08 Апрел, 2026, 19 Шаввол, 1447
08 Апрел, 2026, 19 Шаввол, 1447
Бисмиллаҳир Роҳманир Роҳийм
Савол: Воқеа сурасини 40 кун ўқиш ҳақида сўрамоқчи эдим. Унда ҳар куни ўша куннинг сони бўйича ўқилади дейилган, яъни биринчи кун битта, иккинчи кун иккита, шу тарзда ўқиб борилиб, қирқинчи кун 40 та, жами 818 марта ўқилар экан. Шундай қилинса, ҳожатлар раво бўлар экан. Шу ҳақида маълумот берсангиз.
Жавоб: Бисмиллаҳир Роҳманир Роҳийм. Динимизда бундай шаклда кўрсатма келмаган. Яъни, Воқеа сурасини 40 кун давомида муайян ададда ўқилсин ёки шундай қилинса, ҳожатлари раво бўлади каби гаплар ишончли диний манбаларда зикр қилинмаган. Албатта, шом намозидан кейин воқеа сурасини ўқиган одам камбағаллик кўрмаслиги ҳақида машҳур саҳобий Абдуллоҳ ибн Масъуд розияллоҳу анҳудан ривоят қилинган ҳадис бор. Лекин мазкур ҳадисда бир марта ўқиш ҳақида гап боради.
Абдуллоҳ ибн Масъуд розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким ҳар кеча Воқеа сурасини ўқиса, унга зинҳор фақирлик етмайди”, деганлар.
Ибн Масъуд розияллоҳу анҳу қизларига ҳар кеча у(сура)ни ўқишга буюрар эди (Имом Байҳақий “Шўъабул иймон”да ривоят қилган).
Ўқимоқчи бўлган одам мана шу ҳадисга амал қилиб, ҳар кеча мазкур сурани ўқишга одатланса, мақсадга мувофиқ йўл тутган бўлади ҳамда ҳадисдаги фазилатга ноил бўлади. Валлоҳу аълам.
Ўзбекистон мусулмонлари идораси
Фатво маркази.
“Хожа Бухорий” ўрта махсус ислом таълим муассасасида битирувчи талабаларни ишга тақсимлашга бағишланган учрашув бўлиб ўтди
Мамлакатимизда ёш авлодни ҳар томонлама қўллаб-қувватлаш ва уларнинг салоҳиятини юзага чиқариш борасидаги давлат сиёсатининг изчил давоми сифатида, 2026 йил 8 апрель куни "Хожа Бухорий" ўрта махсус ислом таълим муассасасида муҳим тадбир ташкил этилди. Унда Ўзбекистон мусулмонлари идорасининг Кадрлар, Таълим ва илмий-тадқиқот ҳамда Масжидлар билан ишлиш бўлимлари масъул ходимлари иштирок этдилар.
Меҳмонлар дастлаб таълим муассасасида талабалар учун яратилган замонавий шарт-шароитлар билан яқиндин танишиб, сўнг битирувчи курс талабалари билан очиқ мулоқот ўтказдилар. Учрашув давомида юртимизда диний-маърифий соҳада амалга оширилаётган кенг кўламли ислоҳотлар ва соҳа олдида турган истиқболли вазифалар ҳақида атрофлича маълумот берилди.
Мулоқотнинг асосий қисми битирувчиларни ишга тақсимлаш масаласига бағишланди. Масъуллар томонидан бўлажак мутахассисларга келгуси меҳнат фаолиятида амал қилиши лозим бўлган касбий этика ва муҳим тавсиялар тушунтирилди.
Шунингдек, таълимни юқори босқичларда давом эттириш истагида бўлган ёшлар учун яратилган кенг имкониятлар алоҳида қайд этилди. Самимий руҳда ўтган йиғилиш якунида битирувчиларнинг келгуси фаолиятига муваффақият ва зафарлар тиланди.
“Хожа Бухорий” ислом таълим муассасаси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 