Бўлажак диний соҳа ходимлари ишга тақсимланди
“Хожа Бухорий” ўрта махсус ислом таълим муассасасида битирувчи талабаларни ишга тақсимлашга бағишланган учрашув бўлиб ўтди
Мамлакатимизда ёш авлодни ҳар томонлама қўллаб-қувватлаш ва уларнинг салоҳиятини юзага чиқариш борасидаги давлат сиёсатининг изчил давоми сифатида, 2026 йил 8 апрель куни "Хожа Бухорий" ўрта махсус ислом таълим муассасасида муҳим тадбир ташкил этилди. Унда Ўзбекистон мусулмонлари идорасининг Кадрлар, Таълим ва илмий-тадқиқот ҳамда Масжидлар билан ишлиш бўлимлари масъул ходимлари иштирок этдилар.
Меҳмонлар дастлаб таълим муассасасида талабалар учун яратилган замонавий шарт-шароитлар билан яқиндин танишиб, сўнг битирувчи курс талабалари билан очиқ мулоқот ўтказдилар. Учрашув давомида юртимизда диний-маърифий соҳада амалга оширилаётган кенг кўламли ислоҳотлар ва соҳа олдида турган истиқболли вазифалар ҳақида атрофлича маълумот берилди.
Мулоқотнинг асосий қисми битирувчиларни ишга тақсимлаш масаласига бағишланди. Масъуллар томонидан бўлажак мутахассисларга келгуси меҳнат фаолиятида амал қилиши лозим бўлган касбий этика ва муҳим тавсиялар тушунтирилди.
Шунингдек, таълимни юқори босқичларда давом эттириш истагида бўлган ёшлар учун яратилган кенг имкониятлар алоҳида қайд этилди. Самимий руҳда ўтган йиғилиш якунида битирувчиларнинг келгуси фаолиятига муваффақият ва зафарлар тиланди.
“Хожа Бухорий” ислом таълим муассасаси
Матбуот хизмати
Банклар ва микромолия ташкилотлари ўз фаолиятини исломий банк фаолиятига ўзгартириши мумкин
Адлия вазирлиги Микромолия ташкилоти ва банк фаолиятини ўзгартириш тартиби тўғрисидаги низомга ўзгартириш ва қўшимчаларни давлат рўйхатидан ўтказди (рўйхат рақами 3656-1, 01.08.2026 й.), хабар бермоқда huquqiyaxborot Telegram канали.
Мазкур идоравий ҳужжат "Ўзбекистон Республикасининг айрим қонун ҳужжатларига Ўзбекистонда исломий банк фаолиятини жорий этишга қаратилган қўшимча ва ўзгартиришлар киритиш тўғрисида" 2026 йил 27 мартдаги ЎРҚ–1126-сон Қонунга мувофиқ айрим кредит ташкилотлари фаолиятини ўзгартиришнинг қуйидаги тартиб-таомилларини белгилайди:
- микромолия ташкилотини фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини фақат исломий банк фаолиятини амалга оширувчи банкка ўзгартириш;
- фақат исломий банк фаолиятини амалга оширувчи банкни фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини микромолия ташкилотига ўзгартириш;
- банкни фақат исломий банк фаолиятини амалга оширувчи банкка ўзгартириш.
Шунингдек, ўз фаолиятини фақат исломий банк фаолиятини амалга оширувчи банкка ўзгартиришга фақат исломий банк фаолиятини амалга оширувчи микромолия банки ҳақли.
Микромолия банкини давлат рўйхатидан ўтказиш ва банк фаолиятига доир тегишли лицензия (лицензиялар) олиш учун ногиронлиги бўлган шахслар учун микромолия банки биноларида шаҳарсозлик нормалари ва қоидаларида белгиланган талабларга мувофиқ қулай шарт-шароитлар яратилганлиги бўйича Қурилиш ва уй-жой коммунал хўжалиги соҳасида назорат қилиш инспекциясининг хулосаси мавжуд бўлиши керак.
Ташаббус Форс кўрфази мамлакатларидан инвестицияларни жалб қилишга қаратилган бўлиб, дастлабки ҳисоб-китобларга кўра, ушбу чора-тадбирларни амалга ошириш иқтисодиётга депозитлар ва тўғридан-тўғри инвестициялар кўринишида тахминан 1 миллиард доллар жалб қилиши мумкин. Мутахассисларнинг прогнозларига кўра, 2035 йилга бориб Ўзбекистон ушбу тизим ишга туширилгандан бери дунёда ислом молиясининг энг тез ўсишини намойиш этади.
Ўзбекистон мусулмонлари идораси Матбуот хизмати
