Қирғизистон муфтийси Мир Арабнинг бой тарихи билан танишди
Шу йилнинг 11 апрель куни Бухоро шаҳридаги Мир Араб ўрта махсус ислом таълим муассасасига Қирғизистон мусулмонлари идораси раиси, муфтий Абдулазиз қори Зокиров бошчилигидаги делегация ташриф буюрди.
Мартабали меҳмонлар ташриф давомида таълим муассасасининг фаолияти, ўқув жараёнлари ва талабалар учун яратилган шарт-шароитлар билан яқиндан танишди. Беш асрлик бой тарихга эга бўлган Мир Араб мадрасасининг ислом оламидаги ўрни, бу ердан етишиб чиққан забардаст уламолар ва мажмуанинг ноёб меъморий ечими меҳмонларда катта таассурот қолдирди.
Мулоқот давомида мазкур таълим даргоҳида таҳсил олган қирғизистонлик машҳур дин ва давлат арбоблари, алломалар ҳақидаги маълумотлар алоҳида ёдга олинди. Бу каби тарихий ришталар икки қардош халқ ўртасидаги диний-маърифий алоқаларни янада мустаҳкамлашда муҳим пойдевор бўлиб хизмат қилиши таъкидланди.
Таълим муассасаси
Матбуот хизмати
“Arab Tourist”: Самарқанд, Бухоро ва Хива — ислом цивилизацияси ва жаҳон маданий меросининг бебаҳо дурдоналари
Саудия Арабистонининг туризм ва саёҳатларга ихтисослашган “Arab Tourist” электрон нашрида “Марказий Осиёнинг қоқ марказида жойлашган ва Буюк ипак йўли билан боғланган мамлакат” сарлавҳали таҳлилий мақола эълон қилинди, деб хабар бермоқда “Дунё” АА.
Мақолада Буюк ипак йўли тарихида ўзбек шаҳарларининг тутган ўрни алоҳида эътироф этилади. Хусусан, Самарқанд, Бухоро ва Хива каби тарихий шаҳарлар асрлар давомида Шарқ ва Ғарб ўртасидаги савдо, фан ва маданият марказлари сифатида хизмат қилгани таъкидланади. Регистон майдони, Ичан-қалъа ва Бухородаги меъморий обидалар ислом цивилизацияси ҳамда жаҳон маданий меросининг бебаҳо дурдоналари сифатида тилга олинади.
Бундан ташқари, нашр Ўзбекистоннинг ранг-баранг табиати ва географик рельефига тўхталиб ўтган. Қизилқум чўли, серҳосил Фарғона водийси, Тянь-Шань ва Помир-Олой тоғ тизмалари аҳоли жойлашуви ва қишлоқ хўжалиги ривожида муҳим ўрин тутиши қайд этилади.
Нашр, шунингдек, Буюк Мирзо Улуғбек каби донишмандларнинг астрономия ва математика соҳасидаги буюк кашфиётларини алоҳида эътироф этган.
Хулосада таъкидланганидек, Тошкент, Самарқанд, Бухоро, Наманган ва Андижон каби шаҳарлар бугунги кунда нафақат маъмурий ва иқтисодий, балки жадал ривожланаётган йирик маданий-туристик марказлар сифатида дунё сайёҳлари эътиборини ўзига жалб этмоқда.
Ўзбекистон мусулмонлари идораси Матбуот хизмати
