Туркия сафари: қатор келишувларга эришилди
Ўзбекистон делегациясининг Туркия давлатига амалий сафари доирасида бугун, 22 апрель куни Туркия исломий тадқиқотлар маркази раҳбарияти ва мутасаддилари билан учрашув бўлиб ўтди.
Мулоқотда бугунги кун учун жуда муҳим бўлган китоблар нашри, уларнинг электрон вариантларини ижтимоий тармоқларда кенг тарқатиш ҳамда сунъий ақл тизимларидан фойдаланишда ёшлар ўзларини қизиқтирган саволларига жавобни асл манбаларга асосланган маълумотлардан олишларини таъминлаш борасида музокаралар олиб борилди.
Шу билан бир қаторда, “Вақф” хайрия жамоат фонди фаолияти бўйича алоҳида музокаралар ўтказилиб, фондга доир китоблар ва маълумотлар билан танишилди.
Туркиялик олимлар ўз мамлакатларида вақф фаолиятини ташкил этишда қадимий Бухоро ва Самарқанд мактаблари тажрибасидан фойдаланишганини, бу борада махсус тадқиқотлар ўтказиб, китоб нашр этишганини мамнуният билан эътироф этишди. Учрашув сўнгида марказ томонидан нашр этилган “Саҳиҳул Бухорий” асарининг минг йил олдинги нусхаси ҳамда Бухоро вақф ишларига доир тарихий китоблар ўзбекистонлик меҳмонларга тақдим этилди.
Шунингдек, Ўзбекистон мусулмонлари идораси, Халқаро исломшунослик академияси ва Тошкент давлат шарқшунослик университети кутубхоналаридаги тарихий манбалар ва қўлёзмалар устида биргаликда тадқиқотлар ўтказишга келишиб олинди.
Ҳамкорликнинг навбатдаги босқичи Ислом тарихи, санъати ва маданиятини тадқиқ қилиш маркази (IRCICA) билан давом этди. Учрашувда Ўзбекистондаги мавжуд илмий-тадқиқот марказлари билан алоқаларни мустаҳкамлаш, олимларнинг ижодий меросини ўзаро турк ва ўзбек тилларига таржима қилиш ҳамда ижтимоий тармоқларга жойлаштириш масалалари муҳокама қилинди. Туркиядаги диний тизим фаолияти ва талабалар тажриба алмашуви бўйича ҳам келишувларга эришилди.
Куннинг иккинчи ярмида ўзбекистонлик талаба ёшлар билан учрашув ташкил этилди. Унда юртимизда амалга оширилаётган ислоҳотлар, миллий қадриятларга эҳтиром, ватанпарварлик ва ёт оқимлардан сақланиш каби долзарб мавзулар ёритилди.
Талабалар кўрсатилаётган эътибор учун Давлатимиз раҳбари ва ташкилотчиларга ўз миннатдорликларини билдиришди.
Ўзбекистон мусулмонлари идораси
Матбуот хизмати
Иордания ОАВ: Тошкентда Ислом цивилизациясига бағишланган халқаро медиафорум ўтказилади
Иорданиянинг нуфузли “Jordan News Agency” (Petra) ахборот агентлиги ҳамда “Hala Ahbar” нашрида 24–29 август кунлари Тошкент шаҳрида бўлиб ўтадиган “Ислом цивилизацияси: янги нигоҳ ва кашфиётлар” мавзусидаги халқаро медиафорумга бағишланган мақолалар эълон қилинди, деб хабар бермоқда “Дунё” АА.
Агентликда ёзилишича, мазкур йирик халқаро тадбир Ўзбекистоннинг жаҳон медиа ҳамжамияти билан алоқаларини янада кенгайтириш, журналистлар ва соҳа мутахассислари ўртасида тажриба алмашишни ривожлантириши билан аҳамиятлидир.
Шу билан бирга, форум давомида ислом цивилизациясининг бой илмий-маърифий ва маданий меросини замонавий медиа воситалари орқали кенг тарғиб этишга алоҳида эътибор қаратилади.
Форумнинг асосий тадбирлари Ўзбекистондаги Ислом цивилизацияси марказида ўтказилади. Унда хорижий оммавий ахборот воситалари вакиллари, халқаро экспертлар ҳамда медиа соҳаси мутахассислари иштирок этади.
Нашрлар форум дастурининг мазмун-моҳиятига алоҳида эътибор қаратган. Хусусан, тадбир доирасида ялпи мажлислар, ихтисослаштирилган медиа-кўргазмалар, матбуот брифинглари ва икки томонлама учрашувлар ташкил этилади.
Мунозараларда ҳужжатли фильмлар яратиш, тарихий хотирани асраш ва ёритиш, нашриёт лойиҳаларини ривожлантириш, замонавий технологиялардан медиа соҳасида самарали фойдаланиш ҳамда халқаро медиа лойиҳаларни амалга ошириш истиқболлари муҳокама қилинади.
Нашрнинг қайд этишича, тадбирнинг муҳим жиҳатларидан бири – Ўзбекистонлик талабалар учун халқаро медиа соҳасининг тажрибали мутахассислари иштирокида амалий мастер-класслар ўтказилишидир. Бу машғулотлар замонавий журналистика, медиамаҳсулотлар яратиш ва халқаро ахборот маконида самарали фаолият юритиш бўйича билим ва кўникмаларни оширишга хизмат қилади.
Иордания ОАВда форум доирасида иштирокчилар учун Самарқанд шаҳрига сафар ҳам режалаштирилгани қайд этилган. Хорижий журналистлар Имом Бухорий мажмуасини зиёрат қилиб, Самарқанднинг бой тарихий-маданий мероси билан танишадилар. Тошкент шаҳрида эса халқаро ОАВ вакиллари учун махсус медиатур ташкил этилади.
Бундай сафарлар форум иштирокчиларига Ўзбекистоннинг нафақат замонавий тараққиёти, балки унинг жаҳон цивилизацияси тарихидаги ўрни, илмий-маърифий анъаналари ва бой маданий мероси ҳақида бевосита тасаввур ҳосил қилиш имконини беради.
Мақолаларда халқаро медиафорумнинг 28 август куни якуний ялпи мажлис ва расмий ёпилиш маросими билан якунланиши ҳам маълум қилинган. Хорижий меҳмонлар Ўзбекистон Республикаси давлат мустақиллигининг 35 йиллигига бағишланган тадбирларда ҳам иштирок этади.
Ўзбекистон мусулмонлар идораси Матбуот хизмати
