Умидсизликдан эҳтиёт бўлинг
Бисмиллаҳир Роҳманир Роҳийм
Сенга етган бўлсада ҳалокатлар зарари,
Хабар бермиш у сенга келажак неъматлари.
Бир йигит қамалди. У ёлғиз фарзанд бўлиб, онасининг у йигитдан бошқа ҳеч кими йўқ эди. Онанинг кўзидан уйқуси қочди, уни ғам-ташвиш чулғаб олди. Йиғлайвериб ёшлари қуриб қолди. У шундай ҳолдалигида Аллоҳ таоло унинг қалбига: “Лаа ҳавла ва лаа қуввата илла биллааҳ” (Куч-қувват фақат олий, буюк Аллоҳдандир) калимасини солиб қўйди.
Она жаннат ҳазиналаридан бўлмиш бу калимани қайта-қайта такрор қила бошлади. Ўғлининг чиқишидан умидини узган кунларининг бирида кимдир эшикни қоқиб қолди. Эшикни очиб, онанинг кўнгли ёришиб, хурсанд бўлиб кетди, Чунки унинг қаршисида севимли ўғли турар эди.
Бу Роббисига боғланган, Унга кўп дуо қилган ва ишини У зотнинг ўзига топширган банданинг мукофотидир. Шундай экан, сиз ушбу калимани лозим тутинг. Чунки бу улуғ калимадир. Унда бахт-саодат сири бор. У калимани кўпроқ айтинг, у билан ғам парчаларини қувинг ва Аллоҳдан тез орада келадиган хушхабарни кутинг.
Ҳеч қачон сиздан умид ришталари узилиб қолмасин, ҳеч қачон тушкунликка тушманг. Шуни билингки, ҳар қандай қийинчилик ортидан енгиллик келади, ҳар қандай қийинчилик ортида бир енгиллик бўлади, бу нарса доимий такрорланиб турадиган дунё қонунидир. Шундай экан, Аллоҳга чиройли гумон қилинг, Унга таваккул қилинг ва Ундан яхши нарсаларни сўранг, умид қилинг.
Шуъла: Қийинчилик ва ғамларингизни бошқалар билан гаплашадиган мавзу қилиб олманг. Чунки бу нарса сиз билан саодат ўртасида тўсиқ пайдо қилади.
Доктор Оиз ал-Қарнийнинг
"Дунёдаги энг бахтли аёл" китобидан
Халқ қабулхонаси вакиллари иштирокида амалий семинар бўлиб ўтди
Ўзбекистон мусулмонлари идорасида аҳоли билан мулоқот тизимини такомиллаштириш ва мурожаатлар билан ишлаш самарадорлигини оширишга қаратилган амалий семинар-тренинг бўлиб ўтди. Унда мазкур йўналишга масъул бўлган мутахассислар бевосита ҳамда масофавий тарзда иштирок этди.
Тадбирни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков кириш сўзи билан очиб, фуқароларнинг мурожаатларига юксак ҳурмат билан қараш ва уларнинг дардига оқилона ечим топиш ҳар бир раҳбар ҳамда ходимнинг нафақат вазифаси, балки олий инсоний бурчи эканини алоҳида таъкидлади.
Семинарда Ўзбекистон Республикаси Президенти Халқ қабулхонасининг масъул вакиллари – Давлат ташкилотлари томонидан мурожаатлар кўриб чиқилишини назорат қилиш шўъбаси бош инспектори Саидакмал Ходжаев ҳамда шўъба етакчи инспектори Рашид Курганов иштирок этиб, тизимдаги ҳолатни қонунчилик талаблари асосида атрофлича таҳлил қилиб бердилар.
Соҳа масъул мутахассислари томонидан айни йўналишдаги Президент Фармони ижроси доирасида мурожаатларни кўриб чиқишда қонунийлик ва тезкорликни таъминлаш, жараён шаффофлигини ошириш ҳамда мурожаатларни назоратдан олишнинг механизмларини тўғри қўллаш бўйича муҳим тавсиялар берилди.
Очиқ мулоқот руҳида ўтган мазкур тадбир тизим ходимларининг мурожаатлар билан ишлаш маданияти ва ҳуқуқий саводхонлигини янада оширишга хизмат қилади. Амалий таҳлилларга бой бўлган ушбу семинар фуқароларнинг ҳуқуқ ва қонуний манфаатларини тўлақонли ҳимоя қилиш ҳамда халқимизнинг диний-маърифий соҳага бўлган ишончини мустаҳкамлаш йўлидаги муҳим ва тизимли қадам бўлди.
Ўзбекистон мусулмонлари идораси
Матбуот хизмати
