Қашқадарё масжид ва зиёратгоҳларида ҳашар ўтказилди
Юртимизда миллий ва диний қадриятларимизга ҳурмат кўрсатиш, муқаддас қадамжоларни обод этиш ҳамда аҳоли учун муносиб шарт-шароитлар яратиш борасидаги хайрли ишлар изчил давом эттирилмоқда.
Хусусан, "9 май — Хотира ва қадрлаш куни" ҳамда яқинлашиб келаётган муборак Қурбон ҳайити байрами муносабати билан 2026 йил 7 май куни Ўзбекистон мусулмонлари идораси Қашқадарё вилояти вакиллиги тасарруфидаги масжидлар, зиёратгоҳлар ва қабристонларда умумхалқ хайрия ҳашари уюшқоқлик билан ташкил этилди.
«Поклик — иймоннинг ярмидир» деган ҳадиси шариф мазмунига мувофиқ равишда ўтказилган ушбу тадбирда диний соҳа ходимлари, имом-хатиблар ва маҳалла фаоллари фаол иштирок этиб, хонақоҳлар, таҳоратхоналар ҳамда зиёратгоҳлар ҳудудида кенг кўламли ободонлаштириш ва кўкаламзорлаштириш ишларини амалга оширдилар.
Бу каби эзгу тадбирлар атроф-муҳит мусаффолигини таъминлаш билан бирга, жамиятда ҳамжиҳатлик, бағрикенглик ва меҳр-оқибат муҳитини янада мустаҳкамлашга хизмат қилмоқда.
Ўзбекистон мусулмонлари идораси
Қашқадарё вилояти вакиллиги
Матбуот хизмати
“Al Jazeera”: Ўзбекистон ислом цивилизацияси шаклланиши ва тараққиётида юксак ўрин эгаллайди
Қатарнинг “Al Jazeera” нашрида Тошкент ва Самарқанд шаҳарларида бўлиб ўтган “Ислом цивилизацияси: янги нигоҳ, янги кашфиётлар” мавзусидаги халқаро медиафорум ҳақида мақола эълон қилинди, деб хабар бермоқда “Дунё” АА.
Мақола муаллифи, халқаро медиафорумда иштирок этган Муҳаммад Аъморийнинг таъкидлашича, яқинда Тошкент шаҳрида бунёд этилган Ўзбекистон Ислом цивилизацияси маркази медиафорум иштирокчиларида катта таассурот қолдирган.
Марказда Ўзбекистон ҳудудида ислом цивилизациясининг шаклланиши ва тараққиёти, тарихий ёдгорликлар, қўлёзмалар, археологик топилмалар ҳамда буюк алломалар мероси ўрин олган. Музейда қарийб 8 мингта тарихий ашё ва экспонат сақланиши, улар орқали Мовароуннаҳр халқларининг қадимги даврлардан бошлаб илм-фан ва маданият тараққиётига қўшган ҳиссаси намойиш этилган.
Мақолада ёзилишича, музей экспозициялари асосан тўрт муҳим тарихий даврни қамраб олишига эътибор қаратилган. Булар – исломдан олдинги давр, Мовароуннаҳрдаги биринчи уйғониш даври, Темурийлар даври ва Ислом цивилизациясига оид қимматли Қуръон қўлёзмалари намойиш этилган залдир.
Ушбу мажмуада Усмон Мусҳафига алоҳида ўрин берилган. Шу билан бирга, музейда қадимги шаҳарлар, Буюк Ипак йўли, ҳаж анъаналари, Каъба ва унинг муқаддас ёдгорликлари билан боғлиқ экспонатлар ҳам тақдим қилинган.
Материалда Ўзбекистон ва Марказий Осиё тарихида чуқур из қолдирган буюк алломалар – Муҳаммад ал-Хоразмий, Аҳмад ал-Фарғоний, Имом Бухорий, Имом Термизий, Абу Али ибн Сино, Абу Райҳон Беруний, Абу Наср Форобий, Мирзо Улуғбек, Камолиддин Беҳзод, Амир Темур, Заҳириддин Муҳаммад Бобур каби тарихий шахсларнинг илм-фан, дин, маданият, санъат ва давлатчилик ривожига қўшган ҳиссаси кенг ёритилган.
Ўзбекистон мусулмонлари идораси Матбуот хизмати