Диний идора ёшлари билан мулоқот ўтказилди
Бугун, 7 май куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков тизимда фаолият юритаётган ёш мутахассислар билан дилдан суҳбат қурди.
Мулоқот аввалида Ҳомиджон домла юртимизда ёшларнинг билим олиши ва касбий юксалиши учун яратилган имкониятларга тўхталиб, Диний идорада ҳам ёш мутахассисларнинг салоҳиятини рўёбга чиқариш учун барча шароитлар муҳайё эканини алоҳида қайд этди.
Шунингдек, Идоранинг шонли тарихига назар ташлаб, 1943 йилда "Бароқхон" мадрасасида бошланган фаолият 2007 йилда "Ҳазрати Имом" мажмуасига, 2026 йилга келиб эса муҳташам Ўзбекистондаги Ислом цивилизацияси марказининг янги биносига кўчганини сўзлаб берди.
Суҳбат давомида бугунги тинчлик ва тараққиёт аждодларимизнинг дуолари ва меҳнатлари самараси экани таъкидланди. Шунингдек, Диний идора нафақат юртимизда, балки қўшни давлатларда ҳам юксак эҳтиром билан тилга олинадиган даргоҳ бўлиб, бу ерда фаолият юритган улуғ уламоларнинг хизмати беқиёс экани эътироф қилинди.
Ҳомиджон домла ёшларни уларга насиб этган мана шундай беқиёс имкониятлардан оқилона фойдаланишга, ўз билим ва малакаларини тинимсиз ошириб, дин ва миллат ривожи учун бор куч-ғайратини сарфлашга чақирди.
Учрашув якунида юртимиз тинчлиги, халқимиз фаровонлиги ҳамда маърифат зиёси янада кенг ёйилишини сўраб хайрли дуолар қилинди.
Ўзбекистон мусулмонлари идораси
Матбуот хизмати
Банклар ва микромолия ташкилотлари ўз фаолиятини исломий банк фаолиятига ўзгартириши мумкин
Адлия вазирлиги Микромолия ташкилоти ва банк фаолиятини ўзгартириш тартиби тўғрисидаги низомга ўзгартириш ва қўшимчаларни давлат рўйхатидан ўтказди (рўйхат рақами 3656-1, 01.08.2026 й.), хабар бермоқда huquqiyaxborot Telegram канали.
Мазкур идоравий ҳужжат "Ўзбекистон Республикасининг айрим қонун ҳужжатларига Ўзбекистонда исломий банк фаолиятини жорий этишга қаратилган қўшимча ва ўзгартиришлар киритиш тўғрисида" 2026 йил 27 мартдаги ЎРҚ–1126-сон Қонунга мувофиқ айрим кредит ташкилотлари фаолиятини ўзгартиришнинг қуйидаги тартиб-таомилларини белгилайди:
- микромолия ташкилотини фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини фақат исломий банк фаолиятини амалга оширувчи банкка ўзгартириш;
- фақат исломий банк фаолиятини амалга оширувчи банкни фақат исломий банк фаолиятини амалга оширувчи микромолия банкига ўзгартириш;
- фақат исломий банк фаолиятини амалга оширувчи микромолия банкини микромолия ташкилотига ўзгартириш;
- банкни фақат исломий банк фаолиятини амалга оширувчи банкка ўзгартириш.
Шунингдек, ўз фаолиятини фақат исломий банк фаолиятини амалга оширувчи банкка ўзгартиришга фақат исломий банк фаолиятини амалга оширувчи микромолия банки ҳақли.
Микромолия банкини давлат рўйхатидан ўтказиш ва банк фаолиятига доир тегишли лицензия (лицензиялар) олиш учун ногиронлиги бўлган шахслар учун микромолия банки биноларида шаҳарсозлик нормалари ва қоидаларида белгиланган талабларга мувофиқ қулай шарт-шароитлар яратилганлиги бўйича Қурилиш ва уй-жой коммунал хўжалиги соҳасида назорат қилиш инспекциясининг хулосаси мавжуд бўлиши керак.
Ташаббус Форс кўрфази мамлакатларидан инвестицияларни жалб қилишга қаратилган бўлиб, дастлабки ҳисоб-китобларга кўра, ушбу чора-тадбирларни амалга ошириш иқтисодиётга депозитлар ва тўғридан-тўғри инвестициялар кўринишида тахминан 1 миллиард доллар жалб қилиши мумкин. Мутахассисларнинг прогнозларига кўра, 2035 йилга бориб Ўзбекистон ушбу тизим ишга туширилгандан бери дунёда ислом молиясининг энг тез ўсишини намойиш этади.
Ўзбекистон мусулмонлари идораси Матбуот хизмати