Ҳожиларимиз юксак эътибор ва муносиб шароитлардан мамнун
Бу йилги ҳаж сафари юқори савияда ташкил этилганини алоҳида таъкидлаш жоиз. Ҳожиларимиз учун барча ташкилий масалалар пухта йўлга қўйилган. Сафардан тортиб жойлашиш, овқатланиш, транспорт ва тиббий хизматгача бўлган барча жараёнлар тизимли ташкил этилгани сабабли зиёратчиларимиз хотиржам ҳолда ибодатларини адо этишяпти.
Айниқса, кексалар ва эҳтиёжманд ҳожиларга кўрсатилаётган эътибор ва ғамхўрлик алоҳида таҳсинга лойиқ. Ҳар бир ҳожининг кайфияти кўтаринки, руҳияти тетик. Уларнинг чеҳраларида мамнуният ва шукроналикни кўриш мумкин.
Шу билан бирга, сафар давомида ҳожиларимиз учун мунтазам маърифий суҳбатлар, диний-маърифий учрашувлар ташкил этилмоқда. Бу суҳбатларда ҳаж ибодатининг мазмун-моҳияти, одоб-ахлоқ масалалари, юрт тинчлиги ва қадриятларимиз ҳақида фикр алмашилмоқда. Бу эса зиёратчиларимизнинг маънавий оламини янада бойитишга хизмат қилмоқда.
Ҳожиларимиз юртимизда яратилаётган имкониятлар ва муқаддас сафар учун кўрсатилаётган юксак эътибордан мамнун ҳолда, халқимиз тинчлиги, Ватанимиз равнақи ва юртбошимиз ҳақларига самимий дуолар қилишмоқда.
Абдуқаҳҳор ЮНУСОВ,
Тошкент шаҳар бош имом-хатиби
"Хўжамулки" маҳалласида ободлик ва меҳр-саховат
Қумқўрғон туманидаги "Хўжамулки" маҳалласида "Маҳаллада ободлик ва меҳр-саховат ойлиги" доирасида кенг жамоатчилик ва аҳоли вакиллари иштирокида қизғин ободонлаштириш ва бунёдкорлик ишлари олиб борилмоқда. Бу ташаббус маҳалла ҳаётига янгича руҳ бахш этиб, ҳамжиҳатлик ва эзгулик муҳитини янада мустаҳкамламоқда.
Азалий қадриятларимиздан бири бўлган ҳашар анъанаси асосида маҳалла аҳли бир ёқадан бош чиқариб, ўз ҳудудини янада обод, файзли ва кўркам масканга айлантириш йўлида фидокорона меҳнат қилмоқда. Ҳар бир фуқаронинг қалбида Ватанга муҳаббат, маҳаллага эҳтиром туйғуси жўш уриб, улар бунёдкорлик ишларига фаол ҳисса қўшмоқдалар.
Хусусан, маҳалла ҳудудидаги муқаддас қадамжолардан бири – "Хўжамулки ота" қабристонида кенг кўламли тозалаш ва ободонлаштириш ишлари амалга оширилмоқда. Ҳашар иштирокчилари томонидан қабристон ҳудуди бегона ўтлар ва чиқиндилардан пухта тозаланиб, қабр устилари тартибга келтирилмоқда. Шунингдек, зиёратчилар учун қулай шароитлар яратиш борасида зарур ишлар олиб борилиб, аждодлар хотирасига чуқур эҳтиром кўрсатилмоқда.
Бу каби эзгу ташаббуслар маҳаллада ободлик ва ҳамжиҳатлик муҳитини мустаҳкамлаш билан бирга, аждодларимиз хотирасига бўлган ҳурматимизни намоён этади. Айни пайтда, ёш авлодга миллий қадриятларимизни сингдириш, уларни Ватанга муҳаббат ва меҳнатсеварлик руҳида тарбиялашда беқиёс аҳамиятга эгадир. Бугунги ҳашар – келажак авлод учун намуна, эртанги кун учун мустаҳкам пойдевордир.
Ўзбекистон мусулмонлари идораси
Сурхондарё вилояти вакиллиги Матбуот хизмати
