Ҳар бир мурожаат эътиборда
Ўзбекистон мусулмонлари идораси раҳбарияти томонидан аҳоли мурожаатлари билан ишлаш, фуқароларнинг арз ва таклифларини тинглаш ҳамда уларга амалий кўмак бериш тизимли равишда давом эттирилмоқда.
Ана шундай қабуллардан бири бугун, 13 май куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков Диний идорага ташриф буюрган фуқароларни навбатдаги қабули бўлиб ўтди.
Самимий мулоқот руҳида ўтган учрашувда имом-хатиблар фаолиятига оид таклифлар, мураккаб оилавий муносабатлар ва ижтимоий қўллаб-қувватлаш каби масалалар атрофлича кўриб чиқилди.
Қабул жараёнида мурожаатчиларнинг шаръий масалалар бўйича сўровларига батафсил жавоб берилиб, оилавий муаммоларни бартараф этиш юзасидан зарур тавсиялар берилди, шунингдек, моддий ёрдам сўраб келган эҳтиёжманд кишиларга белгиланган тартибда кўмак кўрсатилди.
Бу каби хайрли ташаббуслар нафақат марказда, балки республикамизнинг барча ҳудудий вакилликлари ва жоме масжидларида ҳам ҳар ҳафтанинг чоршанба куни имом-домлалар томонидан изчил амалга оширилмоқда.
Зеро, бировнинг дардини енгиллатиш, унинг ташвишлари осонгина бартараф этилишига ҳисса қўшиш – савоби улуғ амал. Чунончи, Расулуллоҳ соллаллоҳу алайҳи ва саллам:
"... Ким биродарининг ҳожатини раво қилса, Аллоҳ унинг ҳожатини раво қилади. Ким бир мусулмоннинг ташвишни аритса, Аллоҳ унинг Қиёмат кунидаги ташвишларидан бирини аритади", деганлар (Имом Бухорий ривояти).
Ўзбекистон мусулмонлари идораси
Матбуот хизмати
Мирзаободда 110 дан ортиқ оиланинг ҳолидан хабар олинди
Сирдарё вилояти Мирзаобод туманидаги «Зомин» жоме масжидида диний соҳа ходимлари фаолияти самарадорлигини оширишга қаратилган ташкилий йиғилиш бўлиб ўтди.
Унда Ўзбекистон мусулмонлари идорасининг Сирдарё вилояти вакиллиги раҳбарияти, туман ва шаҳар бош имом-хатиблари, ҳудуд масжидлари имомлари, отинойилар, «Ҳаж» зиёратчилари ҳамда МФЙ раислари қатнашди.
Учрашувда юрт тинчлигини асраш, ёш авлодни миллий ва диний қадриятлар руҳида тарбиялаш, оилаларда ижтимоий-маънавий муҳит барқарорлигини таъминлаш ҳамда нохуш ҳолатларнинг олдини олиш каби муҳим масалалар муҳокама қилинди.
Шунингдек, тадбир доирасида амалий саъй-ҳаракатлар ҳам олиб борилди:
-
Имом-хатиблар ва отинойилар маҳаллалардаги эҳтиёжманд ва кўмакка муҳтож оилалар хонадонларига ташриф буюрдилар.
-
Жараёнда жами 112 та хонадон (имом-хатиблар томонидан 83 та, отинойилар томонидан 29 та оила) ҳолидан хабар олиниб, уларнинг муаммо ва таклифлари ўрганилди.
-
Фуқароларга маънавий-маърифий далда берилиб, зарур амалий ёрдамлар кўрсатилди.
ЎМИ Сирдарё вилояти вакиллиги
Матбуот хизмати
