Ҳар бир мурожаат эътиборда
Ўзбекистон мусулмонлари идораси раҳбарияти томонидан аҳоли мурожаатлари билан ишлаш, фуқароларнинг арз ва таклифларини тинглаш ҳамда уларга амалий кўмак бериш тизимли равишда давом эттирилмоқда.
Ана шундай қабуллардан бири бугун, 13 май куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков Диний идорага ташриф буюрган фуқароларни навбатдаги қабули бўлиб ўтди.
Самимий мулоқот руҳида ўтган учрашувда имом-хатиблар фаолиятига оид таклифлар, мураккаб оилавий муносабатлар ва ижтимоий қўллаб-қувватлаш каби масалалар атрофлича кўриб чиқилди.
Қабул жараёнида мурожаатчиларнинг шаръий масалалар бўйича сўровларига батафсил жавоб берилиб, оилавий муаммоларни бартараф этиш юзасидан зарур тавсиялар берилди, шунингдек, моддий ёрдам сўраб келган эҳтиёжманд кишиларга белгиланган тартибда кўмак кўрсатилди.
Бу каби хайрли ташаббуслар нафақат марказда, балки республикамизнинг барча ҳудудий вакилликлари ва жоме масжидларида ҳам ҳар ҳафтанинг чоршанба куни имом-домлалар томонидан изчил амалга оширилмоқда.
Зеро, бировнинг дардини енгиллатиш, унинг ташвишлари осонгина бартараф этилишига ҳисса қўшиш – савоби улуғ амал. Чунончи, Расулуллоҳ соллаллоҳу алайҳи ва саллам:
"... Ким биродарининг ҳожатини раво қилса, Аллоҳ унинг ҳожатини раво қилади. Ким бир мусулмоннинг ташвишни аритса, Аллоҳ унинг Қиёмат кунидаги ташвишларидан бирини аритади", деганлар (Имом Бухорий ривояти).
Ўзбекистон мусулмонлари идораси
Матбуот хизмати
Саййид Яҳё Бокувий меросига бағишланган халқаро конференция бўлиб ўтмоқда
Боку шаҳрида Туркий давлатлар муфтийлари йиғилиши доирасида улуғ мутафаккир, тасаввуф олими Саййид Яҳё Бокувий меросига бағишланган халқаро конференция ўз ишини бошлади.
Ушбу нуфузли тадбирда Туркий давлатлар ташкилоти, Бутунжаҳон мусулмон донишмандлар кенгаши, IRCICA, ICESCO, Ал-Азҳар уламолар кенгаши вакиллари ҳамда етук шарқшунос ва исломшунос олимлар иштирок этмоқда.
Анжуманда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари маъруза қилдилар.
Муфтий ҳазратлари Саййид Яҳё Бокувийнинг тасаввуф тарихидаги мақоми ва унинг таълимоти ҳақида тўхталдилар. Шунингдек, нутқда аллома нафақат тасаввуф, балки диний илмлар, табиий ва аниқ фанларни эгаллаган қомусий олим бўлгани, ўттизга яқин асарлари инсон нафсини тарбиялашда муҳим қўлланма экани таъкидланди.
Шайх Нуриддин Холиқназар ҳазратлари Қуръони карим ва ҳадиси шарифларга таянган ҳолда қалб саломатлиги ва поклиги инсон ҳаётининг бош мезони эканини баён этиб, туркий халқларни боғлаб турган умуммаънавий илдизларга алоҳида урғу бердилар:
«Ҳазрат Аҳмад Яссавий, Баҳоуддин Нақшбанд ва Саййид Яҳё Бокувий каби буюк зотлар илгари сурган нафс тарбияси, инсонпарварлик ва юксак ахлоқ ғоялари бугун ҳам қардош халқларимизни бирлаштириб турувчи мустаҳкам маънавий кўприкдир. Бундай улуғ сиймолар меросини ҳамкорликда ўрганиш халқларимизнинг маънавий бирлигини мустаҳкамлаш ва ёшларимизни соғлом эътиқод руҳида тарбиялашга хизмат қилади».
Уч кунлик анжуман давомида Ўзбекистон илмий жамоатчилиги ҳам маърузалар билан иштирок этади.
Ўзбекистон мусулмонлари идораси Матбуот хизмати
