Тошкент ислом институти профессор-ўқитувчилари ва ходимлари ўртасида анъанавий “Ректор кубоги” футбол мусобақаси бўлиб ўтди. “25 май – Халқаро футбол куни” арафасида ЎФА майдонида ўтказилган финал баҳслари кескин ва дўстона руҳда кечди.
Мусобақа якунига кўра, совринли ўринларни қуйидаги жамоалар банд этди:
1-ўрин — “Бароқхон” жамоаси (Кубок соҳиби)
2-ўрин — “Шоший” жамоаси
3-ўрин — “Фуқаҳо” жамоаси
Шунингдек, турнир давомида ажралиб турган иштирокчилар махсус номинациялар билан тақдирланди. Институт проректори Хошимжон Аманов «Энг яхши ўйинчи», катта ўқитувчи Элёр Аҳматқулов «Энг яхши тўп урар» ва институт психологи Ойбек Исмоилов «Энг яхши дарвозабон» деб топилди.
Мусобақа сўнгида ғолибларга совринлар топширилди. Турнирни ташкил этишда яқиндан кўмаклашган Ўзбекистон футбол ассоциацияси ва ҳомий ташкилотларга институт раҳбарияти томонидан миннатдорлик билдирилди.
Ўзбекистон мусулмонлари идораси
Матбуот хизмати
Бугун, 24 июнь куни Ўзбекистон мусулмонлар идораси ҳузуридаги “Шамсуддинхон Бобохонов” нашриёт матбаа ижодий уйида 27 июнь – Матбуот ва оммавий ахборот воситалари ходимлари куни муносабати билан тантанали байрам тадбири бўлиб ўтди.
Тадбирни нашриёт бош директори Султонбек Имомназаров олиб борди. Унда Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, муфтий ўринбосарлари Зайниддин домла Эшонқулов, Обиджон Қодиров ва бошқа масъуллар қатнашди.
Байрам тадбирида сўзга чиққан Ҳомиджон домла Ишматбеков Муфтий ҳазратнинг табригини етказиб, нашриёт ходимларининг маърифат тарқатишдек машаққатли ва шарафли ишларини эътироф этди.
Тақдирлаш маросимида тўрт нафар ходимга умра йўлланмаси тақдим этилди. Шунингдек, жонкуяр ва фидойи ходимлар “Ташаккурнома” ва қимматбаҳо совғалар билан тақдирланди.
Ўзбекистон мусулмонлари идораси
Матбуот хизмати