Имом-хатиблар бошчилигида қабристон ва зиёратгоҳлар обод этилмоқда
Муборак Қурбон ҳайити айёми арафасида юртимиз бўйлаб қадамжолар, зиёратгоҳлар ва қабристонларни тартибга келтириш ҳамда ободонлаштириш ишлари кенг қулоч ёйди.
Хусусан, жорий йилнинг 23–24 май кунлари республикамизнинг барча ҳудудларида бўлгани каби Сирдарё вилоятида ҳам хайрия ҳашарлари юқори уюшқоқлик билан ташкил этилмоқда.
Мазкур хайрли ташаббус доирасида Сирдарё вилоятида фаолият юритаётган имом-хатиблар ва диний соҳа ходимлари ўзларига бириктирилган қабристонларда ҳашар ишларини бошлаб юбордилар.
Ҳашар давомида қуйидаги кенг қамровли ишлар амалга оширилмоқда:
-
Ҳудудларни тозалаш: Қабристонлар атрофи ва ичи қуриган ўт-ўланлардан, шох-шаббалардан ҳамда чиқиндилардан бутунлай тозаланмоқда;
-
Кўкламзорлаштириш: Зиёратгоҳлар ҳудудига маҳаллий иқлимга мос бўлган манзарали дарахт кўчатлари, турфа хил гуллар ҳамда файз бағишловчи райҳонлар экилмоқда.
Бу каби тизимли ишлар натижасида вилоятдаги қабристон ва зиёратгоҳлар янада обод, озода ва файзли масканга айлантирилмоқда.
Халқимизда ўтганларнинг хотирасини шод этиш, уларнинг манзилларини озода сақлаш азалдан муқаддас қадрият ва улуғ савобли амаллардан саналади. Ҳайит олдидан ўтказилаётган бундай ҳашарлар жамиятимиздаги ҳамжиҳатлик ва аждодлар хотирасига бўлган юксак ҳурматнинг ёрқин намунасидир.
Ўзбекистон мусулмонлари идораси
Сирдарё вилояти вакиллиги
Матбуот хизмати
«Асрларни бирлаштирувчи мерос»: медиафорумда Қуръон, қўлёзмалар ва сунъий интеллектга оид лойиҳалар тақдим этилади
«Ислом цивилизацияси: янги нигоҳ — янги кашфиётлар» Халқаро медиафорумининг учинчи ялпи сессияси 26 август куни «Асрларни бирлаштирувчи мерос. Ислом цивилизациясининг маънавий мазмун-моҳияти» мавзусида бўлиб ўтмоқда. Сессияда Қуръон мероси, қадимий қўлёзмалар, хаттотлик, ҳужжатли кино ҳамда тарихий манбаларни ўрганишда сунъий интеллектдан фойдаланиш масалалари ўрин олган, хабар бермоқда iccu.uz.
Асосий лойиҳалардан бири — «114 Қуръон: ислом олами хаттотлигининг 114 дурдонаси» бўлади. Уни Mueller & Schindler нашриёт уйи вице-президенти Александр Вильгельм тақдим этди. Шунингдек, сессияда «Катта Лангар Қуръони: ҳақиқат ва афсоналар» халқаро лойиҳаси тақдимоти бўлиб ўтди. Уни Ислом цивилизацияси маркази илмий котиби Рустам Жабборов тақдим қилди.
Санкт-Петербург ҳужжатли фильмлар студияси бош директори Алексей Тельнов «Ягона тарихий мерос саҳифалари» лойиҳаси доирасида яратилган «Масжид» фильмининг трейлерини намойиш этди. Исломшунос ва маданият арбоби Кетлин Гёбель иштирокчиларни «Аллоҳнинг 99 исми: Унинг гўзал исмлари орқали Яратганни англаш» ноширлик лойиҳаси билан таништирди.
Алоҳида блок янги технологияларга бағишланади. Сбербанк Истиқболли технологияларни ривожлантириш бошқармаси ижрочи директори Владимир Кох ҳамда Ислом цивилизацияси маркази профессори, бош илмий ходими Зоҳидулло Мунавваров «Сунъий интеллект — қадимий қўлёзмаларни ўқишнинг рақамли калити» лойиҳасини тақдим этади. Дастурдан, шунингдек, «Пайғамбарнинг фазилатлари» китоби ва «Ўзбекистон тарих харитасида: империялар, цивилизациялар, даврлар» лойиҳаси ҳам ўрин олган.
Халқаро мунозара «Жаҳолатдан маърифат сари: стереотиплар ва исломофобияни бартараф этишда медианинг ўрни» мавзусида ўтказилади. Унда Ислом ҳамкорлик ташкилоти, шунингдек, Жазоир, Уммон, Покистон, Саудия Арабистони, Ироқ, Мали ва Ўзбекистоннинг давлат ва халқаро оммавий ахборот воситалари вакиллари иштирок этади.
Бундан ташқари, Ўзбекистон Журналистлар уюшмаси раиси Шуҳрат Ориф «Журналистикада тарих ва сунъий интеллект: меросни онлайн маконда қандай сақлаш мумкин?» лойиҳасини, Ислом цивилизацияси маркази медиа бўлими раҳбари Ўктам Усманов эса «Ўзбекистонни дунёга машҳур қилган олимлар» китобини тақдим этади. Сессия «Дунё Қуръони: хаттотлик анъаналаридан — келажак мероси сари» тақдимоти билан якунланади. Ислом цивилизацияси маркази ҳузуридаги Хаттотлик мактаби директори Ҳабибулло Солиҳ турли мамлакатлар ва ислом хаттотлик мактаблари анъаналарини бирлаштирувчи ноёб Қуръонни яратиш бўйича хаттотлар ўртасидаги Жаҳон танловини эълон қилади.
Форумнинг асосий майдони Ўзбекистондаги Ислом цивилизацияси маркази бўлади. Унда деярли 50 мамлакатдан медиа ва экспертлар ҳамжамиятининг 300 нафар вакили — медиакомпаниялар, ахборот агентликлари ва телеканаллар раҳбарлари, журналистлар, продюсерлар, олимлар ҳамда креатив индустрия мутахассислари иштирок этади.
Ўзбекистон мусулмонлари идораси Матбуот хизмати
