Бўлажак муҳаддисларга “Муватто” асаридан ижоза берилди
Тошкент ислом институтида “Май – Ҳадис илмлари фан ойлиги” муносабати билан улуғ муҳаддис Имом Муҳаммаднинг “Муватто” асарини ўқиб тугатган талабаларга ижоза бериш ва “Хатми кутуб” тадбири бўлиб ўтди.
Мазкур хайрли анъана доирасида “Ҳадис ва ислом тарихи фанлари” кафедраси катта ўқитувчилари Раҳматуллоҳ Махсухонов ҳамда Мансур Жамбилов бошчилигида магистратура ва бакалавриат босқичи талабалари ушбу бебаҳо асарни тўлиқ хатм қилдилар.
Институт масъуллари ва Ўзбекистон мусулмонлари идораси вакиллари иштирок этган тадбирда устозлар томонидан хатми кутуб қилишнинг фазилати, Имом Муҳаммаднинг ҳадис илмида тутган юксак ўрни ва Расулуллоҳ соллаллоҳу алайҳи васалламнинг суннатларига муҳаббатли бўлиш масъулияти алоҳида таъкидланди.
Тадбир якунида устозлар талабаларга ҳадис ривоят қилиш учун расмий ижоза (силсила) ва сертификатларни топшириб, уларнинг ҳаққига хайрли дуолар қилишди. Шунингдек, талабаларга ушбу бебаҳо асарни ўргатган фидойи устозлар институт раҳбарияти томонидан ташаккурнома ва қимматбаҳо совғалар билан тақдирландилар.
Тошкент ислом институти
Матбуот хизмати
Байрам шукуҳи Жиззахда ҳам давом этмоқда
Ўзбекистон Республикаси давлат мустақиллигининг 35 йиллиги арафасида “Вақф” хайрия жамоат фондининг Жиззах вилояти филиали томонидан хайрия тадбири ташкил этилди.
Вилоятнинг турли ҳудудларидан бўлган боқувчисини йўқотган 35 нафар боланинг хатна тўйи қилиб берилди.
Тадбирда болажонларга велосипед, костюм-шим ва кўйлаклар, ширинликлар қутиси совға қилиниб, байрам дастурхони ёзилди.
Болажонларга қўшилиб, уларнинг яқинлари ҳам қувончдан ташаккур айтиб, ташкилотчилар, Юртбошимиз ҳақларига дуолар қилишди.
Шунингдек, тадбир доирасида ижтимоий ҳимояга муҳтож, боқувчисини йўқотган ҳамда кам таъминланган оилалар фарзандларига эътибор ва ғамхўрлик кўрсатилиб, уларга ҳам ҳадялар улашилди.
Бундай эзгу ташаббуслар жамиятда ўзаро меҳр-оқибат, саховат ва ҳамжиҳатлик муҳитини мустаҳкамлаш, ёш авлод қалбида Ватанга муҳаббат ва инсонпарварлик туйғуларини юксалтиришга хизмат қилади.
Ўзбекистон мусулмонлари идораси
Матбуот хизмати
