1 июнь – Халқаро болаларни ҳимоя қилиш куни муносабати билан Самарқанд вилояти Иштихон туманида 100 нафардан зиёд болажонлар учун хайрия ва меҳр-мурувват тадбири ташкил этилди.
Тадбирда вилоят бош имом-хатиби ўринбосари Хайрулло домла Саттаров ҳамда туман бош имом-хатиби Тошмуҳаммад домла Абилов иштирок этдилар. Диний соҳа вакиллари юртимизда фарзандларнинг бахтли ва соғлом вояга етиши, уларга қаратилаётган юксак эътибор ва яратилаётган имкониятларнинг шаръий ҳамда инсоний аҳамияти ҳақида сўз юритдилар.
Хайрли ташаббус доирасида болажонлар учун байрам дастурхони ёзилиб, уларга махсус совғалар, ширинликлар ва турли эҳсонлар улашилди. Меҳр-оқибат ва инсонпарварлик намунаси бўлган ушбу тадбир жажжи қалбларда унутилмас таассурот қолдирди.
Aллоҳ таоло юртимиз фарзандларини илмли, одобли, соғлом ва Ватанимиз равнақига муносиб инсонлар қилиб камол топтирсин!
Ўзбекистон мусулмонлари идораси
Матбуот хизмати
Ўзбекистон мусулмонлари идораси тасарруфидаги олий ва ўрта махсус диний таълим муассасаларига 2026-2027 ўқув йили учун кириш тест синовларининг 5-ҳудуд (Бухоро вилояти) бўйича имтиҳон жараёнлари Мир Араб олий мадрасаси биносида бўлиб ўтди.
Мазкур ҳудуд бўйича диний таълим муассасаларига ҳужжат топширган 657 нафар абитуриент тест синовларида иштирок этди.
Имтиҳонларнинг шаффофлиги, адолатлилиги ҳамда тартиб-интизомини таъминлаш мақсадида жараёнларга Дин ишлари бўйича қўмита ва Ўзбекистон мусулмонлари идораси масъул раҳбарлари, диний таълим муассасалари мутасаддилари, педагог-ўқитувчилар ҳамда ички ишлар ва тиббиёт ходимлари жалб этилди.
Тест синовлари бошланишидан олдин абитуриентларга имтиҳон топшириш тартиби ва баҳолаш мезонлари батафсил тушунтирилди. Барча жараёнлар белгиланган талаб ва қоидаларга мувофиқ, юқори даражада ташкил этилди.
Ташкилотчилар тест жараёнларининг шаффоф ва тартибли ўтишига яқиндан кўмаклашган Бухоро шаҳар ички ишлар органи, соғлиқни сақлаш бошқармаси тиббиёт ходимлари ҳамда диний таълим муассасалари вакилларига ўз миннатдорлигини билдирдилар.
Ўзбекистон мусулмонлари идораси
Матбуот хизмати