Диний идорада "Спорт куни" дўстона ва қизғин руҳда ўтди
Саломатликни мустаҳкамлаш, танани тетик ва бардам сақлашнинг энг самарали йўли жисмоний тарбия ва спортдир. Халқимизда “Соғ танда — соғлом ақл” деган ҳикматли ибора бежиз айтилмаган. Тана соғлом бўлса, инсоннинг фикрлаши ва иш унумдорлиги ҳам юқори бўлади.
Айни мақсадни кўзлаган ҳолда Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ташаббуслари билан тизимда соғлом турмуш тарзини кенг тарғиб қилиш ва соҳа ходимларининг жисмоний фаоллигини ошириш мақсадида ҳафтанинг ҳар жума куни “Спорт куни” деб белгиланган.
Шу хайрли ташаббуснинг амалий ижроси сифатида бугун Диний идора ходимлари ўртасида стол тенниси бўйича мусобақа ўтказилди. Унда ходимлар ўзларининг чаққонлик ва спортдаги маҳоратларини намойиш этди.
Мазкур спорт тадбири орқали диний соҳа ходимлари Расулуллоҳ соллаллоҳу алайҳи васалламнинг «Кучли мўмин кучсиз мўминдан кўра Аллоҳга яхшироқ ва севимлироқдир» (Имом Муслим ривояти), деган муборак ҳадисларини амалда исботладилар.
Пайғамбаримиз соллаллоҳу алайҳи ва салламнинг ўзлари ҳам жисмоний фаол бўлиб, саҳобаларни от миниш, камондан ўқ отиш, югуриш ва курашга чақирганлар.
Бу каби мусобақалар ходимлар ўртасида ўзаро аҳиллик, ҳамжиҳатлик ва соғлом рақобат муҳитини кучайтиришга, уларнинг ижодий ва иш фаолиятини янада юқори босқичга олиб чиқишга хизмат қилади.
Маълумот ўрнида, стол тенниси – нафақат юрак-қон томир тизимини мустаҳкамловчи ажойиб машқ, балки кўриш қобилиятини табиий равишда яхшовчи энг фойдали спорт туридан биридир. Айниқса, телефон ва гаджетлардан фойдаланиш кўпайган бугунги кунда бу ўйин – доимий ҳаракатдаги тўпни кузатиш орқали кўз мушакларини чиниқтиради, чарчоқни олади ва диққатни жамлашга ёрдам беради.
Ўзбекистон мусулмонлари идораси
Матбуот хизмати
“Uthaym” газетаси: Маданий меросни асраш Янги Ўзбекистон тараққиётининг муҳим йўналишига айланган
Шри-Ланканинг “Uthaym” нашрида Ўзбекистоннинг бой тарихий-маданий мероси, уни асраб-авайлаш ва келажак авлодларга безавол етказиш борасида амалга оширилаётган ишларга бағишланган мақола эълон қилинди, деб хабар бермоқда “Дунё” АА.
Материалда Янги Ўзбекистонда миллий қадриятларни тиклаш, маданий мерос объектларини муҳофаза қилиш, илм-фан ва маърифатни ривожлантиришга қаратилган ислоҳотлар юксак баҳоланган.
Таъкидланганидек, сўнгги йилларда Ўзбекистонда маънавий-маърифий соҳани тубдан такомиллаштириш, халқнинг кўп асрлик бой илмий-маданий меросини ўрганиш ҳамда уни жаҳон ҳамжамиятига кенг тарғиб этиш давлат сиёсатининг устувор йўналишларидан бирига айланди.
Мамлакатда тарихий обидаларни реставрация қилиш, музейлар ва архивлар фаолиятини модернизация қилиш, қўлёзмаларни асраб-авайлаш ва рақамлаштириш, миллий маданий меросни халқаро миқёсда тарғиб қилишга қаратилган тизимли ишлар амалга оширилаётгани қайд этилган.
Мақолада Президент Шавкат Мирзиёев ташаббуси билан илгари сурилган Учинчи Ренессанс ғояси мамлакат тараққиётининг муҳим стратегик йўналиши сифатида алоҳида эътироф этилган. Муаллиф фикрича, мазкур ғоя нафақат тарихий меросни асраб-авайлаш, балки илм-фан, таълим, маданият ва инновацияларни уйғун ривожлантириш орқали мамлакатнинг интеллектуал ва маънавий салоҳиятини юксалтиришга хизмат қилмоқда.
Учинчи Ренессанс концепцияси Ўзбекистоннинг буюк илмий анъаналарини қайта тиклаш, ёш авлодни билимли ва ватанпарвар этиб тарбиялаш ҳамда мамлакатнинг халқаро нуфузини янада мустаҳкамлашга қаратилган умуммиллий дастур сифатида баҳоланмоқда.
Газетанинг ёзишича, Ўзбекистонда кечаётган ўзгаришлар фақат маданий соҳадаги ислоҳотлар билан чекланмайди. Улар мамлакатнинг илмий, маънавий ва интеллектуал тараққиётини таъминлашга қаратилган узоқ муддатли стратегиянинг ажралмас қисми ҳисобланади. Илмий муассасалар фаолиятини қўллаб-қувватлаш, тарихий манбаларни тадқиқ этиш, маданий меросни муҳофаза қилиш ва замонавий таълим тизимини ривожлантириш каби йўналишлар ягона мақсад — Янги Ўзбекистоннинг мустаҳкам маънавий пойдеворини яратишга хизмат қилаётгани алоҳида қайд этилган.
Мақолада Тошкент шаҳрида барпо этилган Ўзбекистон Ислом цивилизацияси маркази фаолиятига кенг ўрин ажратилган.
Президент Шавкат Мирзиёев ташаббуси ва ғояси асосида барпо этилган мазкур бетакрор мажмуа Ўзбекистоннинг маданий ва илмий сиёсатидаги энг муҳим истиқболли лойиҳалардан бири бўлди. Марказда VII асрга оид ноёб Усмон Мусҳафи сақланаётгани унинг тарихий аҳамиятини янада оширади.
Шу билан бирга, бу ерда қўлёзмаларни илмий ўрганиш, реставрация қилиш, архив материалларини тизимлаштириш ва замонавий технологиялар асосида рақамлаштириш учун барча зарур шароитлар яратилган.
Газетада Ўзбекистоннинг ЮНЕСКО ва бошқа халқаро ташкилотлар билан маданий меросни муҳофаза қилиш соҳасидаги ҳамкорлиги, тарихий обидаларни асраб-авайлаш, уларни халқаро туризм ва илмий тадқиқотлар билан уйғун ривожлантиришга қаратилган саъй-ҳаракатлари ҳақида сўз юритилган.
Ўзбекистон мусулмонлари идораси Матбуот хизмати
- «
- »