Бухоролик аждодимизнинг ақида китоби бўйича ижозалар берилди
Бугун, 22 июнь куни Имом Мотуридий халқаро илмий-тадқиқот маркази ва Имом Бухорий номидаги Тошкент ислом институти устозлари томонидан бухоролик аллома Нуриддин Собунийнинг “Ал-Бидоя фил-ҳидоя” китоби бўйича ижоза бериш тадбири бўлиб ўтди. Унда соҳа вакиллари, профессор-ўқитувчилар, талаба-ёшлар, ОАВ вакиллари иштирок этди.
Имом Мотуридий халқаро илмий-тадқиқот маркази етакчи илмий ходими, доктор Аҳмад Саъд Даманҳурий бошчилигида Тошкент ислом институтининг 17 нафар профессор-ўқитувчиси икки йил давомида ушбу асарни ўқиб тугатиб, ижоза олишга муваффақ бўлди.
Маълумот ўрнида, Бухоро калом мактабининг улуғ намояндаси Нуриддин Собунийнинг ушбу асари аҳли сунна вал жамоа, хусусан, ҳанафий-мотуридийлик ақидасини тизимли ва мантиқий асосда ёритиб берган энг мўътабар манбалардан саналади. Муаллифнинг шоҳ асари бўлмиш “Ал-Кифоя фил-ҳидоя”нинг мухтасари (ихчам шакли) бўлган бу китоб асрлар давомида Мовароуннаҳр ва хорижий ўлкалар мадрасаларида асосий дарслик бўлиб келган.
Бу каби хайрли илмий тадбирлар устозларнинг маҳоратини ошириш билан бир қаторда, соф ислoм ақидасини ёт ғоялардан ҳимоя қилиш ва мотуридия таълимотини халқимизга тўғри етказишда улкан аҳамият касб этади.
Ўзбекистон мусулмонлари идораси
Матбуот хизмати
Пол Капур: «Бу ерда тарихни нафақат кўрасиз, балки уни ҳис қиласиз»
АҚШ Давлат котибининг Жанубий ва Марказий Осиё ишлари бўйича ёрдамчиси Самир Пол Капур Ўзбекистондаги Ислом цивилизацияси марказига ташриф буюрди, хабар бермоқда iccu.uz.
Ислом цивилизациясининг кўп асрлик тарихи, унинг илм-фан, маданият ва маърифат тараққиётига қўшган улкан ҳиссаси Ўзбекистондаги Ислом цивилизацияси маркази экспозицияларида яхлит ва таъсирчан тарзда намоён этилган. Ташриф давомида Самир Пол Капур исломгача бўлган давр цивилизацияларидан тортиб, Янги Ўзбекистон даврига қадар бўлган тарихий жараёнларни акс эттирувчи галереялар, буюк алломаларнинг илмий-маърифий мероси, ноёб қўлёзмалар, муқаддас ёдгорликлар ҳамда замонавий рақамли технологиялар асосида яратилган интерактив экспозициялар билан яқиндан танишди.
Меҳмон экспозицияларнинг мазмунан изчиллиги ва тарихий жараёнларни бир-бири билан узвий боғлиқ ҳолда намоён этиш усулига алоҳида эътибор қаратди. Унинг қайд этишича, бу ерда музей экспонатлари орқали ўтмиш ҳақида маълумот олиш билан чекланиб қолмай, тарихий даврлар руҳини ҳис қилиш, улар ўртасидаги боғлиқликни англаш имкони ҳам мавжуд.
Самир Пол Капур ўз таассуротларини қуйидагича ифодалади:
«Бу муҳташам маскан. Ислом тарихи ва маданиятининг асрлар давомидаги тараққиёти билан яқиндан танишиш мен учун унутилмас тажриба бўлди. Бу ерда тарихни шунчаки китоб саҳифалари орқали эмас, балки ўз кўзингиз билан кўрасиз, уни ҳис қиласиз ва гўё ўша даврларнинг ичида бўласиз. Шу боис ушбу ноёб масканни барпо этишга ҳисса қўшган барча инсонларга самимий миннатдорчилик билдираман.
Ёшларга ҳам бу ерга келишни албатта тавсия қиламан. Чунки бу маскан нафақат тарихни ўрганиш, балки ўтмиш билан келажак ўртасидаги узвий боғлиқликни англаш имконини беради. Мен учун энг эсда қоларли лаҳзалардан бири Қуръони каримга бағишланган голографик намойиш бўлди. У менда катта таассурот ва ҳаяжон уйғотди.
Менимча, бу даргоҳ ислом цивилизациясининг жаҳон тамаддунига қўшган улкан ҳиссасини бутун дунёга намоён этишга хизмат қилади. Шунинг учун ҳар бир инсон бу ерга ташриф буюриб, ана шу бой ва бебаҳо мерос билан шахсан танишиши лозим».
Пол Капурнинг фикрича, Марказнинг аҳамияти унинг тарихий меросни намоён этиш билангина чекланмайди. Ушбу маскан ёш авлод учун ўтмиш сабоқларини англаш, илм-фан ва маърифатнинг цивилизация тараққиётидаги ўрнини ҳис этиш, миллий ва умуминсоний қадриятларга ҳурмат руҳини шакллантириш учун ҳам муҳим маънавий-маърифий майдон вазифасини ўтайди.
Ташриф якунида АҚШ Давлат котибининг Жанубий ва Марказий Осиё ишлари бўйича ёрдамчиси Самир Пол Капур Ислом цивилизацияси марказидан олган таассуротлари юксак эканини қайд этиб, ушбу маскан бой тарихий меросни замонавий музей технологиялари ва таъсирчан тақдимот усуллари орқали жаҳон жамоатчилигига етказишда муҳим аҳамият касб этишини таъкидлади.
Ўзбекистон мусулмонлари идораси Матбуот хизмати