Ҳамдардлик билдирамиз
Ўзбекистон мусулмонлари идораси жамоаси Наманган вилояти Уйчи туманидаги "Девонабобо" жоме масжиди имом-хатиби Абдуфаттоҳ домла Мусахановнинг волидаи меҳрибонларининг вафоти муносабати билан у кишининг оила аъзолари ва яқинларига чуқур таъзия изҳор этади.
Аллоҳ таоло марҳума онахонни Ўз мағфиратига олсин, иймонлари ва солиҳ амалларини ўзларига ҳамроҳ айласин. Охиратларини обод этиб, жойларини Фирдавс жаннатларидан қилсин!
Ҳақ таоло марҳума онахоннинг аҳли оиласи, фарзанду аржумандлари ва яқинларига чиройли сабр бериб, бу мусибатларини яхшиликлар ила тўлдирсин.
Ўзбекистон мусулмонлари идораси жамоаси, Уламолар кенгаши аъзолари, имом-домлалари ва ўқитувчи-мударрислари номидан марҳума онахоннинг яқинларига, хусусан, Абдуфаттоҳ домла Мусахановга ҳамдардлик билдиради.
Жаноза бугун, 14 июль куни шом намозидан сўнг Уйчи туманидаги "Машҳад мозор" жоме масжидида ўқилади.
Иннаа лиллааҳи ва иннаа илайҳи рожиъуун.
«Мусибат етганда “Албатта, биз Аллоҳникимиз ва албатта, биз Унга қайтувчимиз”, деган сабрлиларга хушхабар беринг».
Ўзбекистон мусулмонлари идораси
Хушхабар: Хожа Бухорий таълим муассасаси мудири илмий даражага эга бўлди
Хожа Бухорий ўрта махсус ислом таълим муассасаси мудири Ўткир домла Ғузаров педагогика фанлари бўйича фалсафа доктори (PhD) илмий даражасига эга бўлди.
Тадқиқотчи Ўткир Умбарович Ғузаров Қарши давлат университети ҳузуридаги Илмий кенгашда 13.00.01 – "Педагогика назарияси. Педагогик таълимотлар тарихи" ихтисослиги бўйича "Педагогик жараёнда Бурҳониддин ан-Насафийнинг дидактик ғояларини тизимлаштириш механизмлари" ("Гўзал хулқлар" асари мисолида) мавзусидаги диссертация ишини муваффақиятли ҳимоя қилди.
Ушбу илмий натижа таълим муассасаси жамоаси учун катта қувонч бўлиб, диний таълим тизимида илмий-тадқиқот ишларини чуқурлаштириш ва аждодларимиз бой маънавий меросини замонавий педагогикага татбиқ этиш йўлидаги муҳим қадамлардан биридир.
Ўзбекистон мусулмонлари идораси жамоаси Ўткир домла Ғузаровни қўлга киритилган илмий даража билан самимий қутлаб, илм йўлидаги саъй-ҳаракатларига барака, келгуси илмий-педагогик фаолиятига улкан зафарлар тилайди.
Ўзбекистон мусулмонлари идораси
Матбуот хизмати
