17 Август, 2026, 4 Рабиъул аввал, 1448
17 Август, 2026, 4 Рабиъул аввал, 1448
Германиянинг “Hauptstadtecho” оммабоп электрон нашрида 7–11 июль кунлари юртимизда бўлиб ўтган I Халқаро ислом цивилизацияси форуми иштирокчиларининг Ўзбекистон Президенти Шавкат Мирзиёевга йўллаган мурожаатига бағишланган мақола эълон қилинди, деб хабар бермоқда “Дунё” АА.
Унда форум иштирокчилари мамлакатимизда ислом цивилизациясининг бой илмий, маънавий ва маданий меросини ўрганиш, асраб-авайлаш ҳамда халқаро миқёсда тарғиб этиш борасида амалга оширилаётган ишларни юксак баҳолагани таъкидланган.
Мурожаатда 50 дан ортиқ мамлакатнинг халқаро ташкилотлари, илмий ва таълим муассасалари раҳбарлари, вазирлар, муфтийлар, олимлар ва экспертлари номидан Ўзбекистон раҳбарига чуқур ҳурмат ва самимий миннатдорлик билдирилган.
Форум давлатимиз раҳбари ташаббуси билан ташкил этилгани, у глобал илмий ва гуманитар ҳамкорлик учун муҳим майдонга айлангани қайд этилган. Президентнинг форум қатнашчиларига йўллаган мурожаатида илгари сурилган ғоя ва тамойиллар анжуман кун тартибини белгилаб, самарали халқаро илмий ҳамкорлик учун мустаҳкам асос яратгани таъкидланган.
Шунингдек, форумнинг Тошкент, Самарқанд ва Термиз шаҳарларида ўтказилиши унинг тарихий ва илмий аҳамиятини янада оширгани, бу заминда асрлар давомида илоҳиёт, фалсафа, тиббиёт, математика ва астрономия каби илмлар ривож топгани алоҳида эътироф этилган.
Форум иштирокчилари Президент Шавкат Мирзиёевнинг 2017 йил БМТ Бош Ассамблеясининг 72-сессиясида илгари сурган Ислом цивилизацияси марказини ташкил этиш ташаббусини сўнгги ўн йилликдаги энг муҳим халқаро гуманитар ташаббуслардан бири сифатида баҳолаган.
Мурожаат якунида Ўзбекистон заминида қабул қилинган қарорлар тинчлик, маърифат, ўзаро ҳурмат ва халқлар ўртасидаги ҳамкорликни мустаҳкамлашга, ислом цивилизациясининг бой маънавий ва интеллектуал меросини келгуси авлодларга етказишга хизмат қилишига ишонч билдирилган.
Ўзбекистон мусулмонлар идораси Матбуот хизмати
Малайзиянинг “Berita RTM” телеканалида Ўзбекистонда зиёрат туризми соҳасида амалга оширилаётган ислоҳотларга бағишланган махсус дастур намойиш этилди, деб хабар бермоқда “Дунё” АА.
Мамлакатимиз мустақиллигининг 35 йиллиги арафасида эфирга узатилган ушбу кўрсатувда малайзиялик профессорлар – Бадрул Иса ва Норфадилаҳ Камаруддин томонидан ишлаб чиқилган “Ўзбекистон–Малайзия: креатив туризм” номли лойиҳа тақдим этилди.
Олимлар ташаббуси билан яратилган мазкур лойиҳа мамлакатимизнинг Малайзиядаги элчихонаси, Туризм қўмитаси ва Ислом цивилизацияси маркази ҳамкорлигида амалга оширилди.
Ташаббус Ўзбекистоннинг туризм имкониятлари ҳақида “Visual storytelling” форматида профессионал рақамли контент яратишни назарда тутади.
Лойиҳага кўра, 17–31 август кунлари Малайзия UiTM технология университетининг профессионал фотографлари ва дизайнерларидан иборат ижодий жамоа Тошкент, Самарқанд, Бухоро ва Хоразмда суратга олиш ишларини олиб боради.
Малайзиялик ижодкорлар юртимиз ҳақида тайёрлаган фото ва видеоматериаллар “Instagram”, “Facebook”, “TikTok”, “YouTube” каби интернет платформаларда жойлаштирилиши режалаштирилган. Лойиҳада юртимиз олий ўқув юртларининг дизайн, санъат, туризм ва меҳмонхона бизнеси йўналишидаги талабалари ҳам иштирок этади. Бу академик, туризм ва ижодий соҳаларда тажриба алмашишни ташкил этиш имконини беради.
Дастурда фикр билдирган Бадрул Иса лойиҳа АСЕАН мамлакатлари ва мусулмон оламида Ўзбекистонни янада кенгроқ танитишга хизмат қилишини таъкидлади. Унинг фикрича, рақамли платформалар орқали мамлакатимиз тарихий мероси, зиёрат туризми ва амалга оширилаётган сўнгги ўзгаришлари кенг ёритилади.
“Биз бой тарихий мерос, юксак маданият ва меҳмондўст халққа эга бўлган Ўзбекистонни АСЕАН минтақаси аҳолиси томонидан қайта кашф этилишини истаймиз”, – деди профессор.
Шунингдек, у Ўзбекистон халқини мустақилликнинг 35 йиллиги билан табриклаб, лойиҳа натижалари ушбу санага муносиб совға бўлишини қайд этди.
Ушбу ташаббус Ўзбекистоннинг зиёрат туризмини оммалаштириш ва АСЕАН мамлакатларидан кўпроқ сайёҳларни жалб қилишга хизмат қилиши кутилмоқда.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 