Андижон вилоятида имом-хатибларнинг 6 ойлик фаолияти сарҳисоб қилиниб, амалий семинар-йиғилиш ўтказилди
2026 йил 15 июль куни Ўзбекистон мусулмонлари идорасининг Андижон вилояти вакиллиги мажлислар залида вилоятда фаолият юритаётган барча имом-хатиблар иштирокида 2026 йилнинг биринчи ярим йиллиги якунларига бағишланган йиғилиш бўлиб ўтди.
Йиғилишда вилоят ҳокими ўринбосари Абдусаттор Отабоев ҳамда вилоят бош имом-хатиби Мирзамақсуд домла Алимов иштирок этиб, аҳоли ўртасида маънавий-маърифий тарғибот ишларини кучайтириш, юртимизда амалга оширилаётган ислоҳотлар мазмун-моҳиятини кенг тарғиб қилиш, ёт ғоялар таъсирининг олдини олиш, ижро интизомини мустаҳкамлаш, ЎМИ устави ҳамда қонунчилик талабларига қатъий риоя этиш масалалари юзасидан тегишли кўрсатма ва топшириқлар бердилар. Шунингдек, биринчи ярим йилликда амалга оширилган ишлар таҳлил қилиниб, йўл қўйилган камчиликлар муҳокама қилинди ҳамда келгусидаги устувор вазифалар белгилаб олинди.
Шундан сўнг вилоят имом-хатибларининг “Эзгулик ва маърифат тарғиботчилари” ташаббуси доирасида Андижон туманида навбатдаги амалий семинар-йиғилиши ташкил этилди.
Семинар давомида ишчи гуруҳлар маҳаллалар ва масжидларда ўрганишлар ўтказиб, ижтимоий ҳимояга муҳтож оилалар ҳолидан хабар олдилар, маънавий-маърифий тарғибот тадбирларини амалга оширдилар ҳамда масжидлар фаолиятини янада такомиллаштириш юзасидан амалий тавсиялар бердилар. Семинар якунида амалга оширилган ишлар сарҳисоб қилиниб, тегишли вазифалар белгилаб берилди.
"Имом Бухорий" ордени — юксак эҳтиром рамзи!
Куни кеча мамлакатимиз мустақиллигининг 35 йиллиги муносабати билан муҳтарам Президентимиз томонидан юксак давлат мукофотларига сазовор бўлган бир гуруҳ ватандошларимиз тақдирланди.
Энг қувончлиси шуки, тадбирда диний-маърифий соҳада фидокорона хизмат қилиб келаётган, халқимизнинг маънавий юксалишига беқиёс ҳисса қўшаётган таниқли уламоларимиз ва фахрийларимизнинг заҳматли меҳнатлари юксак даражада эътироф этилди!
Хусусан, Диний идора тизимида узоқ йиллардан бери самарали хизмат қилиб келаётган устозлардан Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, Ўзбекистон мусулмонлари идораси Фахрийлар кенгаши раиси Шайх Абдулазиз Мансур, Самарқанд вилояти Пайариқ тумани "Имом ал-Бухорий" жоме масжиди фахрий имоми Маҳмуджон домла Ибодуллаев, Бухоро вилояти Когон тумани "Баҳоуддин Нақшбанд" жоме масжиди имом-хатиби Абдуғофур домла Раззоқов "Имом Бухорий" орденини Давлатимиз Раҳбаридан қабул қилиб олишди.
Устозларнинг илмий-маърифий фаолияти, халқ ичида маърифат улашишдаги фидойиликлари давлатимиз томонидан юксак қадрлангани бутун диний-маърифий соҳада меҳнат қилаётганлар учун катта фахр ва шарафдир.
Ушбу воқеа Янги Ўзбекистонда диний-маърифий соҳага, миллий қадриятларимизни авайлаб-асраш ҳамда ривожлантиришга қаратилаётган изчил ва хайрли сиёсатнинг амалий ифодасидир.
Халқимизда қадимдан маърифат аҳлини улуғлаш, уларнинг заҳматли меҳнатини қадрлаш эзгу анъана саналади. Ислом таълимотида ҳам илм эгаларига алоҳида мақом ва ҳурмат билан қаралади. Зеро, Имом Термизий бобомиз ривоят қилган ҳадиси шарифда: «Уламолар пайғамбарларнинг меросхўрларидир», дейилган.
Уламоларга кўрсатилаётган бундай эътиборнинг нечоғли хайрли экани қуйидаги ҳикматда ҳам ўз ифодасини топган. Улуғ зотлардан бири Товус раҳматуллоҳи алайҳ отасидан қуйидагича ривоят қилган: «Тўрт кишини ҳурмат қилиш суннатдир: олим, ёши улуғ инсон, подшоҳ ва ота» (Имом Абдураззоқ ривояти).
Мазкур юксак мукофот миллий ва диний қадриятларимизни тиклаш, Ислом маърифатини кенг тарғиб этиш, жамиятда бағрикенглик ва тинчлик-омонликни бардавом сақлаш йўлидаги кўп йиллик хайрли хизматларнинг муносиб эътирофидир.
Давлатимизнинг бундай эътибори диний соҳа ходимларига янада улкан масъулият юклайди, маънавий юксалиш йўлидаги хайрли хизматлар кўламини янада кенгайтиришга хизмат қилади, инша Аллоҳ.
Ўзбекистон мусулмонлари идораси Матбуот хизмати
- «
- »