15 Ноябр, 2026, 5 Жумадул сони, 1448
15 Ноябр, 2026, 5 Жумадул сони, 1448
Юртимизда ҳар йили 1 октябрь – Ўқитувчи ва мураббийлар куни байрами сифатида кенг нишонланади. Бу айём жамиятимизда муаллимларга кўрсатилаётган чексиз ҳурмат-эҳтиромнинг рамзий ифодаси бўлиб, аслида, устозни улуғлаш аждодларимиздан мерос бўлиб келаётган энг гўзал қадриятлардан биридир.
Муқаддас динимизда илм аҳли ва устозларнинг мақоми ниҳоятда юксак. Қуръони каримнинг Мужодала сураси 11-оятида уларнинг обрў-эътибори нақадар баланд экани шундай баён қилинади: «...Аллоҳ сизлардан имон келтирганларни ва илм берилганларни (баланд) даража (мартаба)ларга кўтарур».
Касб байрами муносабати билан Қорақалпоғистон мусулмонлари қозиёти қозиси ва ҳудуддаги жоме масжидлар имом-хатиблари, шунингдек, Нукус шаҳридаги «Муҳаммад ибн Аҳмад ал-Беруний» ўрта махсус ислом таълим муассасаси мудири ҳамда мударрислари иштирокида хайрли тадбир ташкил этилди.
Тадбир доирасида кўп йиллар давомида диний соҳада самарали меҳнат қилиб, ёшларга илм-маърифат улашган ва бугунги кунда кексалик гаштини сураётган фахрий устозларнинг ҳолидан хабар олинди. Уламолар ва диний соҳа ходимлари муҳтарам устозларни байрам билан самимий муборакбод этдилар.
Аллоҳ таоло динимиз равнақига беминнат хизмат қилган азиз устозларимизга мустаҳкам соғлик, мазмунли умр ва оилавий хотиржамлик ато қилсин!
Қорақалпоғистон мусулмонлари қозиёти
Матбуот хизмати
«Дорул ҳадис Аввомийя» илмий-тадқиқот маркази томонидан Ҳадис илми мактабига ҳадис илми ва исломий илмларнинг турли соҳаларига оид бир қанча китоблар ҳадя қилинди.
Мазкур китоблар орасида замонамизнинг таниқли муҳаддис олимларидан Шайх Муҳаммад Аввома, доктор Муҳйиддин Аввома ҳамда бошқа етук уламоларнинг илмий асарлари ўрин олган.
Тақдим этилган адабиётлар ҳадис ва ҳадис илмлари, мусталаҳул ҳадис, ақоид, турли адашган оқим ва тоифаларнинг қарашларига илмий раддиялар ҳамда бошқа диний илмларга оид асарларни ўз ичига олади. Ушбу китоблар аҳли сунна вал жамоа ақидаси ва ҳанафий мазҳаби илмий анъаналарига мувофиқлиги билан алоҳида аҳамият касб этади.
Шунингдек, институт ўқитувчилари томонидан нашр этилган китоблардан ҳам кутубхонага тақдим этилди.
Мазкур илмий туҳфа Ҳадис илми мактабининг китоб фондини бойитиш, профессор-ўқитувчилар ва талабаларнинг илмий изланишларини қўллаб-қувватлаш, шунингдек, ҳадисшунослик ва исломий илмлар бўйича тадқиқотлар кўламини кенгайтиришга хизмат қилади.
Ҳадис илми мактаби жамоаси ушбу илмий ҳадя учун «Дорул ҳадис Аввомийя» илмий-тадқиқот маркази раҳбарияти ва ходимларига самимий миннатдорлик билдиради.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа