Устозлар доимо эъзозда
Юртимизда ҳар йили 1 октябрь – Ўқитувчи ва мураббийлар куни байрами сифатида кенг нишонланади. Бу айём жамиятимизда муаллимларга кўрсатилаётган чексиз ҳурмат-эҳтиромнинг рамзий ифодаси бўлиб, аслида, устозни улуғлаш аждодларимиздан мерос бўлиб келаётган энг гўзал қадриятлардан биридир.
Муқаддас динимизда илм аҳли ва устозларнинг мақоми ниҳоятда юксак. Қуръони каримнинг Мужодала сураси 11-оятида уларнинг обрў-эътибори нақадар баланд экани шундай баён қилинади: «...Аллоҳ сизлардан имон келтирганларни ва илм берилганларни (баланд) даража (мартаба)ларга кўтарур».
Касб байрами муносабати билан Қорақалпоғистон мусулмонлари қозиёти қозиси ва ҳудуддаги жоме масжидлар имом-хатиблари, шунингдек, Нукус шаҳридаги «Муҳаммад ибн Аҳмад ал-Беруний» ўрта махсус ислом таълим муассасаси мудири ҳамда мударрислари иштирокида хайрли тадбир ташкил этилди.
Тадбир доирасида кўп йиллар давомида диний соҳада самарали меҳнат қилиб, ёшларга илм-маърифат улашган ва бугунги кунда кексалик гаштини сураётган фахрий устозларнинг ҳолидан хабар олинди. Уламолар ва диний соҳа ходимлари муҳтарам устозларни байрам билан самимий муборакбод этдилар.
Аллоҳ таоло динимиз равнақига беминнат хизмат қилган азиз устозларимизга мустаҳкам соғлик, мазмунли умр ва оилавий хотиржамлик ато қилсин!
Қорақалпоғистон мусулмонлари қозиёти
Матбуот хизмати
Академия ректори "Олий таълим аълочиси" кўкрак нишони билан тақдирланди
Пойтахтимиздаги INNO инновацион ўқув-ишлаб чиқариш технопаркида 1 октябрь – Ўқитувчи ва мураббийлар куни муносабати билан соҳа фидойилари ҳамда «Олий таълим аълочиси» кўкрак нишони соҳибларини тақдирлаш маросими бўлиб ўтди.
Мазкур тадбирда ўз касбига садоқат билан хизмат қилаётган профессор-ўқитувчилар, тажрибали педагоглар, илм-фан тараққиётига муносиб ҳисса қўшаётган олимлар ҳамда тизимда фидокорона фаолият юритаётган бир гуруҳ ходимларга «Олий таълим аълочиси» кўкрак нишони тантанали тарзда топширилди.
Қувонарлиси, ушбу юксак эътирофга сазовор бўлганлар қаторида Ўзбекистон халқаро ислом академияси ректори Музаффар Комилов ҳам муносиб кўрилиб, «Олий таълим аълочиси» кўкрак нишони билан тақдирланди.
Мазкур мукофот билан устозни қизғин муборакбод этиб, Аллоҳ таолодан эл-юрт ва динимиз равнақи йўлидаги хайрли ишларида куч-қувват ҳамда улкан зафарлар тилаймиз.
Ўзбекистон мусулмонлари идораси
Матбуот хизмати