Устозлар доимо эъзозда
Юртимизда ҳар йили 1 октябрь – Ўқитувчи ва мураббийлар куни байрами сифатида кенг нишонланади. Бу айём жамиятимизда муаллимларга кўрсатилаётган чексиз ҳурмат-эҳтиромнинг рамзий ифодаси бўлиб, аслида, устозни улуғлаш аждодларимиздан мерос бўлиб келаётган энг гўзал қадриятлардан биридир.
Муқаддас динимизда илм аҳли ва устозларнинг мақоми ниҳоятда юксак. Қуръони каримнинг Мужодала сураси 11-оятида уларнинг обрў-эътибори нақадар баланд экани шундай баён қилинади: «...Аллоҳ сизлардан имон келтирганларни ва илм берилганларни (баланд) даража (мартаба)ларга кўтарур».
Касб байрами муносабати билан Қорақалпоғистон мусулмонлари қозиёти қозиси ва ҳудуддаги жоме масжидлар имом-хатиблари, шунингдек, Нукус шаҳридаги «Муҳаммад ибн Аҳмад ал-Беруний» ўрта махсус ислом таълим муассасаси мудири ҳамда мударрислари иштирокида хайрли тадбир ташкил этилди.
Тадбир доирасида кўп йиллар давомида диний соҳада самарали меҳнат қилиб, ёшларга илм-маърифат улашган ва бугунги кунда кексалик гаштини сураётган фахрий устозларнинг ҳолидан хабар олинди. Уламолар ва диний соҳа ходимлари муҳтарам устозларни байрам билан самимий муборакбод этдилар.
Аллоҳ таоло динимиз равнақига беминнат хизмат қилган азиз устозларимизга мустаҳкам соғлик, мазмунли умр ва оилавий хотиржамлик ато қилсин!
Қорақалпоғистон мусулмонлари қозиёти
Матбуот хизмати
Дипломатлар ва Ўзбекистон мусулмонлари идораси вакиллари Малайзияда ёшларимиз билан учрашди
Мамлакатимизнинг Малайзиядаги элчихонаси ҳамда Ўзбекистон мусулмонлари идораси вакиллари Кедаҳ штатидаги Ал-Бухорий халқаро университетида таҳсил олаётган ўзбек ёшлари билан учрашди, деб хабар бермоқда “Дунё” АА.
Тадбирда университет раҳбарияти ва турли йўналишларда таҳсил олаётган ўзбекистонлик ёшлар иштирок этди.
Элчи Каромиддин Гадоев ёш ватандошларни мустақилликнинг 35 йиллиги билан табриклаб, ушбу санага бағишлаб ўтказилган тантанали маросимда давлатимиз раҳбари томонидан билдирилган таклиф ва ташаббуслар ҳақида алоҳида тўхталиб ўтди.
Ёшларга оид давлат сиёсатининг устувор йўналишлари, амалга оширилаётган ташаббуслар ва давлат органларининг ёш авлодни қўллаб-қувватлашдаги ролига алоҳида эътибор қаратилди.
Иштирокчиларга элчихонанинг Малайзиядаги ўзбекистонлик ватандошлар билан олиб бораётган ишлари ҳақида маълумот берилди. Ёш диаспорани бирлаштириш, уларнинг муаммоларини ўрганиш ҳамда қонуний ҳуқуқ ва манфаатларини ҳимоя қилиш дипломатик миссиянинг асосий вазифаларидан бири эканлиги қайд этилди.
Ўзбекистон мусулмонлари идораси раиси ўринбосари Зайниддин Эшонқулов “Ўзбекистон – бағрикенг диёр” мавзусида маъруза қилди. У Ўзбекистонда диний соҳадаги давлат сиёсати ва фуқароларнинг виждон эркинлигини таъминлаш борасидаги чора-тадбирлар ҳақида маълумот берди.
Учрашувда ёшларнинг ҳар томонлама ривожланиши ва таълим олиши учун шарт-шароитлар яратиш, хориждаги ўзбекистонлик талабаларнинг қонуний ҳуқуқ ва манфаатларини таъминлаш давлат сиёсатининг устувор йўналишларидан экани таъкидланди.
Иштирокчилар интерактив мулоқот шаклида Малайзиядаги ўзбек ёшларини қўллаб-қувватлаш чора-тадбирлари ва келгуси йилда улар иштирокида маданий-маърифий тадбирлар ўтказиш масалаларини муҳокама қилди.
Талабалар ўз ғоя ва таклифлари, жумладан, ватандошлар билан келгусидаги ҳамкорлик бўйича фикрларини билдирди. Улар Ўзбекистон ҳаётида фаол иштирок этиш ва мамлакатнинг янада ривожланишига муносиб ҳисса қўшишга тайёр эканини маълум қилди.
Ўзбекистон мусулмонлари идораси Матбуот хизмати