Чикаго шаҳрида илк Қуръон музейи
Иллинойс штатида жойлашган Нагамия халқаро ислом тиббиёти ва фанлари институтининг музей кутубхонасида “Қадимий Қуръон ва Қуръон қўлёзмаларининг нодир коллекцияси” очилиши эълон қилинди.
Маълумотларга кўра, кўпгина экспонатларнинг ёши 600 йилдан ошган. Улардан баъзилари Қўшма Штатлардаги Қуръоннинг энг қадимги тарихий нусхаларидир.
Ушбу тўпламда Қуръоннинг 100 га яқин нусхалари ва Қуръон қўлёзмалари мавжуд бўлиб, уларнинг барчаси қўлда ёзилган, баъзилари бамбук, палма барглари ва терига ёзилган. Чикагодаги кутубхона мамлакатда биринчи бўлиб бундай хазинага эга бўлди, дейилади islam.ru хабарида.
Мадина шаҳри нима учун “Тоййиба” деб аталади?
Мадина шаҳри Ислом тарихида бир нечта номлар билан аталган. Улардан энг машҳурларидан бири “Тоййиба”дир.
Исломдан олдин шаҳар Ясриб деб аталган. Бу ном “айблаш” ва “ёмонлаш” каби маъноларни англатади.
Муҳаммад соллаллоҳу алайҳи васаллам шаҳарга ҳижрат қилганларида, унга янги ном бердилар. У зот алайҳиссалом шаҳарни “гўзал” ва “покланган” маъносини англатувчи “Тоййиба” деб атадилар.
Шунингдек, Тоййибага яқин бўлган ва ўхшаш маънони англатувчи “Тоба” номи ҳам ушбу шаҳар учун ишлатилган.
Мадинада топилган VIII асрга оид қоятош ёзувида шаҳар Тоййиба номи билан аталган. Бу эса ушбу ном Исломнинг илк асрлариданоқ қўлланиб келинганини кўрсатади.
Тоййиба билан бир қаторда, шаҳар муайян тарихий жиҳатларини акс эттирувчи яна бир неча номлар билан ҳам танилган:
| Номи | Маъноси |
| Мадина | Шаҳар |
| Мадинату Набий | Пайғамбар шаҳри |
| Мадинаи Мунаввара | Мунаввар шаҳар |
| Дорул Ҳижра | Ҳижрат диёри |
Пўлатхон Каттаев,
Тошкент ислом институти катта ўқитувчиси
