Ўзбекистон делегациясининг Россия сафари муваффақиятли ўтди
Шу йил 17 апрелдан 1 майга қадар Ўзбекистон мусулмонлари идораси раиси ўринбосари Иброҳимжон домла Иномов Ўзбекистон делегацияси таркибида Россия Федерациясида бўлиб қайтди.
Ўзбекистон делегацияси аъзолари мазкур мамлакат расмийлари ва иш берувчи ташкилот раҳбарлари билан учрашиб, у ерда вақтинча меҳнат қилаётган, таълим олаётган юртдошларимизга муносиб шароитлар яратиш бўйича мулоқотлар ўтказиб, мавжуд муаммолар ҳал қилинди.
Мулоқотларда Россия ва Ўзбекистон вакиллари томонларидан бу йил “Маънавий ипак йўли” V халқаро илмий-диний анжумани ўтказилиши режалаштираётгани айтилди.
Шунингдек, мазкур мамлакат тадбиркорлари, ўзбекзабон ишбилармон вакиллари билан иқтисодий ҳамкорлик бўйича музокаралар олиб боришди.
Ташриф давомида Иброҳимжон домла Иномов мазкур мамлакатнинг Москва, Санкт-Петербург, Тула, Воронеж, Мурманск, Калининград шаҳарлари ва вилоятларида олий ўқув даргоҳларида, турли ташкилот ва корхоналарда мусофир ҳамюртларимизга диний-маърифий мавзуларда маърузалар қилиб, уларни қизиқтирган саволларга батафсил жавоб берди.
Хусусан, Иброҳимжон домла Иномов Россия Федерацияси мусулмонлари идораси раиси, Россия муфтийлари кенгаши раиси, муфтий Шайх Равиль ҳазрат Гайнутдин билан учрашув ўтказди.
Самимий учрашув чоғида Иброҳимжон домла Иномов муфтий Шайх Равиль ҳазрат Гайнутдинга Ўзбекистон мусулмонлари идораси раиси, муфтий Нуриддин домла Холиқназаровнинг дуои-саломлари, рамазон табрикларини етказди. Ўзбекистонлик мигрантларга Россияда ўқиш ва меҳнат қилиш учун муносиб шароит яратиш муҳокама қилинган асосий мавзулардан бири бўлди.
Дўстона мулоқотлар давомида икки давлат диний соҳа вакилларининг илиқ муносабати, яхшилик йўлидаги ҳамкорлиги яхши натижалар бериши қайд этилди.
Бир сўз билан айтганда, Ўзбекистон делегациясининг икки ҳафталик сафари давомида Россия Федерациясининг кўплаб шаҳар ва туманларида мамлакат расмий вакиллари билан яхши ҳамкорлик алоқалари ўрнатилиб, тегишли келишувларга эришилди, ўқиш ё иш масаласида ушбу давлатга борган ватандошларга муносиб шароитлар яратишга келишиб олинди.
Маърифий суҳбатларда мусофир ҳамюртлар диний ва ижтимоий, ҳуқуқий мавзуларда маърузалардан баҳра олиб, ўзларини ўйлантираётган масала ва саволларга жавоб олишди.
Учрашувлар давомида Ўзбекистон делегацияси вакилларига Диний соҳа раҳбарлари, хусусан, Ўзбекистон мусулмонлари идораси раиси, муфтий Нуриддин домла ҳазратлари ва Дин ишлари бўйича қўмита раиси Содиқжон Тошбоев номларига ташаккурнома ва миннатдорчиликлар изҳор этилди.
Ўзбекистон мусулмонлари идораси Матбуот хизмати
Тошкентда Малайзия халқаро ҳалол кўргазмаси ўказилиши режалаштирилмоқда
Ўзбекистон ва Малайзия ўртасида ҳалол саноати йўналишидаги ҳамкорлик янги босқичга чиқмоқда. Қишлоқ хўжалиги вазирлигида бўлиб ўтган учрашувда икки мамлакат вакиллари Тошкент шаҳрида «Malaysia–Uzbekistan International Halal Fest 2027» халқаро форуми ва кўргазмасини ўтказиш истиқболларини муҳокама қилдилар.
Малайзиянинг «TWOJ CREATIVE SDN BHD» компанияси делегацияси томонидан тақдим этилган лойиҳа ҳалол саноати экотизимини ривожлантириш, халқаро бизнес алоқаларини мустаҳкамлаш ҳамда янги инвестиция лойиҳаларини шакллантиришга қаратилгани билан аҳамиятлидир.
Режалаштирилаётган фестиваль доирасида:
-
Халқаро кўргазма, бизнес-форум ва B2B учрашувлари;
-
Ҳалол озиқ-овқат, туризм, молия ҳамда ишлаб чиқариш йўналишларига бағишланган махсус экспозициялар;
-
Инвестиция сессиялари, маданий дастурлар ва маҳсулотлар тақдимотларини ташкил этиш кўзда тутилган.
Ушбу тадбир Ўзбекистоннинг ҳалол маҳсулотлар бозоридаги салоҳиятини намойиш этиш ва маҳаллий ишлаб чиқарувчилар учун янги экспорт имкониятларини яратишга хизмат қилади.
Музокаралар давомида Малайзиянинг JAKIM стандартлари асосида ҳалол сертификатлаштириш тизимини ривожлантириш, маҳаллий ишлаб чиқарувчиларни халқаро бозорларга олиб чиқиш, фермер ва тадбиркорлар учун ўқув-семинарлар ҳамда малака ошириш дастурларини ташкил этиш масалалари ҳам кўриб чиқилди.
Томонлар фестивални юқори савияда ташкил этиш мақсадида тегишли вазирлик ва идоралар, олий таълим муассасалари, бизнес ҳамжамияти ҳамда тармоқ уюшмаларини жалб этган ҳолда қўшма «Йўл харитаси»ни ишлаб чиқишга келишиб олдилар.
Мутахассисларнинг таъкидлашича, ушбу форум савдо-иқтисодий алоқаларни мустаҳкамлаш, инвестицияларни жалб этиш, ҳалол саноати инфратузилмасини ривожлантириш ва озиқ-овқат хавфсизлигини таъминлашда муҳим халқаро майдонга айланади.
Ўзбекистон мусулмонлари идораси
Матбуот хизмати
