Сайёр йиғилиш

Шу йил ҳажга борган юртдошларимиз Арафот водийсида юртга қайтгач ҳар бир ҳожи «Янги Ўзбекистоннинг тинчлик ва маънавият тарғиботчилари» деган эзгу ташаббусни бир овоздан олға сурган эдилар.

Ана шу эзгу ташаббус бугун амалга кўчиб, ҳожилар имом-хатиблар, маҳалла фаоллари билан биргаликда хонадонларга, оилаларга кириб боряпти.

Ўзбекистон мусулмонлари идораси ҳамда Дин ишлари бўйича қўмита ҳамкорлигида ўтказиб келинаётган намунавий-амалий тадбирларнинг навбатдагиси Мустақиллигимизнинг 34 йиллиги арафасида “Ватан учун, миллат учун, халқ учун” шиори остида бугун, 26 август куни Тошкент вилояти Паркент туманида ўтказилди. 

Тадбир Ўзбекистон мусулмонлари идораси раиси ўринбосари Зайниддин домла Эшонқулов Тошкент вилоят бош имом-хатиби Дониёр домла Икромов бошчилида ўтказилди.

Паркент тумани “Бешкаппа” масжидида ўтказилган йиғилишда Ўзбекистон мусулмонлари идораси,  Тошкент вилояти вакиллиги раҳбарияти, туман-шаҳарлар бош имом-хатиблари ҳамда отинойилар, шунингдек, Паркент туманидаги масжид имом-хатиблари, ноиблари, отинойилар, “Ҳаж-2025” зиёратчилари ва маҳалла раислари таклиф қилинди.  

Имом-хатиблар 7 тоифага мансуб 110 та оилага, отинойилар 4 тоифага мансуб 27 та оилага, умумий ҳисобда 137 та оилага кириб, маънавий-маърифий тарғибот ҳамда амалий ёрдам тадбирларини олиб бордилар.

Бундан ташқари, адашиб турли оқимлар таъсирига тушиб қолган ёшлар билан алоҳида суҳбатлар ўтказилди. Ажрим ёқасига келиб қолган оилалар яраштирилди.

Тумандаги масжидлар имом-хатиблари ҳам тадбирда фаол қатнашдилар.

Хайрли дуолар билан сайёр йиғилиш ниҳоясига етди.

Тошкент вилояти вакиллиги 
Матбуот хизмати