Аллоҳ сиздан рози бўлсин!
Бугун диний идорамизга Наманганлик бир нуроний отахондан миннатдорлик мактуби келди. Мактубни ўқиб чиқиб, уни сизларга илингимиз келди. Қуйида мактубни ўқиш осон бўлишини ўйлаб оққа кўчирган ҳолда, тўлалигича сизларга ҳавола қиламиз. Мактуб бундай бошланади:
“Жорий йил 16 декабрь куни Ўзбекистон мусулмонлари идораси раиси, муфтий Нуриддин домла ҳазратларининг Наманган шаҳрида қурилган “Юсуфхон ўғли Қосимхон” жоме масжидига пешин намозига ташриф буюриб, намозхонларга мавъиза қилиб беришини эшитиб, жуда хурсанд бўлдим. Лекин масжидга бориб мавъиза тинглашга кексалик асло йўл бермас эди.
Хонадонимда маҳзун ҳолда ўтирган эдим, буни сезган набирам, бобожон ҳафа бўлманг, муфтий ҳазратнинг мавъизаларини ижтимоий тармоқлар орқали тўғридан-тўғри олиб берилар экан, биргаликда тинглаймиз, деганда қанчалик севинганимни тасаввур ҳам қила олмайсиз.
Ва ниҳоят пешин вақти бўлди. Вилоятимиз бош имом-хатиби ҳурматли Абдулҳай домла Муфтий ҳазратни жуда берилиб таништириб, сўзни у кишига бердилар. Муфтий ҳазратнинг “Аллоҳ рози бўладиган уч амал” мавзусидаги мавъизаларини набирамнинг телефони орқали тўғридан-тўғри тинглаш бахтига муяссар бўлдим.
Шанба куни барча фарзанд ва набираларим билан дастурхон атрофида ўтирар эканман, беихтиёр Муфтий ҳазратнинг сўзларидан келтириб, уларга насиҳатлар қилдим, хурсандчилик устига яна бир хурсандчилик, бир набирам эшикдан шошилиб кириб келдида бобожон Муфтий ҳазратнинг Намангандаги мавъизаларини бугун телевидение орқали намойиш қилинар экан, деди.
Шунда қалбим сурурларга тўлди. Инсон кексайганда шундай бўлиб қолар экан. Энди бир ўзим эмас, балки барчамиз Муфтий ҳазратларининг масжид минбаридан туриб баралла айтган сўзлари, насиҳатларини тинглар эканмиз, деб Яратганга шукроналар келтирдим.
Оила аъзоларим билан бирга мириқиб Ҳазратнинг мавъизаларини телевидение орқали томоша қилиб, тинглашга муяссар бўлдик. Албатта, бунга амал қилишга ҳам эришамиз, инша Аллоҳ. Муфтий ҳазратдан Аллоҳ рози бўлсин!
Жанобингизга узоқ умр тилаб, кекса нуроний мухлисингиз Хасанхон ҳожи МУМИНОВ”
Наманган вилояти вакиллиги матбуот хизмати
Фидокорона хизмат эътирофсиз қолмайди
Ўзбекистон мусулмонлари идораси тасарруфидаги "Кўкалдош" ўрта махсус ислом таълим муассасасида кўп йиллар ҳалол ва фидокорона меҳнат қилган ходимамиз Аҳмаджонова Нилуфар Ҳабибуллаевнанинг 50 ёшлик юбилейи муносабати билан таълим муассасаси ҳамда касаба уюшмаси томонидан тадбир ўтказилди.
Тадбирда таълим муассасаси мудири М. Эркаев, ўқув ишлари бўйича мудир ўринбосари Н. Джалолов ва манавий-маърифий ишлар бўйича мудир ўринбосари, таълим муассасаси касаба уюшмаси раиси А.Ғаниев иштирок этишди. Муассаса мудири М. Эркаев муҳтарама опамизни шахсан ўзи табрикнома билан тақдирлади. Эсдалик совғалари билан ҳам мукофотланди.
Нилуфар опа ҳар куни тонг саҳардан илм даргоҳига келиб, унинг озода, шинам ва покиза бўлишига йилларида сабр, ихлос ва садоқат билан ўз ҳиссасини қўшиб келмоқда. Бундай камтарин, аммо қадри баланд меҳнат барчамиз учун ибрат намунасидир.
Пайғамбаримиз соллаллоҳу алайҳи васаллам: "Покизалик иймондандир", деб марҳамат қилганлар. Илм ва марифат масканининг таъминлаш — талабалар устозларнинг тинч, тоза ва баракали илм олишига муносиб ҳисса қўшадиган эзгу ишдир. Ана беминнат хизмат ҳар қандай эътироф ва эҳтиромга лойиқдир.
Билим юртимиз ўз ёрдамга ғамхўрлик қилишни муҳим бурч деб билади. Зеро, илм даргоҳига қилинган ҳар бир хизмат — Аллоҳнинг розилиги йўлидаги савобли амалдир. Ким илм аҳлига ва илм масканига хизмат қилса, ўша илмдан таралаётган эзгуликнинг ажридан баҳраманд бўлиши умид қиламиз.
Муҳтарама опамизга мустаҳкам соғлик-саломатлик, узоқ умр, оила бахти ва ишларида барака тилаймиз. Аллоҳ таоло ҳалол меҳнатларини ажру мукофотсиз қолдирмасин, қилган эзгу ишлари ва меҳнатларининг роҳатини кўриш узоқ йиллар давомида насиб этсин!
"Кўкалдош" ўрта махсурс ислом таълим муассасаси
матбуот хизмати
