Қирғизистон уламоларининг Бухоро зиёрати (Фотолавҳа)
Қирғизистон мусулмонлари диний идораси раиси, муфтий Замир домла Ракиев бошчилигидаги делегация Бухоро шаҳрига ташриф буюрди. Бухоро вилояти ҳокими ўринбосари Эркин Мажидов, вилоят бош имом-хатиби Жобир домла Бухорий, Мир Араб олий мадрасаси ректори Ҳайдар домла Йўлдошхўжаев, Мир Араб ўрта махсус ислом билим юрти мудири Жалолиддин домла Сабуров, шунингдек, имом-хатиблар мартабали меҳмонларни кутиб олиб, ҳамроҳлик қилди.
Меҳмонлар даставвал Бухоро шаҳрида жойлашган тарихий обидалардан Масжиди Калон жоме масжиди, Пойи калон ансамбили ва Мир Араб ўрта махсус ислом билим юрти билан яқиндан танишди.
Шундан сўнг меҳмонлар 1127 йил қурилган Минораи калон ва 500 йиллик тарихга эга бўлган Мир Араб мадрасасини кўриб, Бухоронинг қадамий тарихи меҳмонларда ҳайрат ва ҳавас уйғотди. Шунингдек, Лаби Ҳовуз мажмуаси, Кўкалдош мадрасаси ва Нодир Девонбеги тахирий обидаларни зиёрат қилишди.
Кейин эса мартабали меҳмонларни мезбон мутассаддилар билан бирга Баҳоуддин Нақшбанд мақбарасини зиёрат қилишди. Муборак қадамжода Қуръон тиловат қилиниб, Ҳақ таолодан халқимиз тинчлиги ва фаровонлигини сўраб хайрли дуолар қилинди.
Мартабали меҳмонлар пешин намозини Бухоро шаҳридаги “Файзобод” жоме масжидида адо қилишди. Икки мамлакат ўртасидаги алоқалар бунданда ривожланиши ва мустаҳкамланиши учун хайрли дуолар қилиниб, термир йўл вакзалига кузатиб қўйилди.
Ўзбекистон мусулмонлари идораси матбуот хизмати
Илмий-амалий анжуман доирасида бир гуруҳ устоз ва ходимлар муносиб тақдирланди
Ўзбекистон мусулмонлари идораси томонидан ташкил этилган «Замонавий диний таълим: педагогика, илм-маърифат ва инновация» мавзусидаги I илмий-амалий анжумани доирасида соҳада алоҳида ўрнак кўрсатган устозларни тақдирлаш маросими бўлиб ўтди.
Анжуманда Давлатимиз Раҳбари ташаббуслари билан ҳар жабҳада амалга оширилаётган ислоҳотлар қаторида илм-фанни тараққий эттириш, аждодлар меросини ўрганиш, диний таълимни ривожлантириш ва соҳага кўрсатилаётган юксак эътибордан мамнунлик кайфияти ҳукм сурди.
Диний идора тасарруфидаги олий ва ўрта махсус диний таълим муассасаларида самарали фаолият юритиб, ёшларга таълим-тарбия бериш, соҳа ривожига муносиб ҳисса қўшиш ҳамда динимизнинг софлигини асраш йўлида фидокорона меҳнат қилаётган бир гуруҳ педагог ва мударрислар меҳнати муносиб эътироф этилди.
Тадбир давомида соҳадаги фидокорона ва самарали меҳнатлари учун қуйидаги устоз ва педагоглар Фахрий ёрлиқ ҳамда Умра йўлланмалари билан мукофотланди:
- Раҳматулла Умаров — Саййид Муҳйиддин махдум ўрта махсус ислом таълим муассасаси ўқитувчиси.
- Махтумқули Тошқулов — Хожа Бухорий ўрта махсус ислом таълим муассасаси ўқитувчиси.
- Азимхон Абдуллаев — Ҳидоя ўрта махсус ислом таълим муассасаси ўқитувчиси.
- Абдулбосит Раҳимов — Мир Араб ўрта махсус ислом таълим муассасаси ўқитувчиси.
Шунингдек, анжуман доирасида диний таълим тизимида намунали раҳбарлик қилган, фидокорона педагогик ва илмий-фаолият олиб борган,таълим муассасаларининг моддий-техник базасини мустаҳкамлаш, тўгаракларни самарали ташкил этишдаги алоҳида хизматлари учун яна 15 нафар раҳбар ва ўқитувчилар Ўзбекистон мусулмонлари идорасининг Фахрий ёрлиқлари ҳамда эсдалик совғалари — телевизор, ноутбук ва планшетлар билан тақдирланди.
Ўзбекистон мусулмонлари идораси жамоаси тақдирланган барча устоз ва ходимларни ушбу юксак эътироф билан самимий муборакбод этиб, уларнинг келгуси илмий ва педагогик фаолиятларида улкан зафарлар тилайди.
Ўзбекистон мусулмонлари идораси Матбуот хизмати
