Bugun, 17 noyabr' kuni Qirg'iziston musulmonlari diniy idorasi raisi, muftiy Zamir hoji Rakiyev boshchiligidagi bir guruh ulamolarni Ho'jaobod tumani Do'stlik chegara posti orqali Andijon viloyatiga tashrif buyurdi.

Martabali mehmonlarni O'zbekiston musulmonlari idorasi raisining birinchi o'rinbosari Homidjon domla Ishmatbekov hamda Andijon viloyati bosh imom-xatibi Mirzamaqsud domla Alimovlar kutib olishdi.

Andijon viloyatining Bosh masjidi – "Devonaboy" jomesida ikki qardosh xalq ulamolari ishtirokida uchrashuv o'tkazildi. Unda O'zbekiston musulmonlari idorasi raisining birinchi o'rinbosari Homidjon domla Ishmatbekov mehmonlarni tashrif bilan qutlab, muftiy Nuriddin domla Holiqnazarov hazratlarining salom va hadyalarini etkazdi.

* * *

Kuning ikkinchi yarimida Qirg'iziston musulmonlari diniy idorasi raisi, muftiy Zamir Rakiyev, Qirg'iziston Islom universiteti rektori Abdushukur Normatov, muftiy maslahatchisi Abdubannop Musaliyev, O'sh shahar qozisi Ubaydulla Saribayev, taniqli olim Abdulaziz Yuldashev kabi bir guruh ulamolar Farg'ona viloyatiga tashrif buyurishdi. Mehmonlarni O'zbekiston musulmonlari idorasi raisi o'rinbosari Homidjon domla Ishmatbekov, Farg'ona viloyati bosh imom-xatibi Ubaydulloh domla Abdullayev boshchiligidagi mutasaddilar kutib olishdi.

Dastlab, mehmonlar ishtirokida uchrashuv bo'lib o'tdi. Unda so'zga chiqqanlar ikki qo'shni va qardosh yurt o'rtasidagi munosabatlar, hamkorlikda amalga oshirilayotgan ishlar haqida to'xtalib, ikki yurt rahbarlari va xalqlari doimo ana shunday do'stona ruhda emin-erkin hayot kechirishlarini so'rab duoga qo'l ochdilar.

Shundan so'ng Marg'ilon shahridagi "Hunarmandlar markazi"ga tashrif qilinib, bu erda olib borilayotgan ishlar bilan tanisharkan, qo'li gul hunarmandlar tomonidan ajib bir sinoat ila to'qilayotgan bejirim matolar hamda bu erdagi jarayon mehmonlarda katta taassurot qoldirdi.

Mehmonlarning navbatdagi tashrif manzili "Pur Siddiq" majmuasi bo'ldi. Majmuada tilovat qilinib, o'tgan azizlar haqqiga duo qilindi.

* * *

Kuning yakunida Qirg'iziston muftiysi boshchiligidagi ulamolar Namangan viloyatiga tashrif buyurishdi

Mamlakatimizda diniy-ma'rifiy sohada amalga oshirilayotgan islohotlar, fuqarolarga yaratib berilayotgan sharoitlar bilan yaqindan tanishish maqsadida Qirg'iziston musulmonlari diniy idorasi raisi, muftiy Zamir Rakiyev boshchiligidagi ulamolar delegatsiyasi Namangan shahridagi Afsonalar vodiysida joylashgan “Yusufxon o'g'li Qosimxon” masjidiga keldilar.

Mehmonlar O'rta Osiyoda o'xshashi yo'q bo'lgan, davlat rahbari Shavkat Mirziyoevning diniy sohada olib borayotgan islohotlari samarasi o'laroq qurilgan masjidda mamlakatimiz taraqqiyoti, xalqimizning farovonligi uchun duo qildilar hamda ikki mamlakat o'rtasida diniy-ma'rifiy sohadagi hamkorlik bo'yicha kelishib oldilar.

Qirg'izistonlik ulamolarning yurtimizga tashrifi davom etmoqda.

Tashrif tafsilotlarini sayt va ijtimoiy tarmoqdagi sahifalarimizda kuzatib boring.

 

O'zbekiston musulmonlari idorasi matbuot xizmati

www.muslim.uz