Kunim bitib dunyodan o'tsam,
Man ham jannat ahlidan bo'lsam.
Boshlariga tojlar kiydirib,
Otam bilan jannatga kirsam!

Ikki dunyo meni degan zot,
Ikki dunyo g'amim egan zot,
Ko'rsatib men unga iltifot,
Onam bilan jannatga kirsam!

Kasal bo'lsam yo'qlab kelganim,
Yarim ko'nglim to'qlab kelganim,
Onamdan so'ng "ona" bilganim,
Opam bilan jannatga kirsam!

Yo'latmagan yonimga hech g'am,
Men uchun ming kuyungan odam,
Otamdan so'ng keyingi "otam",
Akam bilan jannatga kirsam!

U bo'lmasa ko'nglim doim kam,
Tatimaydi u siz davlat ham,
Tatirmidi ayting jannat ham!
Bolam bilan jannatga kirsam!

Doim meni etgan ming e'zoz,
Qilmagan hech biror e'tiroz,
Hurlar xafa bo'lmang iltimos,
Yorim bilan jannatga kirsam!

Bolalikdan chiqqanmiz yo'lga,
Chidaganmiz yomg'irga, do'lga,
Hatto, jonin tutqazgan qo'lga,
Do'stlar bilan jannatga kirsam!

Otamdan ham ortiq suyganim,
Onamdan ko'p yaxshi ko'rganim,
Mening suyuk bir payg'ambarim,
Rasul bilan jannatga kirsam!

Kechir meni, ey parvardigor,
Jannat so'rab, nodonlik qilsam,
Shunday mening niyatlarim bor,
Ular bilan jannatga kirsam!
Ular bilan jannatda yursam!

Jannatda birga bo'lishni istaganlaringizga yuboring!