Mukofotlar muborak bo'lsin!
Muqaddas dinimizning sof islomiy ta'limotini yurtimiz mo'min-musulmonlariga asl holicha etkazish, Islom ma'rifatini keng yoyish, buyuk ajdodlarimizning bebaho durdonlarini yoshlarimizning ongu shuuriga singdirish, xalqimiz, ayniqsa, navqiron avlod vakillarini muqaddas qadriyatlarimizga zid turli yot g'oyalardan asrashda imom-xatiblarning o'rni bugun har qachongidan ham muhim ahamiyat kasb etib boryapti.
Bugun chet davlatlarga ta'lim olish, sayohat qilish va ishlash uchun borayotgan vatandoshlarimizni ogohlikka chorlash, internet saytlari va ijtimoiy tarmoqlarda o'zlarining radikal chiqishlari bilan kishini chalg'ituvchi g'arazli kimsalar da'vatlaridan ehtiyot bo'lishga undashda imom domlalarning xizmatlari tahsinga sazovor.
Ana shu jabhalarda faollik ko'rsatgan, Toshkent viloyati imom-xatiblarining boshini qovushtirib, ular bilan hamjihatlikda ishlayotgan, ko'plab masjidlarning obod bo'lishiga xizmat qilayotgan Jasurbek domla Raupovni kuni kecha O'zbekiston musulmonlari idorasi raisi, muftiy Nuriddin domla Holiqnazarov maqtov yorlig'i bilan taqdirladi.
Albatta, bu Jasurek domlaning kamtarona xizmatlariga munosib rag'batdir.
Mehnat qilgan inson hech qachon kam bo'lmasligi ayni haqiqatdir. Toshkent viloyati bosh imom-xatibining maqtov yorliq bilan taqdirlanishi yana bir quvonchli voqeaning debochasi bo'ldi.
Gap shundaki, bugun, ya'ni, 2021 yil 4 noyabr' kuni O'zbekiston musulmonlari idorasi tasarrufidagi masjidlarda faoliyat yuritayotgan imom-xatiblar o'rtasida “Yil imomi – 2021” ko'rik-tanlovining respublika bosqichi bo'lib o'ti.
Ko'rik-tanlovda Qoraqalpog'iston Respublikasi, viloyatlar va Toshkent shahridagi hududiy bosqichlarda g'oliblikni qo'lga kiritgan imom-xatiblar bahslashdilar.
Hakamlar hay'atining xulosasga ko'ra, eng yuqori ball to'plagan Toshkent viloyati Piskent tumani “Sobirxon ota” jome masjidi imom-xatibi Sunnatilla domla Ernazarov birinchi o'rinni qo'lga kiritdi.
Bu yutuq nafaqat “Sobirxon ota” masjidi jamoasining yoki Piskent tumani mo'min-musulmonlarining, ayni paytda Toshkent viloyatining ham muvaffaqiyatidir.
Sunnatilla domla 2000 yildan beri Piskent tumanidagi “Sobirxon ota” jome masjidi imomi bo'lib ishlab kelmoqda. O'tgan davr mobaynida u juma mav'izalarida, ikkala hayit va boshqa turli tadbirlarda xalqimizga sof Islom ta'limotini etkazishga munosib hissa qo'shmoqda.
Fursatdan foydalanib, O'MI Toshkent viloyati vakilligi jamoasi hamda viloyatdagi shahar va tumanlar bosh imom-atiblari, masjidlar imomlari, otinoyilar nomidan Jasurbek domla Raupov hamda Sunnatilla domla Ernazarovni qo'shaloq mukofot blan samimiy muborakbod etamiz.
Alloh taolo O'zining dini yo'lida xizmat qilayotgan barcha azizlarimizning ajrlarini ko'paytirib bersin!
O'zbekiston musulmonlari idorasi
Toshkent viloyati vakilligi
Matbuot xizmati
“Uthaym” gazetasi: Madaniy merosni asrash Yangi O‘zbekiston taraqqiyotining muhim yo‘nalishiga aylangan
Shri-Lankaning “Uthaym” nashrida O‘zbekistonning boy tarixiy-madaniy merosi, uni asrab-avaylash va kelajak avlodlarga bezavol yetkazish borasida amalga oshirilayotgan ishlarga bag‘ishlangan maqola e’lon qilindi, deb xabar bermoqda “Dunyo” AA.
Materialda Yangi O‘zbekistonda milliy qadriyatlarni tiklash, madaniy meros obyektlarini muhofaza qilish, ilm-fan va ma’rifatni rivojlantirishga qaratilgan islohotlar yuksak baholangan.
Ta’kidlanganidek, so‘nggi yillarda O‘zbekistonda ma’naviy-ma’rifiy sohani tubdan takomillashtirish, xalqning ko‘p asrlik boy ilmiy-madaniy merosini o‘rganish hamda uni jahon hamjamiyatiga keng targ‘ib etish davlat siyosatining ustuvor yo‘nalishlaridan biriga aylandi.
Mamlakatda tarixiy obidalarni restavratsiya qilish, muzeylar va arxivlar faoliyatini modernizatsiya qilish, qo‘lyozmalarni asrab-avaylash va raqamlashtirish, milliy madaniy merosni xalqaro miqyosda targ‘ib qilishga qaratilgan tizimli ishlar amalga oshirilayotgani qayd etilgan.
Maqolada Prezident Shavkat Mirziyoyev tashabbusi bilan ilgari surilgan Uchinchi Renessans g‘oyasi mamlakat taraqqiyotining muhim strategik yo‘nalishi sifatida alohida e’tirof etilgan. Muallif fikricha, mazkur g‘oya nafaqat tarixiy merosni asrab-avaylash, balki ilm-fan, ta’lim, madaniyat va innovatsiyalarni uyg‘un rivojlantirish orqali mamlakatning intellektual va ma’naviy salohiyatini yuksaltirishga xizmat qilmoqda.
Uchinchi Renessans konsepsiyasi O‘zbekistonning buyuk ilmiy an’analarini qayta tiklash, yosh avlodni bilimli va vatanparvar etib tarbiyalash hamda mamlakatning xalqaro nufuzini yanada mustahkamlashga qaratilgan umummilliy dastur sifatida baholanmoqda.
Gazetaning yozishicha, O‘zbekistonda kechayotgan o‘zgarishlar faqat madaniy sohadagi islohotlar bilan cheklanmaydi. Ular mamlakatning ilmiy, ma’naviy va intellektual taraqqiyotini ta’minlashga qaratilgan uzoq muddatli strategiyaning ajralmas qismi hisoblanadi. Ilmiy muassasalar faoliyatini qo‘llab-quvvatlash, tarixiy manbalarni tadqiq etish, madaniy merosni muhofaza qilish va zamonaviy ta’lim tizimini rivojlantirish kabi yo‘nalishlar yagona maqsad — Yangi O‘zbekistonning mustahkam ma’naviy poydevorini yaratishga xizmat qilayotgani alohida qayd etilgan.
Maqolada Toshkent shahrida barpo etilgan O‘zbekiston Islom sivilizatsiyasi markazi faoliyatiga keng o‘rin ajratilgan.
Prezident Shavkat Mirziyoyev tashabbusi va g‘oyasi asosida barpo etilgan mazkur betakror majmua O‘zbekistonning madaniy va ilmiy siyosatidagi eng muhim istiqbolli loyihalardan biri bo‘ldi. Markazda VII asrga oid noyob Usmon Mus'hafi saqlanayotgani uning tarixiy ahamiyatini yanada oshiradi.
Shu bilan birga, bu yerda qo‘lyozmalarni ilmiy o‘rganish, restavratsiya qilish, arxiv materiallarini tizimlashtirish va zamonaviy texnologiyalar asosida raqamlashtirish uchun barcha zarur sharoitlar yaratilgan.
Gazetada O‘zbekistonning YUNЕSKO va boshqa xalqaro tashkilotlar bilan madaniy merosni muhofaza qilish sohasidagi hamkorligi, tarixiy obidalarni asrab-avaylash, ularni xalqaro turizm va ilmiy tadqiqotlar bilan uyg‘un rivojlantirishga qaratilgan sa’y-harakatlari haqida so‘z yuritilgan.
O‘zbekiston musulmonlari idorasi Matbuot xizmati
