Diyonat ishlari boshqarmasi rahbarining tabrigi qabul qilindi
Bugun, 20 oktyabr' kuni Turkiya Diyonat ishlari boshqarmasi raisi o'rinbosari Selim Argun boshchiligidagi delegatsiya O'zbekiston musulmonlari idorasiga tashrif buyurdi.
Martabali mehmonlarni Diniy idora raisining birinchi o'rinbosari Homidjon domla Ishmatbekov va rais o'rinbosari O'tkir Hasanbayev kutib oldi.
Uchrashuvda Selim Argun marhum muftiy Usmonxon Temirxon o'g'li rahimahullohning vafotlari yuzasidan hamdardlik bildirdi. O'z navbatida, kuni kecha bo'lib o'tgan Ulamolar Kengashida Nuriddin domla Holiqnazarov muftiy lavozimiga saylanganlari munosabati bilan Turkiya Diyonat ishlari boshqarmasi raisi, doktor Ali Erbosh janoblarining tabriklarini etkazdi.
O'zaro muloqotda ikki davlat aloqalari yangi bosqichga ko'tarilgani, diniy idoralar bilan hamkorlikni rivojlantirish borasida yaxshi natijalarga erishilgani alohida qayd etildi. Shuningdek, diniy adabiyotlarni nashr etish va xayriya tadbirlarini o'tkazishdagi hamkorlik masalalariga alohida urg'u qaratildi.
Tashrif yakunida muftiy Nuriddin domla Holiqnazarov hazratlari ham mehmonlar bilan suhbatlashib, e'tibor va ehtirom uchun minnatdorlik bildirdilar.
Tomonlar bir-birlariga esdalik sovg'alari taqdim etdilar.
O'zbekiston musulmonlari idorasi Matbuot xizmati
«Qur’on tinchlikka buyuradi»
O‘zbekiston davlat mustaqilligining 35 yilligi munosabati bilan «Qur’on tinchlikka buyuradi» shiori ostida Samarqand shahridagi "Obi Rahmat" jome masjidida Qur’on musobaqasi tashkil etildi. Qur’oni karimga bo‘lgan muhabbatni yuksaltirish, qiroat va tajvid ilmlarini keng targ‘ib etish hamda jamiyatda tinchlik va osoyishtalik g‘oyalarini mustahkamlashga xizmat qiluvchi ushbu xayrli tadbirning saralash bosqichlaridan o‘tgan ishtirokchilar «Hifz» va «Mujavvid» yo‘nalishlari bo‘yicha bellashdi.
G‘olib va sovrindorlar:
«Hifz» yo‘nalishi:
1-o‘rin: Asqar Tursunov (Samarqand shahri, «Muhammadamin ota» masjidi imom-noibi);
2-o‘rin: Abduvakil Olimov (Urgut tumani, «G‘avsul A’zam» masjidi imom-xatibi);
3-o‘rin: Shavkat Mahmudov (Narpay tumani, «So‘fi Ziyrak» masjidi imom-xatibi).
«Mujavvid» yo‘nalishi:
1-o‘rin: Zikrullo Matlabov (Samarqand shahri, «Xo‘ja Abdu Darun» masjidi imom-noibi);
2-o‘rin: Burxoniddin Tursunov (Nurobod tumani, «Jom ota» masjidi imom-xatibi);
3-o‘rin: Isomiddin Isayev (Paxtachi tumani, «Xo‘ja Ziyovuddin» masjidi imom-xatibi).
Qo‘shimcha nominatsiyalar:
«Eng ta’sirchan tilovat»: O‘tkir Abdullayev (Pastdarg‘om tumani);
«Eng go‘zal tilovat»: Sardorxon Sobirov (Samarqand tumani);
«Tajvid qoidalariga eng mukammal rioya qilgan ishtirokchi»: Yusufxon Nizomov (Samarqand shahri).
Tadbir yakunida g‘oliblarga O‘zbekiston musulmonlari idorasi viloyat vakilligining diplomlari va «Vaqf» fondi filiali tomonidan qimmatbaho sovg‘alar topshirildi.
O‘zbekiston musulmonlari idorasi
Matbuot xizmati
