Yoshligida maktabni tashlab ketishga majbur bo'lgan falastinlik 85 yoshli muslima Jihod Battu yoshi keksaligiga qaramay dinshunoslik bo'yicha bakalavr darajasini olishga muvaffaq bo'ldi.

Battu 1936 yilda Iordan daryosining G'arbiy sohilidagi Nablus shahrida tug'ilgan. Jihod falastinliklar ommaviy quvg'inga uchragan 1948 yilgacha Nazaret yaqinidagi Mujaydil shahrida maktabga qatnagan. Shu yili onasi ham kasal bo'lib qoldi, shuning uchun qiz maktabga borolmay qoldi.

Islam.ru xabariga ko'ra, 1954 yilda Jihod turmushga chiqib, besh farzand tug'di. Biroq uning o'qib o'rganish istagi hech qachon so'nmagan. U arab, ingliz va ivrit tillaridagi bir nechta til kurslari, shuningdek, matematika kurslarida o'qishga muvaffaq bo'ldi. 81 yoshida falastinlik ayol hali ham o'qishga ishtiyoqmand edi. U oliy ma'lumot olishga qaror qildi.

Mahalliy veb-saytga bergan interv'yusida Jihodning aytishicha, u Islomga bo'lgan muhabbati tufayli dinshunoslik institutini tanlagan. “Kechasi ko'p va qattiq o'qidim”, - dedi u.

85 yoshida Jihod o'z orzusini bakalavr darajasini olish va bitiruvchi kiyimini kiyish orqali amalga oshirdi. "O'rganganlarimni atrofdagilarga o'rgataman. Ilmni faqat o'zim uchun qoldirsam undan nima foyda, shuning uchun boshqalarga ham foyda keltirishi uchun ularni o'rgatmoqchiman",- deya o'rtoqlashdi 85 yoshli bitiruvchi.

O'zbekiston musulmonlari idorasi matbuot xizmati